💔 മൊഴിയിടറാതെ 💔 : ഭാഗം 6

നോവൽ
എഴുത്തുകാരി: തമസാ

Thank you for reading this post, don't forget to subscribe!

---

തളർച്ച മറച്ചു പിടിക്കാൻ ശ്രമിച്ചെങ്കിലും കൂടെ ഉള്ളവർക്ക് ഗീതുവിന്റെ മുഖം കണ്ടു സംശയം തോന്നി….

എന്താ ഗീതൂ… വയ്യായ്ക വല്ലതും ഉണ്ടോ … എന്തോ പോലെ ഇരിക്കുന്നു മുഖം……

കൂടെ പണിയുന്ന ജലജ ചേച്ചി ചോദിച്ചപ്പോഴും വെയിലേറ് കൊണ്ടിട്ടാ എന്നും പറഞ്ഞു ഗീതു ഒഴിഞ്ഞു മാറി…. അയാൾ തന്നെ അന്വേഷിച്ചു വന്ന കഥ കൂടി നാട്ടുകാർക്ക് കൊട്ടി ഘോഷിക്കാൻ കൊടുക്കണം എന്ന് അവൾക്ക് തോന്നിയില്ല….

ആരെങ്കിലും അറിഞ്ഞാൽ പിന്നെ അയാളെ തന്നെ മോൾടെ അച്ഛനായി നാട്ടുകാർ പ്രഖ്യാപിക്കും … അങ്ങനെ ഒരു കാര്യം താൻ ആയി അവരെ ചിന്തിപ്പിക്കേണ്ട…… എല്ലാവരെയും നോക്കി ഒന്ന് ചിരിച്ചിട്ട്, അവൾ കുഞ്ഞിനെ നോക്കി….

പാവം….. കയ്യിലിരിക്കുന്ന കുപ്പിയിൽ നിന്ന് കഞ്ഞിവെള്ളം വലിച്ചു കുടിക്കുന്നുണ്ട്‌ അവൾ…. വെയിലിന്റെയാ….. ദാഹം കൂടും….

അമ്മേടെ കുഞ്ഞാറ്റേ……….

ഗീതുവിന്റെ കണ്ണും ഹൃദയവും അലമുറയിട്ടു വിളിച്ചു…. കുര്യാച്ചന്റെ വീട്ടിൽ നിന്ന് പാടത്തേക്കുള്ള മരപ്പാലം കടന്ന് നീന വരുന്നത് കണ്ടപ്പോൾ ഗീതുവിന്‌ ചെറിയ ആശ്വാസം തോന്നി….. മോളെ എടുത്തുകൊണ്ടു നടന്നോളും നീന കുറച്ചു നേരത്തേക്കെങ്കിലും……

ചിലപ്പോൾ അവരുടെ വീട്ടിലേക്കും കൊണ്ട് പോവും ….. നീനയുടെ അമ്മച്ചിക്കും കുര്യാച്ചനും അവരുടെ മോൻ നിനിലിനും വല്യ കാര്യാ മോളെ…..

ചേ… ചേ…….

ആ വിളി കേട്ടപ്പോൾ ചെറുതായി എങ്കിലും ഒരു ചിരി വന്നു ഗീതുവിന്റെ ചുണ്ടിൽ.. മോള് അങ്ങനെ ഒക്കെ ഓരോ സ്വരം ഉണ്ടാക്കിയാണ് എല്ലാവരെയും വിളിക്കുന്നത്….

മോളുടെ ഒച്ച കേട്ടിട്ട് നീനാ, ദൂരെന്ന് മുതൽ വിളി കേട്ട് തുടങ്ങി… മോള് അന്നേരം പിന്നെയും ഉച്ചത്തിൽ വിളിക്കും…. കണ്ടിരിക്കാൻ രസമാണ്….മോൾക്ക്‌ കളിക്കാൻ ആകെ കിട്ടുന്നത് ഇവരെ അല്ലേ… കള്ളിപ്പെണ്ണ് അത് നന്നായി മുതലെടുക്കുന്നുമുണ്ട്…..

അതെല്ലാം നോക്കി കാണുമ്പോഴും ഗീതു പണിയിൽ കൂടുതൽ ശ്രദ്ധ കൊടുത്തു…. തന്റെ അന്നമാണ്…….

“ഇച്ചേച്ചീ….മോളെ ഞാൻ കൊണ്ടോവാട്ടോ….. ചേട്ടായി മോളെ അന്വേഷിച്ചാരുന്നു…. ”

മോളെ എടുത്തു തോളത്തിട്ട് കൊണ്ട് നീന പറഞ്ഞു….

“കരഞ്ഞാൽ വേഗം കൊണ്ട് വരണേ മോളേ… ”

തല കുലുക്കി സമ്മതിച്ചു ഗീതു…

നിനക്ക് എന്താ പെണ്ണെ…. നിനിലിനെ കിട്ടിയാൽ അവന്റെ പുറത്തു നിന്ന് ഇറങ്ങില്ല നന്ദു…. പിന്നെ അല്ലേ കരയുന്നത്…… ഇന്ന് ക്ലാസില്ലേ നീനേ അവന്…..

ജലജ ചേച്ചി ചോദിച്ചു….

ഇല്ലേച്ചിയെ.. ഇന്ന് സമരം ആണ് ന്നാ ചേട്ടായി പറഞ്ഞത്… പോയിട്ട് തിരിച്ചു വന്നതാ ….. ഞാൻ പോവാട്ടോ…..

മോളെയും കൊഞ്ചിച്ചു കൊണ്ട് നീന കേറി പോവുന്നതും, മരപ്പാലം എത്തിയപ്പോൾ നിനിൽ വന്നു കുഞ്ഞിനെ എടുത്തുകൊണ്ടു പോവുന്നതും ഗീതു കണ്ടു…. നീനാ കുഞ്ഞിനേം കൊണ്ട് അവിടം കടക്കില്ല….

ഗീതുവും അവനും ഒരുമിച്ചു പഠിച്ചതാ…. നിനിലിന്‌ ഗീതുവിനെ ഇഷ്ടവും ആയിരുന്നു.. എന്തോ… ഒരു പത്താം ക്ലാസ് കാരൻ പയ്യന് പ്രണയം തുറന്നു പറയാൻ പറ്റിയില്ല……. പിന്നെ, അതും മറവിയുടെ ഓർക്കാത്ത താളുകളായി മറിഞ്ഞു……..മോളെ വലിയ കാര്യമാണ് അവന്…

ഗിരിയേട്ടൻ ഉണ്ടായിരുന്നേൽ എങ്ങനെ ആയിരിക്കുമോ, അത് പോലെ ആയില്ലേലും, പകുതി എങ്കിലും ആവുന്നുണ്ട് നന്ദുവിന്‌ അവൻ… തോളിൽ കേറ്റിയും ഒക്കത്തു വെച്ചും എല്ലാം അവൻ അവളെ വീട് ചുറ്റിക്കും ……

അതുകൊണ്ട് ആവും അവനെ കിട്ടിയാൽ പിന്നെ മോൾക്ക് നീനയെ തന്നെ വേണ്ട…. അതവള് പറയുകയും ചെയ്യും …

ഇക്കണ്ട കയറും കുറ്റിയും ചാടി പാടം കേറ്റി വീട്ടിലെത്തിയാൽ പിന്നെ കുഞ്ഞാവയ്ക്ക് എന്നെ വേണ്ട ഇച്ചേച്ചീ… ചേട്ടായീനെ മതീന്ന്….

💔

പണി കഴിഞ്ഞു വീട്ടിൽ എത്തിയ വഴി മുൻ വശത്ത് ഉള്ള വാതിലടച്ചിട്ടു ഗീതു, അമ്മയുടെ മുറിയിലേക്ക് ചെന്നു…മൂത്രമായ തുണി പെട്ടെന്ന് മാറ്റി,ചെറുതായ് തുടച്ചു…

എന്നിട്ട് ചാരി ഇരുത്തി…. . ഇടയ്ക്ക് ചോറുണ്ണാൻ വന്നപ്പോൾ ഒരു ഗ്ലാസ് കഞ്ഞിവെള്ളം കൊടുത്തതാ. .

അല്ലേലും പണി തീരുന്നത് വരെ താൻ ഒഴികെ എല്ലാവരും പട്ടിണിയാ…സമയം കിട്ടില്ല, അമ്മയ്ക്കും മോൾക്കും കൂടി ചോറ് കൊടുക്കാൻ….

നന്ദു എന്തോ കഴിച്ചിട്ടുണ്ട് നീനയുടെ വീട്ടിൽ നിന്ന്… വയർ കണ്ടാലറിയാം….

ചോറിൽ കഞ്ഞി വെള്ളം ചേർത്ത്, ഇത്തിരി പുളിയിഞ്ചിയും ഫ്രിഡ്ജിൽ നിന്ന് എടുത്തൊഴിച്ചു ഗീതു അമ്മയുടെ അടുത്തിരുന്നു …

“അമ്മ ഒറ്റയ്ക്ക് കിടന്നു മടുത്തല്ലേ…. സാരമില്ലട്ടോ… നമ്മുടെ നന്ദൂട്ടി ഇത്തിരി കൂടി ആവട്ടെ.. അവള് നോക്കിക്കോളും അമ്മയെ…. ”

അമ്മയുടെ കണ്ണുകൾ മോൾടെ നേരെ തിരിഞ്ഞു… ഒന്നും മനസിലായില്ലേലും അമ്മയെ നോക്കി, കുഞ്ഞൊന്ന് ചിരിച്ചു….

തന്റെ രണ്ട് മക്കളുടെയും അവസ്ഥ കണ്ട് ശരീരവും മനസും മരവിച്ചു പോയൊരമ്മ ആണ് അവർ…… ജീവിതം മുഴുവൻ പൊരുതി നിന്നിട്ടും വിജയത്തിന് തൊട്ട് മുൻപ് പുറകിൽ നിന്ന് പ്രഹരമേറ്റു വീണൊരമ്മ ………

.ഓരോന്നും പറഞ്ഞു കൊണ്ട് അമ്മയെ കഴിപ്പിച്ചു വായും കഴുകിച്ചു കിടത്തി….. ഒന്ന് കിടന്നേച്ചാൽ മതിയാരുന്നു.. അത്ര വയ്യാതായി.. എന്നും ഇത് തന്നെ അല്ലേ…. ശീലമായെങ്കിലും വയ്യായ്ക മാറില്ലല്ലോ…

മുറിയിലേക്ക് ചെന്ന്, ഒരു പായ വിരിച്ചു മോളെയും കൊണ്ട് തറയിലേക്ക് കിടന്നു… അല്ലെങ്കിൽ മേത്തുള്ള അഴുക്കു മുഴുവൻ ബെഡ്‌ഡിലാവും……

പാൽ കുടിച്ചുകൊണ്ട്, തന്റെ മാറിൽ ഒരു കൈ വെച്ച് കിടക്കുന്ന മോളുടെ കവിളിൽ പതിയെ തലോടി….. നിറയെ ചിരിക്കുന്ന മണികളുള്ള മോളുടെ കൊലുസ്സിൽ ഒരു കൈ കൊണ്ട് തട്ടി മറുകൈ കൊണ്ട് മോളേ ചേർത്ത് പിടിച്ചു……

ഹോസ്പിറ്റലിൽ കിടക്കുമ്പോൾ തന്നെ പ്രതികളെ അറസ്റ്റ് ചെയ്ത കാര്യം അറിഞ്ഞിരുന്നു…. രണ്ടു പേര് മാത്രം… അത്രയും പേരാണോ ആകെ ഉണ്ടായിരുന്നത്….

അല്ലെന്ന് ഗീതുവിനുറപ്പായിരുന്നു….. പിന്നെ അതിലൊരുത്തന്റെ കയ്യിൽ സ്‌റ്റീലിന്റെ ഇടി വള ഉണ്ടായിരുന്നു…. ഇരുട്ടിൽ അത് തിളങ്ങുന്നത് ഇടയ്ക്കെപ്പോഴോ താൻ കണ്ടതാണ്..

പ്രതികളിൽ ആരുടെയും കയ്യിൽ അതുണ്ടായിരുന്നില്ല..പിന്നെ , അവർ അന്യ സംസ്ഥാന തൊഴിലാളികളും ആയിരുന്നു… കലർപ്പില്ലാതെ മലയാളം പറഞ്ഞവർ എങ്ങനെ…..????

പണം.. അതാണ്‌ ന്യായം തീരുമാനിക്കുക …. അവർ തന്നെ ആണ് അന്ന് വന്നതെന്നോ അല്ലെന്നോ അവൾ പറഞ്ഞില്ല…. എന്തിന്…. മുന്നേ എഴുതപ്പെട്ട കുറ്റപത്രത്തിൽ ഇനി കൂട്ടിച്ചേർക്കലുകൾ വേണമോ….. !

ഉറങ്ങിയ മോളേ കെട്ടിപ്പിടിച്ചു കൊണ്ട് അവളും ഒന്ന് മയങ്ങി… ഈ ക്ഷീണത്തിൽ എങ്കിലും അവൾ സമാധാനമായി ഉറങ്ങട്ടെ……

💔

തിരക്ക് പിടിച്ചു പണി തീർത്തിട്ട്, കുഞ്ഞു ഉണരുന്നതിനു മുന്നേ അമ്മയെയും കുളിപ്പിച്ചിട്ട് അകത്തേയ്ക്കുള്ള വെള്ളം കോരിക്കൊണ്ടിരിക്കുമ്പോൾ ആണ് വീണ്ടും ദീപന്റെ ബൈക്ക് മുറ്റത്തേക്ക് സ്പീഡിൽ വന്നു നിന്നത് ……

അകത്തേക്ക് ഒന്ന് തിരിഞ്ഞു നോക്കിക്കൊണ്ട് അവൾ വീണ്ടും തൊട്ടി കിണറ്റിലേക്ക് ഇട്ടു…

ഗീതു…

അവൻ വിളിക്കുന്നത് കേട്ടെങ്കിലും അവൾ നോക്കിയില്ല….

“””ഞാൻ…. ഞാൻ നിന്നെ കെട്ടാൻ റെഡിയാ ഗീതൂ….. ഞാൻ ചെയ്ത തെറ്റ് തിരുത്താം….””

കേൾക്കാത്ത ഭാവത്തിൽ നിൽക്കുന്ന ഗീതുവിനെ കണ്ടിട്ടവന് ദേഷ്യം വന്നു….

” ഗീതൂ ഞാൻ നിന്നോടാ പറയുന്നത് ”

ഒന്ന് ശ്രദ്ധിക്കുക കൂടി ചെയ്യാത്ത ഗീതുവിന്റെ കയ്യിൽ നിന്ന് കയർ ബലമായി വാങ്ങി, കിണറിന്റെ ഭിത്തിയിലേക്ക് ദീപൻ കെട്ടി…

അവളുടെ കയ്യിൽ പിടിച്ചു മുറ്റത്തേക്ക് അവൻ ഇറക്കി നിർത്തി, കൈ വിടാതെ തന്നെ വീണ്ടും ചോദിച്ചു ..

” തെറ്റ് തിരുത്തട്ടെ ഞാൻ….? എന്നാലെങ്കിലും എനിക്കെന്റെ മോളേ ഒന്ന് എടുക്കാൻ കിട്ടുമല്ലോ… ”

അവളെ തന്നെ നോക്കി പറയുന്ന ദീപനെ കണ്ടിട്ട് അവൾക്ക് ചിരി വന്നു… പുച്ഛച്ചിരി….

“നാളെ മറ്റുള്ളവന്മാർക്കും കുറ്റബോധം തോന്നിയാൽ……………. എന്താ ചെയ്യേണ്ടത്…. ഞാൻ അവരെയും കെട്ടണോ?.. !!!!!!..””

ഉത്തരം മുട്ടിയിട്ട് ദീപന്റെ തൊണ്ടക്കുഴിയിലൂടെ ഉമിനീര് താഴേക്കിറങ്ങി….

” എന്റെ ചോദ്യങ്ങൾക്ക് ഒന്നിനും ഉള്ള ഉത്തരം തന്റെ കയ്യിലില്ല…… പിന്നെന്തിനാടോ താൻ ഇങ്ങനെ ഇവിടെ കയറി ഇറങ്ങുന്നത്?….. ”

ഒന്നിനും കഴിയാതെ ദീപൻ ദീർഘശ്വാസമെടുത്തു……

” ദീപൻ ചെല്ല്….. വരുന്നവർക്കും പോകുന്നവർക്കും കൊടുക്കാൻ ഗീതുവിന്‌ കൊച്ചില്ല …. ആകെ ഒന്നേ ഉള്ളു …. ജീവിക്കുന്നത് തന്നെ എന്റെ കുട്ടിക്ക് വേണ്ടിയാ ഞാൻ…. അവളെ ചോദിച്ചാരും ഈ പടി കടക്കണ്ടാ…… ”

തിരിഞ്ഞു നടക്കാൻ തുടങ്ങിയ ഗീതുവിന്റെ കൈത്തണ്ടയിൽ അവൻ ഇറുകെ പിടിച്ചു…

” മോൾക്ക് ഒരു അച്ഛൻ വേണ്ടേ ഗീതൂ… അല്ലാതെ…… വലുതാവുമ്പോൾ അവൾ തന്നെ നിന്നെ ചോദ്യം ചെയ്യും … എന്തിനാ വെറുതെ…. ഇപ്പോഴും എനിക്ക് സമ്മതമാ ഗീതൂ……..”

അവന്റെ സംസാരം കേട്ടവൾ ചിരിച്ചു കൊണ്ട്, കൈ എടുത്തു മാറ്റി…

” ഞാൻ മോളെ ഗർഭിണി ആയിരുന്ന സമയത്തു ഹോസ്പിറ്റലിൽ ചെല്ലുംമ്പോ ചില ആൾക്കാര് ചോദിക്കുവായിരുന്നു, മോളേ ഭർത്താവ് വന്നില്ലേ കൂടെ എന്ന്….. ദിവ്യ ഗർഭം ആണെന്നൊന്നും പറയാൻ ഗീതു മെനക്കെട്ടിട്ടില്ല….. തല ഉയർത്തി തന്നെയാ ഞാൻ ഒരു ഗ്യാങ് റേപ്പ് വിക്‌ടിം ആണെന്ന് പറഞ്ഞത് ………

ഞാൻ എന്തിനാ നാണിക്കുന്നത്…. പരപുരുഷ സമ്പർക്കം കൊണ്ട് അവിഹിത ഗർഭം ധരിച്ചു ചെന്നതല്ല ഞാനവിടെ…. കാമുകന്റെ ദാനം കൊണ്ടോ ഒന്നുമല്ല….. ചിലരുടെ സംസ്കാരമില്ലായ്മയുടെ പരിണിത ഫലം അനുഭവിക്കുന്നവൾ മാത്രമാണ് … പിന്നെ ഞനെന്തിനു തല കുനിക്കണം?……

നീ ….. നിങ്ങൾ ….. നിങ്ങൾ മാത്രമാണ് തല താഴ്ത്തേണ്ടത്…. താഴ്ത്തുക തന്നെ വേണം…. ചവിട്ടി മെതിച്ചിട്ടും ആരെയും ആശ്രയിക്കാതെ നില്കുന്നവളുടെ മുന്നിൽ…….

പിന്നെ എന്റെ മോള് വലുതാകുമ്പോൾ…. അവൾക്ക് മനസിലാകുമെടോ എന്നെ.. … നല്ല അന്തസ്സുള്ള അമ്മയുടെ മകളാണ് എന്റെ നന്ദു….അവൾ കണ്ടു വളരുന്ന സ്ത്രൈണത എന്റെ അല്ലേ …. . അത് മാത്രം മതി അവൾക്ക്….അഭിമാനത്തോടെ അവൾ പറയും, എന്റെ അമ്മ തന്നെയാണ് ശരിയെന്ന്… … ”

കടുപ്പിച്ചു തന്നെ നോക്കിയിട്ട് പോകുന്ന ഗീതുവിനെ നോക്കികൊണ്ട് അവൻ പുഴയിറമ്പിലേക്ക് നടന്നു…..

സന്ധ്യ ആകാറായപ്പോഴേക്കും ഗീതു മോളെയും കൊണ്ട് ഓടിക്കിതച്ചു പുഴയിലേക്ക് വന്നു…

” അമ്മേടെ കുഞ്ഞിന്ന് നേരത്തെ ഉറങ്ങിയത് കൊണ്ട് എനിക്ക് പണി മുഴുവൻ കൂടിയല്ലോ നന്ദൂട്ടിയേ… ഇനി നിന്നെ ഞാൻ എങ്ങനെ കരയ്ക്കിരുത്തിയിട്ട് അലക്കി കുളിക്കും…..? !……അടങ്ങി ഇരിക്കുവോ നീ…. എവിടെ …… ”

എളിയിൽ ഇരിക്കുന്ന മോളോട് ഓരോന്ന് പറഞ്ഞുകൊണ്ട് പുഴയിലേക്കിറങ്ങുമ്പോൾ ആണ് നീനയെയും നിനിലിനെയും ഗീതു കണ്ടത്….

” ഇന്നെന്താ രണ്ടാളും പതിവില്ലാതെ പുഴയില്? ”

പുറകിൽ നിന്ന് ഗീതുവിന്റെ ശബ്ദം കേട്ട് നീന ഓടിച്ചാടി വന്നു മോളേ എടുത്തു…

“ഇച്ചേച്ചീ, അമ്മ പറഞ്ഞു അഴ പൊക്കി വെക്കാനുള്ള ഈറ്റക്കമ്പൊരെണ്ണം വെട്ടിക്കൊണ്ട് വരാൻ… അതാ…തീർന്നു….. പിന്നെ സൈഡിൽ മീനൊക്കെ പൊങ്ങുന്നത് നോക്കി നിന്നതാ ….. ”

അപ്പോഴേക്കും നിലത്തിട്ടിരുന്ന ഈറ്റ, നിനിൽ മോളിലേക്ക് കൊണ്ടിട്ടു… താഴേയ്ക്ക് വീണ്ടും വന്ന അവനെ കണ്ട് നന്ദൂട്ടി ചാടി…. നിനിൽ പെട്ടെന്ന് മോളേ വാരി എടുത്തു…

“എന്ത് പണിയാ കുഞ്ഞാറ്റേ ഈ കാണിച്ചത്… താഴെ വീഴില്ലായിരുന്നോ ഇപ്പൊ?…. ”

ദേഷ്യപ്പെടാതെ നിനിൽ പറഞ്ഞു….

” ഞാനും പേടിച്ചു പോയി ഇച്ചേച്ചിയേ… ”

ചങ്കിൽ കൈ വെച്ച് നിൽക്കുന്ന ഗീതുവിനോട് നീന പറഞ്ഞത് കേട്ട്, അവളൊന്നു ചിരിക്കാൻ ശ്രമിച്ചു,… വിറയോടെ……

” എങ്കിൽ പിന്നെ നീ ഇവിടെ നിന്ന് വേഗം അലക്കി കുളിക്ക് ഗീതൂ… ഞങ്ങൾ കലങ്ങേല് ഉണ്ടാവും…. ”

അവളുടെ മൗന സമ്മതത്തോടെ കുഞ്ഞിനേയും കൊണ്ട് അവർ കലുങ്കിന്റെ അടുത്തേക്ക് നടന്നു…..

ഒരിക്കൽകൂടി ഗീതുവിനോട് സംസാരിക്കാം എന്ന് വിചാരിച്ചു വീട്ടിൽ എത്തിയപ്പോൾ അവിടെ അവളില്ല ..

എങ്കിൽ പിന്നെ പുഴയിൽ നോക്കാം എന്ന് കരുതി, അങ്ങോട്ട് വന്ന ദീപൻ കണ്ടത് കലുങ്കിൽ ഒരു കാലിന്റെ മേൽ കാൽ വെച്ചിരിക്കുന്ന നിനിലിനെയും അവന്റെ തോളിൽ,

കഴുത്തിന്റെ ഇരു വശത്തും കൂടി അവന്റെ നെഞ്ചിലേക്ക് കാലിട്ടിരുന്നു തുള്ളിത്തുള്ളി ചിരിക്കുന്ന നന്ദൂട്ടിയെയുമാണ്… മോളെ നീന പുറകിൽ നിന്ന് താങ്ങിയിട്ടുമുണ്ട്‌…..

കണ്മുന്നിലെ ദൃശ്യം ദീപന്റെ കണ്ണുകളെ ചുവപ്പിച്ചു… കവിളുകൾ വിറച്ചു…..

“എന്റെ മോള്….. ”

അവന്റെ ഹൃദയം ശക്തമായി മിടിച്ചുകൊണ്ടിരുന്നു..

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4