💔 മൊഴിയിടറാതെ 💔 : ഭാഗം 4

നോവൽ
എഴുത്തുകാരി: തമസാ

Thank you for reading this post, don't forget to subscribe!

---

നന്ദൂട്ടിയെ ഒക്കത്തു വെച്ച്, ഗീതു അടുക്കളയിലേക്ക് ചെന്നു….. അലുമിനിയം കലത്തിന്റെ അടപ്പ് പൊക്കി നോക്കിയതേ കണ്ടു, ചോറിന്റെ വേവ് കൂടിപ്പോയിട്ട് ചുവപ്പും വെള്ളയും നിറത്തിൽ ചൊറരഞ്ഞു കലത്തിന്റെ വക്കിലൂടെ പറ്റിപ്പിടിച്ചിരിക്കുന്നത്…

നന്ദു താഴെ ഇരിക്കാവോ, അമ്മ ചോറ് വാർക്കട്ടെ…….

മോളെ ഊർത്തി അടുപ്പിന്റെ അടുത്ത് നിന്ന് ഇത്തിരി മാറി മോളെ ഇരുത്തി… ഒരു സ്പൂണും കുഞ്ഞ് പാത്രവും ഒന്ന് കൊട്ടിയിട്ട് അവളുടെ കൈകളിലേക്ക് വെച്ച് കൊടുത്തു….

ഇത്തിരി പച്ചവെള്ളം കൂടി ഒഴിച്ചിളക്കിയിട്ട് ചോറ് വാർത്തു വെച്ചിട്ട്, പിടിച്ചിരുന്ന തുണി അതിന് മേലേക്ക് വിരിച്ചിട്ടു….

ഇപ്പുറത്തെ അടുപ്പത്തു വെച്ച വെള്ളം വെട്ടിത്തിളയ്ക്കുന്നുണ്ട്…. കുളിക്കാനുള്ളതാ…. മോൾക്കും അമ്മയ്ക്കും….. മോളെണീക്കുന്നതിനു മുന്നേ ഗീതു കുളിക്കും… എണീറ്റാൽ പിന്നെ ആരുടെ അടുത്ത് നോക്കാൻ ഏല്പിച്ചിട്ട് പോകാനാണ്……

പഴയൊരു ബേബി വോക്കറിലേക്ക് മോളെ പിടിച്ചിരുത്തി, അമ്മയുടെ റൂമിലേക്ക് ഇരുത്തി…. അവൾക്ക് ഇഷ്ടമൊന്നും അല്ല…. ഒരു വയസ് ആയില്ലേ… ഇപ്പൊ വലിയ ചേച്ചിയാ…. ഇതിലൊന്നും ഇരിക്കില്ല… പക്ഷേ അമ്മയെ കുളിപ്പിച്ചു തീരുന്ന നേരം വരെ വലിയ കുഴപ്പമില്ലാതെ ഇരുന്നോളും………

കലത്തിൽ നിന്ന് വെള്ളം കപ്പിന് കോരി ബക്കറ്റിലേക്ക് ഒഴിച്ച്, അതിന് മേലെ തണുത്ത വെള്ളവും നിറച്ചിട്ട് അവൾ മുറിയിലേക്ക് ചെന്നു….

അമ്മയെ കുളിപ്പിക്കാൻ ചെന്നാൽ ആകെ സങ്കടം ആണ്…. പണ്ട് ഏട്ടൻ ഉണ്ടായിരുന്നപ്പോൾ വണ്ണം വെച്ച് മെഴുത്തിരുന്ന അമ്മയാണ്…. ഇപ്പോൾ കൈക്കുഴി ഒക്കെ കാണണം… കണ്ണ് നിറയും….. ഏട്ടന്റെ മരണം അമ്മയെ വല്ലാതെ തളർത്തിയിരുന്നു…. അതിന്റെ കൂടെ, തന്റെ അവസ്ഥ കൂടി കണ്ടപ്പോൾ അമ്മ പതിയെ അവശയായി… പിന്നെ തീർത്തും മിണ്ടാട്ടമില്ലാതെ കിടപ്പായി….

ഒരു കൈയ്യാൽ അമ്മയെ പിടിച്ചു,മറ്റേ കൈ പുറം കൊണ്ട് ഗീതു കണ്ണുനീർ തുടച്ചു….

” നന്ദൂട്ടീ …. അമ്മമ്മേനെ വിളിച്ചേ….. ”

തന്റെ ചിന്തകളെ മാറ്റാനായി ഗീതു മോളെ വിളിച്ചു കൊണ്ടിരുന്നു….

” മ് മ്മാ…… ”

അതിൽ കൂടുതൽ ഒന്നും പറയാൻ മോൾക്ക് പറ്റില്ല ……

നിലത്തേക്ക് കിടന്ന അമ്മയുടെ തുണി വാരി എടുത്ത് ഗീതു, പിന്നാമ്പുറത്തെ തുണി ബക്കറ്റിൽ ഇട്ടു…. വൈകിട്ട് അലക്കാം…..

ബേസിനിൽ വെള്ളം എടുത്തു തണുപ്പിച്ചിട്ട്, നന്ദുവിനെ എടുത്തുകൊണ്ടു വന്നു…..

” നന്ദൂസേ…. നമ്മക്ക് കുളിക്കണ്ടേ…… ”

വെള്ളം കണ്ടതേ നന്ദു ഓടാൻ കുതിച്ചു…. എന്നും ഇതേ അങ്കം തന്നെ ആയത് കൊണ്ട് ഓടുന്നതിനു മുന്നേ ഗീതു അവളേ പിടിച്ചു തറയിലേക്ക് ഇരുത്തി……

” നന്ദൂ…. ഒന്നാമതെ അമ്മയ്ക്ക് സമയം ഇല്ല ഇന്ന്… ഓരോ കാലന്മാര് കാരണം വൈകി…. അതിനിടയിൽ മോള് കൂടി അമ്മയെ ചുറ്റിക്കരുത്…. ”

ഗീതു ദേഷ്യത്തിൽ ആണെന്ന് മനസിലായപ്പോൾ മോള് മുഖം കുനിച്ചു നിന്ന് കൊടുത്തു…..

വേഗം മോളെ കുളിപ്പിച്ച് കയറ്റി, തല തോർത്തിക്കൊണ്ട് മുറിയിലെത്തി സമയം നോക്കിയപ്പോൾ ഏഴേ മുക്കാൽ കഴിഞ്ഞു…… പിന്നേ അവിടെ ഒരു മരണവെപ്രാളം ആയിരുന്നു…

8 മണിക്ക് ആയിരുന്നു പണിക്ക് ഇറങ്ങേണ്ടത്….. എന്നിട്ട് 2 മണിക്ക് നിർത്തും….. അതായിരുന്നു പതിവ്…..

പിന്നെ, രണ്ടരയ്ക്ക് അങ്ങേ റോഡിലൂടെ ഒരു ബസ് പോവും….. ആകെ ഒരു ബസ് ഉള്ളു ആ വഴിക്ക്…

നിർമാല്യം….

രാവിലെ ഏഴരയ്ക്ക്…… പതിനൊന്നു മണിയ്ക്ക്….. പിന്നെ രണ്ടരയ്ക്കും രാത്രി ഏഴു മണിയ്ക്കും…… ഒരു ദിവസം പോലും ആ ബസ് ഇല്ലാതെ വന്നത് അടുത്തിടയ്ക്കുള്ള ഓർമയിലൊന്നും ഇല്ല…. കറക്റ്റ് സമയത്ത് വരികയും ചെയ്യും…. അതിന്റെ ഹോൺ വീട് വരെ കേൾക്കാം….

അങ്ങനെ ആണ് കുര്യാച്ചൻ പറഞ്ഞത്, രാവിലെ എട്ടരയ്ക്ക് എല്ലാരും പണിക്കിറങ്ങിയാൽ, രണ്ടരയ്ക്ക് നിർമാല്യത്തിന് ഹോൺ കേൾക്കുമ്പോൾ നിർത്താമല്ലോ എന്ന്…. സ്കൂളിൽ പോകുന്ന കുട്ടികളൊക്കെ ഉള്ളവരായത് കൊണ്ട് എല്ലാവർക്കും സമ്മതം ആയിരുന്നു…. അതുപോലെ, ഉച്ചയ്ക്ക് ചോറുണ്ണാൻ വരുന്നതും അങ്ങനെ ആണ്… 11 മണിക്ക്…

മോളെ വേഗം ഒരുക്കി, നിക്കറു മാത്രം ഇട്ട് കൊടുത്തു… അല്ലേൽ പോകാറാവുമ്പോഴേക്കും പുഞ്ചപ്പാടത്തു പോയത് പോലെ ആക്കും ഉടുപ്പ്…..

” എന്റയ്യപ്പാ…. സമയം എട്ടായി….. ഇനി എപ്പോ ഇറങ്ങാനാ ഞാൻ….. ”

അടുക്കളയിലേക്ക് ഓടി വന്നു ഗീതു പയറിന്റെ പാത്രം എടുത്തു….

” അല്ലേൽ വേണ്ട…. ഇനി ഇതെപ്പോ വെന്തിട്ടു പോകാനാ ഞാൻ…. ”

അത് അവിടെ തന്നെ ഇട്ടിട്ടു രണ്ട് സവാള എടുത്തു കുരു കുരാന്ന് വേഗം അരിഞ്ഞു ….. അതിന് മേലേക്ക് രണ്ട് പച്ചമുളകും കീറി ഇട്ട്, വേഗം കടുക് പൊട്ടിച്ചു ലേശം മഞ്ഞൾപ്പൊടിയും മുളകുപൊടിയും ചേർത്ത് ഉലർത്തി…… അടുപ്പ് തറയിലെ മുറി തേങ്ങ എടുത്ത് വേഗം ചിരണ്ടി അതിന് മേലേക്ക് ഇട്ട് വേഗം വഴറ്റി…

തേങ്ങ ചൂടാവുന്ന നേരം കൊണ്ട് കലം നിവർത്തി രണ്ട് തവി ചോറ് ഒരു പാത്രത്തിലേക്ക് ഇട്ട്, അതിലേക്ക് കഞ്ഞി വെള്ളം കോരി ഒഴിച്ചും…. ഉപ്പും അടുപ്പത്തിരിക്കുന്ന സവാള ഉലർത്തും കഞ്ഞിയിലേക്കിട്ട്, സ്റ്റവ് നിർത്തി, ഒരു സ്പൂണും എടുത്ത് അമ്മയുടെ അടുത്തേക്ക് നടന്നു…

” നന്ദൂട്ടി വേഗം വായോ… ”

കഞ്ഞി ഇളക്കി കൊണ്ട് ഗീതു വിളിച്ചു…..

അമ്മയെ പതിയെ ചാരി ഇരുത്തി, കസേരയിട്ട് നന്ദുവിനെയും മടിയിലിരുത്തി അവളിരുന്നു….

സ്റ്റൂളിലേക്ക് വെച്ച പാത്രത്തിൽ നിന്ന് ഓരോ സ്പൂണായി ആറ്റി കഞ്ഞി, മോൾക്കും അമ്മയ്ക്കും ഗീതു മാറി മാറി കൊടുത്തു…….. രണ്ടുപേരുടെയും വയർ നിറച്ചിട്ട്, വായും കഴുകിച്ചു ബാക്കി വന്ന കഞ്ഞി ധൃതിയിൽ ഗീതു കഴിച്ചു……

മോളുടെ കണ്ണെഴുതിച്ചു പൊട്ടും കുത്തി, തന്റെയും മോളെ ഉടുപ്പും മാറ്റിച്ച്, മോളെ കിടത്താനുള്ള വിരിയും എടുത്തു ഗീതു വേഗം ഇറങ്ങി…… വാതിൽ പൂട്ടി, സഞ്ചിയും മോളെയും ഓരോ കയ്യിലെടുത്തു പാടത്തേക്കോടി……..പാടത്തു പെണ്ണുങ്ങളൊക്കെ വന്നു കഴിഞ്ഞിരുന്നു…. ഒരു തടത്തിന്റെ അടുത്ത് കുര്യാച്ചനും നിക്കുന്നുണ്ട്…..

പടവലത്തിനാണ് ഇന്ന് പണി…. വള്ളികൾ കയറിലേക്ക് കേറ്റി വിടണം….. മോളാണെങ്കിൽ ഈ രാവിലെ തന്നെ എന്തായാലും ഉറങ്ങില്ല…. ചെത്തിമിനുക്കി ഇട്ടിരിക്കുന്ന ഒരു തടത്തിനടുത്തായി, മഴയത്തിടുന്ന കനം കുറഞ്ഞ ചൂടി വിരിച്ചിട്ടതിനു മുകളിൽ മോളെ ഇരുത്തി……

നിവർന്നു മുകളിലേക്ക് നോക്കിയപ്പോൾ നെഞ്ച് നീറി….. ഇവിടിരുന്നു വെയിലേറ്റ് വാടിയാണ് മിക്കവാറും ദിവസങ്ങളിൽ മോളുറങ്ങാറ്…..

വെളുത്ത ഊത്തക്കവിളുകൾ വെയിലേറ്റ് ചുവക്കും ….. കണ്ണ് ക്ഷീണം കൊണ്ട് പതിയെ അടയും……അവിടെ തന്നെ കിടന്നു മയങ്ങും…… നെഞ്ച് വെന്ത് ഒഴുകുന്ന പോലെയാ അത് കാണുമ്പോൾ…….

നിറഞ്ഞു വന്ന കണ്ണുനീർ ചിമ്മി ചിമ്മി, പോളകൾക്കുള്ളിൽ തന്നെ ഗീതു ഒളിപ്പിച്ചു…….. മടിയിൽ നിന്ന് ജീരക മിട്ടായി കിട്ടുന്ന താറാവിന്റെ കാലി ടിൻ കയ്യിലേക്ക് വെച്ചു കൊടുത്തു ….. കൂടെ ഒരു കിലുക്കിയും……

അവരുടെ അടുത്തേക്ക് ചെന്ന് ഒന്ന് ചിരിച്ചിട്ട് അവരുടെ കൂടെ ഗീതു പണിയാൻ തുടങ്ങി….

ഇടയ്ക്ക് മയങ്ങിപ്പോയ കുഞ്ഞിനെ ഗീതു, മോട്ടോർ പുരയിൽ കൊണ്ട് കിടത്തി…. വാതിൽ തുറന്നിട്ടു…. മോള് കരഞ്ഞാൽ അറിയില്ല അല്ലേൽ…..

💓

ഗീതുവിന്റെ വീടിന്റെ മുറ്റത്തേക്ക് ബൈക്ക് നിർത്തി, ദീപൻ ഇറങ്ങി….. കോളിംഗ് ബെൽ അമർത്തിയെങ്കിലും ആരും വരാത്തത് കൊണ്ട് ഗീതുവിനെ അവൻ കുറേ വിളിച്ചു….. വിളിച്ചു മടുത്തിട്ട് ഇറയത്തു തന്നെ അവൻ ഇരുന്നു….. അവളേ കണ്ടിട്ടേ പോകുള്ളൂ എന്ന് തീരുമാനിച്ചുറപ്പിച്ച പോലെ……..

ഉറങ്ങിയ കുഞ്ഞിനേയും തോളിലിട്ട്, വഴി തിരിഞ്ഞു കേറി വന്നതേ ഗീതു കണ്ടു, തന്റെ ഇറയത്ത്, ഒരു കാൽ മടക്കി, മറ്റേ കാൽ തൂക്കിയിട്ട് വഴിയിലേക്ക് നോക്കി ഇരിക്കുന്ന ദീപനെ……. മുഖത്തേക്ക് കലി വ്യാപിച്ചു….. അവനെ നോക്കാതെ വാതിൽ തുറക്കാൻ തുടങ്ങിയ അവളേ അവൻ വിളിച്ചു….

” ഗീതൂ …. ഞാൻ തന്നോട് ഒരു കാര്യം പറയാനാ വന്നത്, കേട്ടിട്ട് പോ ”

എന്നിട്ടും വക വെയ്ക്കാതെ വാതിലടയ്ക്കാൻ പോയപ്പോൾ, വാതിലിനു നടുവിൽ കൈ വെച്ച് ദീപൻ അവളേ തടഞ്ഞു…..

” പോകുന്ന വഴിക്ക് പലയിടത്തും ഞാൻ പല തെരുവ് നായ്ക്കളെയും ഞാൻ കാണാറുണ്ട്… അവരെന്തെടുക്കുന്നു, എന്താ നോക്കുന്നത് എന്നൊന്നും ഞാൻ അന്വേഷിക്കാൻ മിനക്കെടാറില്ല… ആട്ടിയോടിച്ചാലും ചിലത് ഇങ്ങനെ പുറകെ കൂടും…. തെണ്ടി ശീലിച്ചു പോയി… തിരുത്താൻ പറ്റില്ലല്ലോ.. ”

തറപ്പിച്ചുള്ള നോട്ടം കൊണ്ട് അവനെ നോക്കിയിട്ട് അവൾ പതിയെ പറഞ്ഞു….

💔

” നീയെന്നെ എന്താന്ന് വെച്ചാൽ വിളിച്ചോ ഗീതൂ… ആദ്യം….. അന്നേരം എനിക്ക്…. പെട്ടെന്ന് ഒരു ദേഷ്യത്തിൽ പറഞ്ഞതാ ഞാൻ….. അല്ലാതെ…. ഛെ….. ഞാൻ മനസ്സിൽ കൂടി ചിന്തിച്ചിട്ടില്ല ഒരിക്കൽ കൂടി നിന്നെ അങ്ങനെ…… എന്നെ ഒന്ന് കേൾക്കു നീ… ”

ശ്……. പതുക്കെ…. എന്റെ കുഞ്ഞുറങ്ങുവാ…. എണീപ്പിക്കരുത്….. താൻ ഇവിടെ ഇരുന്നു പറഞ്ഞോ… എനിക്ക് പണിക്കിറങ്ങണം…. വല്ലതും തിന്നിട്ട് പോണം….. ”

അവന്റെ മുഖത്തിന്‌ നേരെ വാതിൽ കൊട്ടിയടച്ചവൾ അകത്തേക്ക് പോയി….

മോളെ കട്ടിലിലേക്ക് കിടത്തിയതേ മോളെഴുന്നേറ്റു കരഞ്ഞു…. വിശക്കുന്നുണ്ടാവും… രാവിലെ എണീറ്റപ്പോൾ പാല് കുടിച്ചതാ….

മോളെ എളിയിൽ വെച്ചിട്ട് അടുക്കളയിൽ പോയി വേഗം ചോറെടുത്തു പ്ളേറ്റിലാക്കി ഗീതു ഉണ്ണാനിരുന്നു…. അതിനൊപ്പം തന്നെ മോളെ പാലൂട്ടി……

പലദിവസങ്ങളും ഇങ്ങനെയാണ്….. തന്റെ അവസ്ഥ അറിഞ്ഞു സഹായിക്കുന്നവരെ മെനക്കെടുത്തരുതല്ലോ… അതാണ്‌ പണി സമയത്ത് കറക്റ്റ് ആയി ഓടിച്ചെല്ലുന്നത്….

പ്ലസ് ടു വെച്ച് എവിടെ എങ്കിലും ജോലിക്ക് കേറാം എന്ന് എല്ലാരും പറഞ്ഞതാ… പക്ഷേ ഇത്തിരി ഇല്ലാത്ത പൊടിക്കുഞ്ഞിനെ എന്ത് ചെയ്യും…

വൈകിട്ട് വരെ പണിയും ചെയ്യണം…. ഏട്ടൻ സമ്പാദിച്ചത് മുഴുവനും തീർന്നതിനു ശേഷമാണ് ഗീതു അധ്വാനിക്കാൻ തുടങ്ങിയത്….. അതിനുള്ള ആരോഗ്യം ഉണ്ടായിട്ടല്ല ഇറങ്ങിയത് … പട്ടിണി കിടത്തി അമ്മയെ കൊല്ലാൻ വയ്യാത്തത് കൊണ്ട് മാത്രമാ….

കഴിച്ചിട്ട്, അമ്മയെ ഒന്ന് നോക്കി ഗീതു മോളെയും കൊണ്ട് പുറത്തിറങ്ങിയപ്പോഴും ദീപൻ അതുപോലെ തന്നെ മുറ്റത്തുണ്ടായിരുന്നു……

അയാളെ ഒന്ന് സൂക്ഷിച്ചു നോക്കിയിട്ട്, വാതിലടച്ചു പുറത്തേക്കിറങ്ങിയ ഗീതുവിനെ പുറകിൽ നിന്ന് വലിച്ചു നിർത്തിയിട്ട് നന്ദൂട്ടിയെ അവളുടെ കയ്യിൽ നിന്നും ദീപൻ ബലം പ്രയോഗിച്ചു വാങ്ങി….

അപ്രതീക്ഷിത ആക്രമണം ആയിരുന്നത് കൊണ്ട് ഗീതു കിലുകിലാ വിറച്ചു….. പക്ഷേ ധൈര്യം സംഭരിച്ചു കൊണ്ട് ദീപന്റെ കവിളിൽ ഗീതു വലിച്ചടിച്ചു…….

” എന്റെ മോളെ, എന്റെ സമ്മതമില്ലാതെ എടുക്കാൻ നീയാരാടാ? ”

അവന്റെ നേരെ ചീറ്റിക്കൊണ്ട് ഗീതു, മോളെ എടുക്കാൻ ശ്രമിച്ചു…

” ഗീതൂ….. ഒരിക്കൽ നീ വേണ്ടെന്ന് പറഞ്ഞ കുഞ്ഞല്ലേ ഇത്…. കൊന്ന് കളഞ്ഞേക്കാൻ പറഞ്ഞതല്ലേ വയറ്റിലിട്ടു തന്നെ…. പിന്നെ എന്തിനാ ഈ കുഞ്ഞിന്റെ പേരിൽ നീ ഇത്ര വാശി പിടിക്കുന്നത്….ഒന്ന് കണ്ടിട്ട്, ഒരുമ്മ കൊടുത്തിട്ട് മടക്കി തന്നോളും ഞാൻ ”

താൻ എടുക്കാൻ വേണ്ടി ദീപന്റെ കയ്യിലിരുന്നു കൂവി കരഞ്ഞു കൊണ്ട് പിടയ്ക്കുന്ന മോളെ നോക്കി നിൽക്കെ ഗീതുവിന്റെ കണ്ണ് നിറഞ്ഞൊഴുകി…… കൊന്നു കളഞ്ഞേക്കാൻ പറഞ്ഞതാ ….. പക്ഷേ…… മോളുടെ മുഖത്തേക്ക് നോക്കി ഗീതു ഒന്ന് ഏങ്ങി……

” കൊല്ലാൻ പറഞ്ഞതാ ഞാൻ…. കാണണ്ടെന്ന് പറഞ്ഞതാ ഞാൻ ഈ മുഖം…. പക്ഷേ…… അതിനു പകരം എന്റെ മോൾക്ക് വേണ്ടി ആയുസ്സിന്റെ മുഴുവൻ വേദനയും തിന്നവളാ ഞാൻ…. വിശന്നു പൊരിഞ്ഞപോഴും എന്റെ ജീവനൂറ്റിക്കൊടുത്തിത്ര വരെ ആക്കിയതാ ഞാൻ…..

ആ എനിക്ക് അല്ലാതെ മറ്റാർക്കാ എന്റെ മോൾടെ കാര്യത്തിൽ വാശി പിടിക്കാൻ അർഹത….. നിനക്കോ?…. അതോ നിന്റെ കൂട്ടുകാർക്കോ? ……

എന്റെ മോളുടെ രോമത്തിൽ പോലും ഉറപ്പിച്ചോരാവകാശം പറയാൻ ഞാൻ അല്ലാതെ മറ്റാർക്കെങ്കിലും പറ്റുമോ…. പറ്റും എന്ന് നിനക്കുറപ്പുണ്ടെങ്കിൽ നമുക്ക് വീണ്ടും കാണാം….. ”

അവളേ നോക്കി നിന്നു, തല കുനിച്ച അവന്റെ കയ്യിൽ നിന്ന് മോളെ വാരിയെടുത്ത് തോളിൽ തട്ടിക്കൊണ്ടു ഗീതു തോട്ടത്തിലേക്ക് നടന്നു..

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3