💔 മൊഴിയിടറാതെ 💔 : ഭാഗം 11

നോവൽ
എഴുത്തുകാരി: തമസാ

---

ദീപൻ ഒരു കുപ്പി പനങ്കള്ള്, ഒറ്റയിറക്കിൽ കുടിച്ചിട്ട്, ഷാപ്പിന്റെ പിന്നാമ്പുറം വഴി, ഇറങ്ങി ശ്വാസം വായിലൂടെ ശക്തിയിൽ പുറത്തേയ്ക്ക് ചീറ്റുമ്പോഴാണ് ദേവസ്സി വക്കീലിനെ കാണുന്നത്…. വർഷങ്ങളായി ശേഷാദ്രി പൈയ്യുടെ കേസുകൾ നോക്കുന്നത് ദേവസ്സി ആണ്…. അയാൾക്ക് മുഖം കൊടുക്കരുതെന്ന് ആഗ്രഹിച്ചെങ്കിലും തന്നെ കണ്ടെന്നുറപ്പുള്ളപ്പോൾ മാറി നിന്ന് സംശയം ഉണ്ടാക്കാൻ അവൻ ശ്രമിച്ചില്ല…… പെട്ടെന്ന് മുഖത്തു സന്തോഷം ആണെന്ന് ഭാവിച്ചു കൊണ്ട് വക്കീലിന്റെ കാറിനടുത്തേക്ക് ചെന്നു……

” വക്കീൽ സാറെന്താ ഷാപ്പില്? ”

ഇടത്തേ പുറം കൈ കൊണ്ട് ചുണ്ട് തുടച്ചവൻ ചിരിച്ചു……

” ആഹ്… ദീപനോ….. എന്നാ ഇങ്ങോട്ടെത്തിയത്…… ”

കടുപ്പം നിറഞ്ഞ മുഖത്തോടെയാണ് അയാൾ ചോദിച്ചത്….

” കുറച്ച് ദിവസോക്കെ ആയേ ഒള്ളു സാറേ……പൈ അദ്ദേഹത്തെ ഒന്ന് കാണാംന്ന് കരുതി ഇറങ്ങിയതാ ….. എങ്കിൽ പിന്നെ ഒരു കുപ്പി കുടിച്ചേച്ചും ആവാംന്ന് കരുതി “..

അപ്പോൾ മനസ്സിൽ വന്ന കള്ളം ദീപൻ പറഞ്ഞു…… ദേവസ്സി വിശ്വസിച്ചിട്ടില്ല അതെന്ന് മുഖം കണ്ടാൽ അറിയാം….. പക്ഷെ എനിക്കിങ്ങനെ പറഞ്ഞേ ഒക്കുള്ളു സാറേ……. അല്ലേൽ ആരെയും അറിയിക്കാതെ എന്റെ കൊച്ചിനെ കാണാൻ ഞാൻ വന്നതിനു പുറകിലെ വേരും നാരും ചികഞ്ഞു നിങ്ങളിറങ്ങും….. അതുകൊണ്ടു മാത്രമാ ഞാനീ കള്ളം പറയുന്നത്…..

വിശ്വാസമാകാത്ത പോലെ അയാൾ ദീപനെ പുരികം ഉയർത്തി അടിമുടി നോക്കി…… മുഖത്തൊരു മാറ്റവും വരുത്താതെ ദീപൻ നിന്നു…..

” ഇന്നെന്തായാലും ചെന്നിട്ട് കാര്യമില്ല….. ശേഷാദ്രി, ഡെല്ലി വരെ പോയിരിക്കുവാ….. രണ്ട് ദിവസം കഴിഞ്ഞു നോക്ക് ”

“ആ….. എന്നാ അങ്ങനെ ആയിക്കോട്ടെ സാറേ….. ഇത്തിരി തെരക്കിലാ…….. ”

ബൈക്ക് എടുത്തു മുന്നോട്ട് പോകുന്നതിനിടയിൽ അവൻ ദേവസ്സിയെ കണ്ണാടിയിൽ കൂടി നോക്കിയിട്ട് മുന്നോട്ട് പോയി…..

വഴിയിൽ നിന്ന് ദീപൻ മായുന്നവരെ നോക്കി നിന്നിട്ട് ദേവസ്സി ഫോൺ എടുത്തു….

” ശേഷാ…….. നീയിപ്പോ ഫ്രീ ആണോ? ”

💔

വാടക വീട്ടിൽ നിന്നും പത്തിരുപതു കിലോമീറ്റർ ബൈക്കോടിച്ചു കൊച്ചിയിലെ സാഗറിന്റെ ഫ്ലാറ്റിൽ എത്തിയപ്പോഴേക്കും ദീപൻ തളർന്നിരുന്നു……

“അവരൊക്കെ ഇവിടെ ഉണ്ടോ ഡാ? ”

വാതിൽ തുറന്നെത്തിയ സാഗറിനെ കണ്ടപ്പോൾ തന്നെ ദീപൻ ചോദിച്ചു….

” ഏയ്‌ ഇല്ല ഡാ…. ധൈര്യായി കേറിപ്പോര്….. പെങ്ങള് ഇന്നാ പെറ്റെണീപ്പിച്ചു വിട്ടതിൽ പിന്നെ ഇങ്ങോട്ട് ഒന്ന് വരാംന്ന് പറഞ്ഞത് … അമ്മ വിളിച്ചോണ്ട് വരാൻ പോയേക്കുവാ……. ”

ഒന്ന് കിടന്നാൽ മതിയെന്ന് തോന്നി….. ബൈക്ക് യാത്രകൾ കുറവാണ്…… കുറെ നാളായി ഇങ്ങനെ വണ്ടി ഓടിച്ചിട്ട്…… അതാവും നടുവൊക്കെ തുളഞ്ഞേതോ മിന്നൽ കേറുന്ന പോലെ നോവുന്നു…..

നേരെ സാഗറിന്റെ മുറിയിലേക്ക് കയറി, കട്ടിലിലേക്ക് ദീപൻ കിടന്നു …… പരാതി പരിഭവങ്ങൾ ഇല്ലാതെ ഒരുപാട് കാലം കൂട്ടുകൂടി നടന്നവരാണ്…… പരിചയം തുടങ്ങിയത് ഒരു തവണ അടിയുണ്ടാക്കി കയ്യിൽ കത്തി കൊണ്ടപ്പോഴാണ്……. സാഗർ നേഴ്സ് ആണ്…… അവിടെ തുടങ്ങിയ ബന്ധമാണ്….. പക്ഷെ വീട്ടിൽ ആരുമില്ലാത്തപ്പോൾ മാത്രമേ ദീപൻ ചെല്ലാറുള്ളു…. അല്ലാത്തപ്പോൾ പുറത്തു വെച്ചുള്ള സ്നേഹം ആണ്….

കട്ടിലിൽ കിടന്നൊന്ന് ഞെളിപിരി കൊണ്ട് തിരിഞ്ഞപോഴേക്കും ഒരു കുപ്പി തണുത്ത വെള്ളവുമായി സാഗറെത്തി……. വെള്ളം വാങ്ങിക്കുടിച്ചു കൊണ്ട് നോട്ടം നേരെ പോയത് ചുവരിലെ ചിത്രത്തിലേക്കാണ്….. ഒരു ആൺകുഞ്ഞിന്റെ ചിത്രമായിരുന്നു….. മൂന്ന് മാസം പ്രായം കാണും….. അതിലേക്ക് ആകാംഷയോടെ ദീപൻ നോക്കുന്നത് സാഗറും കണ്ടു…….

” പെങ്ങൾക്ക് മോനാ ഡാ….. ഇന്നെത്തും ആള്….. പിന്നെ ഇവിടെ ബഹളാവും…. ”

ദീപൻ ചോദിക്കുന്നതിനു മുന്നേ അവൻ പറഞ്ഞു….

” എന്തെന്നാ വിളിക്കുന്നത്? “….

” ദിഗ്‌വിജയ്,…. അളിയനിട്ടതാ…… ഇവിടെയൊക്കെ തക്കുടൂന്നാ വിളിക്കുന്നെ ”

ദീപൻ ആ കുഞ്ഞിനെ കണ്ണ് ചിമ്മാതെ നോക്കിയിരുന്നു…… ഗോപിപ്പൊട്ട് കുത്തിയ ഒരു കുഞ്ഞൻ…

” ഡാ, എനിക്കൊരു മോളുണ്ട്…… ”

കുഞ്ഞിനെ നോക്കിക്കൊണ്ടാണ് പറഞ്ഞതെങ്കിലും സാഗർ ഞെട്ടിയെന്നു ദീപന് മനസിലായി…..

“സാഗർ… എനിക്കൊരു കുഞ്ഞുണ്ട്….. എങ്ങനെ…. എപ്പോ…. എന്നൊന്നും എന്നോട് ചോദിക്കല്ലേ പ്ലീസ്…… ഞാൻ നിന്റെ ഒരു സഹായത്തിനാ വന്നത്? ”

പറഞ്ഞതൊന്നും മനസിലായില്ലെങ്കിലും ദീപനെ കേട്ടിരുന്നു അവൻ…..

” എനിക്ക് എന്റെ കുഞ്ഞിന്റെ ഡി എൻ എ ടെസ്റ്റ്‌ നടത്തിയാൽ കൊള്ളാമെന്നുണ്ട്….. എന്റെ ആണോന്ന് സംശയിച്ചിട്ടല്ല….. എന്റെ ആണെന്ന് ഉറക്കെ വിളിച്ചു പറയാൻ….. അതിനെനിക്കൊരു വാലിഡ്‌ തെളിവ് വേണം……. അതിനെ കുറിച്ചറിയാനാ ഇങ്ങോട്ട് വരട്ടേന്ന് നിന്നെ വിളിച്ചു ഞാൻ ചോദിച്ചത് …….. ”

കുഞ്ഞെന്നൊക്കെ പറഞ്ഞപ്പോൾ ആദ്യം തമാശയായി കേട്ടതാണെങ്കിലും സീരിയസ്നെസ് മനസിലായപ്പോൾ സാഗർ, ദീപന്റെ അടുത്തേക്ക് വന്നിരുന്നു ….. അവന്റെ കയ്യിൽ നിന്ന് കുപ്പി മേശപ്പുറത്തേക്ക് വെച്ചു……

” ആരാ ദീപാ ആള്? ”

അവന്റെ ചുമലിൽ കൈ വെച്ചു കൊണ്ട് സാഗർ ചോദിച്ചു……

മറ്റൊന്നും ചോദിക്കുന്നതിനു മുന്നേ ദീപൻ അവന്റെ തോളിലേക്ക് ചാഞ്ഞു പൊട്ടിക്കരഞ്ഞു ……

” എനിക്കൊരു തെറ്റ് പറ്റിപ്പോയി ഡാ…..അവൾക്ക് ഞാൻ ഒരു ശിക്ഷ മേടിച്ചു കൊടുത്തു……. ഒരു കുഞ്ഞുവാവയെ കൊടുത്തു …… എന്ത് രസാന്നോ സാഗറേ എന്റെ മോളേ കാണാൻ…… എന്നേ പോലല്ല…..അവൾടെ അമ്മേടെ നിറാ….. ചുവന്നു തുടുത്തൊരു ജൂബിക്ക….. എനിക്കറിയില്ല എങ്ങനാ പറയണ്ടേന്ന്….. ഒളിച്ചു നോക്കുന്ന കുഞ്ഞി പീലിക്കണ്ണൊക്കെ ആയിട്ട്….. എന്റെ ജീവനാ ഡാ അവള്……. ”

ഗീതുവിനെ കുറിച്ച് മനഃപൂർവം ദീപൻ മറച്ചു പിടിച്ചു …..

ഇനി ഒരു മുഖത്ത് നിന്ന് കൂടി പുച്ഛം കാണാൻ വയ്യ….. സത്യം പറഞ്ഞാലും അവൻ പിന്തിരിപ്പിക്കുകയെ ഉള്ളു, ആരുടെ ആണെന്ന് ഓർത്താണ് ടെസ്റ്റ്‌ ചെയുന്നത് എന്ന് ചോദിക്കും…. എനിക്കറിയാം…..

കണ്ണ് തുടച്ചു കൊണ്ട് തലയിണയിലേക്ക് മുഖം ചേർത്ത് ദീപൻ കിടന്നു …..

” ഡി എൻ എ ചെയ്യണ്ട ആവശ്യമുണ്ടോടാ, നിന്റെ ആണെന്ന് നിനക്കുറപ്പുണ്ടെല്? ”

” അങ്ങനല്ല ഡാ….. കുറെ നൂലാമാലകളും ഒക്കെ ഉണ്ട് അതിന്റെ പുറകിൽ ….. അതൊക്കെ ഞാൻ ഒരിക്കെ പറഞ്ഞു തരാം…… ”

” എങ്കിൽ ഒരു കാര്യം ചെയ്യ്…. നീ ലീഗലായി മുന്നോട്ട് പോ….. ഒരച്ഛന് കുഞ്ഞിന് മേൽ അവകാശം ഉണ്ട്…… അങ്ങനെ ആണെങ്കിൽ എളുപ്പം ഉണ്ടല്ലോ കാര്യങ്ങൾ….. ”

ഒരു കാല് മടക്കി വെച്ച് ഇരുന്നു കൊണ്ട് സാഗർ പറഞ്ഞു…..

” ലീഗൽ ആയി അല്ലാതെ പറ്റില്ലേ……? ”

ദീപന്റെ മുഖത്ത് ടെൻഷൻ ഏറി……

” ലീഗൽ അല്ലാതെ പറ്റും…… peace on mind ലാബുകളിൽ നമുക്ക് ഇപ്പോൾ DNA ടെസ്റ്റ്‌ നടത്താം….. പക്ഷെ, അതിനു പ്രശ്നങ്ങൾ ഉണ്ട് ഡാ….. ലീഗലി കോർട്ടിൽ മൂവ് ചെയ്തു ടെസ്റ്റ്‌ നടത്തുമ്പോൾ അമ്മയുടെ സാമ്പിൾ കൂടി കളക്ട് ചെയ്യും…. പക്ഷെ പറ്റേണിറ്റി ടെസ്റ്റ്‌ നടത്തുന്ന ഇത്തരം ലാബിലൊന്നും അമ്മയുടെ സാമ്പിൾ എടുക്കില്ല…… അമ്മയുടെ കൂടി ഉണ്ടാകുന്നതാ നല്ലതെന്നാ പറഞ്ഞു കേക്കുന്നത്…… പിന്നെ ഈ റിപ്പോർട്ട്‌ ഒന്നും നമുക്ക് മറ്റു നിയമ ആവശ്യങ്ങൾക്ക് ഉപയോഗിക്കാൻ പറ്റില്ലടാ….. പേര് പോലെ തന്നെ ചുമ്മാ നമ്മുടെ സമാധാനത്തിനെടുക്കാവുന്ന ഒരു റിസൾട്ട്‌…. അത്രേ ഉള്ളു…. ”

കുറച്ചു നേരം ആലോചിച്ചിരുന്നിട്ട് സാഗർ ദീപനോട് പറഞ്ഞു…..

” ഇവിടെ അടുത്ത് ആ ലാബൊക്കെ ഉണ്ടാകുവോ ഡാ? ”

” പിന്നേ …. കൊച്ചിയിലില്ലാത്ത ലാബോ?, ഇവിടെ ഉണ്ട് ഡാ….. ഞാൻ ഒന്ന് സെർച്ച്‌ ചെയ്തു നോക്കട്ടെ അവരുടെ നമ്പർ കിട്ടുമോന്ന് …. എന്നിട്ട് ചോദിക്കാം കാര്യങ്ങൾ കാര്യങ്ങൾ… നീ വെയിറ്റ് ചെയ്….. ”

തലയാട്ടി ശ്വാസം വലിച്ചു വിട്ട് അവനും സാഗറിനൊപ്പം എണീറ്റിരുന്നു……

” ഡാ ഇത് സിമ്പിളാ …..കുഞ്ഞിന്റെ കസ്റ്റഡി ആർക്കാണോ അവരുടെ സമ്മതവും പിന്നെ സാമ്പിളും മതി…… പന്ത്രണ്ടു രൂപ ഏതായാലും പോക്കാ….. അവർ കറക്റ്റ് പറഞ്ഞില്ല….. ഓൺലൈൻ ആയി ചെയ്താൽ മതി…. അവര് കിറ്റ് അയക്കാംന്നാ പറഞ്ഞത്….. ”

സാഗർ സന്തോഷത്തോടെ പറഞ്ഞു ……അത് കേട്ടതോടെ ദീപന്റെ മുഖം വാടി……

” എന്താടാ ….. എന്ത് പറ്റി? ”

” എനിക്ക് മറ്റാരുടേം മുന്നിലല്ല….. അവളുടെ മുന്നിലാ എന്റെ കുഞ്ഞിന്റെ അച്ഛൻ ഞാനാണെന്ന് തെളിയിക്കേണ്ടത്…… എന്റെ കുഞ്ഞിന്റെ അമ്മയ്ക്ക് മുന്നിൽ….. അവൾക്ക് അതിനൊട്ടു താല്പര്യവും ഇല്ല., ഇനി ഉണ്ടാകാനും പോകുന്നില്ല…. ആ ഒരുത്തിയെക്കൊണ്ട് ഞാൻ എങ്ങനെ സമ്മതം മേടിക്കാനാ….. നീ തന്നെ പറ ”

” അപ്പോൾ പിന്നെ എന്ത് ചെയ്യാൻ പറ്റും…… സമ്മതം ഇല്ലാതെ പറ്റുന്നു തോന്നുന്നില്ല ഡാ….. ”

ദീപന് തല വേദനിച്ചു….. അമ്മയുടെ സമ്മതം നിർബന്ധമാണെന്ന് ………..

” ഡാ നീയൊന്ന് അന്വേഷിക്ക്….. കുറച്ചു കാശ് കൊടുത്താൽ മടങ്ങുന്ന ആരേലും ഇങ്ങനെ ലാബും തുറന്നു വെച്ച് ഇരിപ്പുണ്ടോന്ന്….. ഇപ്പോൾ അക്കൗണ്ടിൽ മിനിമം നാലര ലക്ഷം രൂപ കാണും… … അത് മൊത്തം വേണേൽ ഞാൻ ചെലവാക്കാം….. പക്ഷെ എനിക്കെന്റെ കുഞ്ഞിന്റെ പിതൃത്വം അറിയണം…… ഞാൻ ആണെന്ന് ഉറപ്പാവുന്ന നിമിഷം…….. അതിനു വേണ്ടിയാ ഞാൻ കാത്തിരിക്കുന്നത്…….. ”

സാഗറും നിരാശനായിരുന്നു…. ആദ്യമായിട്ടാണ് ദീപൻ ഒരു കാര്യം പറഞ്ഞവന്റെ പുറകെ ചെല്ലുന്നത്…. എല്ലായ്‌പോഴും തിരിച്ചാണ് സംഭവിക്കാറ്….

” ഡാ നിനക്കറിയാലോ ദീപൂ ഒരാളുടെ ഡി എൻ എ പരിശോധിക്കുന്നത് ചെറിയ കാര്യമല്ല…… ഒരുപാട് നിയമങ്ങളുണ്ട്….. അതിലെങ്ങനാ നമ്മള് ഫ്രോഡ് ആക്കുക….. അല്ലെങ്കിൽ ആ പെണ്ണ് നിന്റെ ഭാര്യ ആയിരിക്കണം…. അതും അല്ലല്ലോ……. കുറ്റപ്പെടുത്തുകയല്ല…. പക്ഷെ…. പറയാതെ വയ്യല്ലോ….. അവൾ സമ്മതിക്കാത്ത സ്ഥിതിക്ക് നിന്റെ കൊച്ചാണെന്ന് എന്താണ് നിനക്കിത്ര ഉറപ്പ്?…. നിന്റെ ആണെങ്കിൽ മിനിമം അവളെങ്കിലും സമ്മതിച്ചു തരില്ലായിരുന്നോ….. ”

സാഗറിനോട് സത്യം ഒന്നും തുറന്ന് പറയാൻ ധൈര്യം വരാതെ സമാധാനം നശിച്ചു ദീപൻ ബാൽക്കണിയിലേക്ക് നടന്നു……..

എങ്ങനെയാ സാഗർ നിന്നോട് ഞാൻ സത്യം പറയുക…. ഞാൻ കൂടി ചേർന്ന് ഒരുത്തിയുടെ ശരീരവും മനസും പിച്ചിചീന്തിയെന്നോ….. അതോ ഈ നാട്ടുകാർക്കും കൂടി കൊത്തിപ്പറിക്കാൻ ഇട്ടു കൊടുത്തിട്ട് നാട് വിട്ടെന്നോ ….. ഇല്ല…. ഞാൻ ഇതൊന്നും നിന്നോട് പറയില്ല സാഗർ….. പിന്നെ എന്നേ വിശ്വസിച്ചു നീയീ ഫ്ലാറ്റിന്റെ വാതിൽ പോലും തുറന്നു തരില്ല…….

അവന്റെ കണ്ണുനീർ ഉയരങ്ങളിൽ നിന്ന് കീഴെ വീണു ചിന്നി….

നാളുകൾക്ക് മുൻപ്, തങ്ങളുടെ മുന്നിൽ വിവസ്ത്രയായി കിടന്നവൾക്ക് അറയ്ക്കുന്ന പലപേരും കൊടുത്ത് കൂടെ ഉള്ളവർ അശ്ലീലം പറയുമ്പോൾ കൂടെ പറഞ്ഞില്ലെങ്കിലും കേട്ട് രസിച്ചിട്ടുണ്ട്…….

നടക്കാത്ത കാര്യങ്ങളാണ് പറയുന്നതെന്നറിഞ്ഞിട്ടും പലതും നിശബ്ദനായി നിന്ന് കേട്ടിട്ടുണ്ട് ….. മരണം മുന്നിൽ കണ്ട പോലെ മുന്നിൽ കിടന്നു പുളഞ്ഞവളെ മനസ്സിൽ ഓർത്തു കൊണ്ട് ഇടയ്ക്ക് വികാരങ്ങളെ തൃപ്തിപെടുത്തിയിട്ടുണ്ട്……..

എന്നിട്ടൊടുവിൽ ആ പെണ്ണൊരുത്തിയ്ക്കായി നെഞ്ച് പിടഞ്ഞു തുടങ്ങിയിരിക്കുന്നു…… അവൾ മറ്റൊരുത്തന്റെ ആണെന്ന് കേൾക്കുന്നത് പോലും കാതിന് അരോചകമാകുന്നു……… അവൾ പെറ്റിട്ടത് തന്റെ രക്തമാണെന്ന് പറയാൻ ഉള്ള് വെമ്പുന്നു…..

കാലം, ദൈവമാണ്……നടന്നു വന്ന വഴികളിലേക്ക് ഒരിക്കൽ കൂടി നമ്മളെ ശയന പ്രദക്ഷിണത്തിനായയ്‌ക്കുന്ന ദൈവം…..

കുഞ്ഞിക്കൂടി തറയിലേക്ക് ദീപനിരുന്നു…… ഇനി എന്ത് ചെയ്യണമെന്നറിയാതെ

💔മൊഴിയിടറാതെ…. 12 💔

ബാൽക്കണി റെയ്‌ലിങ്ൽ ചാരി കുറച്ചു കഴിഞ്ഞപ്പോൾ സാഗറും വന്നു നിന്നു…… തകർന്ന് നിലത്തിരിക്കുന്ന ദീപനെ നോക്കി,, പിന്നെ അവനും അടുത്തിരുന്നു…..

” ഡാ അമ്മയുടെ സമ്മതം വേണമെന്ന് പറയുന്നതിന്റെ കാര്യം എന്താന്നോ അവര് പറയുന്നത്, ഈ ഡി എൻ എ ടെസ്റ്റ്‌ എന്ന് പറയുന്നത് നമുക്ക് ഒരാളുടെ റ്റൂത് ബ്രഷ് അടിച്ചെടുത്തിട്ടാണേലും നടത്താം…..ഇപ്പോൾ നമ്മൾ കസ്റ്റോഡിയന്റെ, അല്ലേൽ അമ്മയുടെ സമ്മതം ഇല്ലാതെ നടത്തി എന്ന് വിചാരിക്ക് …. നാളെ ഇതൊരു ഇഷ്യൂ ആയാലോ…. അവർ മാനനഷ്ടത്തിന് കേസ് കൊടുക്കും…. അങ്ങനെ നൂറു പൊല്ലാപ്പാവും…. അപ്പോൾ സിമ്പിൾ മെത്തേഡ് ന്ന് പറയുന്നത് അവരുടെ സമ്മതത്തോടെ നടത്തുക എന്നുള്ളതാ…… ലാബുകാർക്ക് അവരുടെ കാര്യം നോക്കണ്ടേ ഡാ….. ”

തന്റെ നേരെ നോക്കുന്ന ദീപന്റെ മുഖം കണ്ടിട്ട് സാഗറിന് സങ്കടം വന്നു…..

” പോട്ടെ ഡാ …… നമുക്ക് മറ്റെന്തെലും രീതിയിൽ ആ കുട്ടിയെ കിട്ടുവോന്നു നോക്കാം…. ”

നിരാശയോടെ ദീപൻ തലയാട്ടി……. അവനറിയാം ഗീതുവിന്റെ അടുത്തൊന്നും ചെലവാവില്ലെന്ന്…..

” ഡാ… അപ്പോൾ നീ കിറ്റ് അയക്കുന്ന ഒരു കാര്യം പറഞ്ഞില്ലെരുന്നോ ആദ്യം…. അതെന്നാ? ”

” ദീപൂ, അത് നിനക്ക് ചെയ്യാൻ പറ്റില്ല…. ബികോസ്, ഇത് കുട്ടിയുടെ ചീക് സെൽ, നിന്റെ ചീക് സെൽ ഒക്കെ ഉപയോഗിച്ചാ ചെയുന്നത്…. അതിനാ അവര് കിറ്റ് തരുന്നത്….. പക്ഷെ അവിടെയും പ്രശ്നം ഉണ്ട്….. നിന്റെ കൺസെന്റ് ആണ് അവിടെ നോക്കുന്നത്….. അതായത് കുട്ടിയുടെ ബർത്ത് സർട്ടിഫിക്കറ്റ് പോലെ ഉള്ള പ്രധാന രേഖകളിൽ നിന്റെ പേര് വേണം…..അച്ഛന്റെ സ്ഥാനത്ത്…. ഇതൊന്നും ഇല്ലാതെ പറ്റില്ല……. ”

മോളെ എത്രയും പെട്ടെന്ന് സ്വന്തമാക്കണം എന്ന് ആഗ്രഹിച്ചിട്ട് നടക്കാത്ത സങ്കടം മുഴുവനും അവന്റെ കണ്ണിനെ ചുവന്ന ഗോളങ്ങളാക്കി……. കുറച്ചു നേരം കൂടി ചർച്ച ചെയ്തിട്ട് മറ്റാരും വരുന്നതിന് മുന്നേ അവനവിടെ നിന്നിറങ്ങി ……..

💔

കല്ലിനു മീതെ കൂടി തെന്നി തെറിച്ചു ബൈക്ക് വെട്ടി വെട്ടി മുന്നോട്ട് പൊയ്ക്കൊണ്ടിരുന്നു……. ലക്ഷ്യമില്ല …… തിരിച്ചു വരുന്ന വഴി അധികം ആൾ പാർപ്പുണ്ടാവില്ല എന്ന് തോന്നിയ ഒരിടത്തേക്ക് വണ്ടി കേറ്റം കയറി വന്നതാണ്…. വഴി മോശമാണെന്നു കണ്ടപ്പോഴും തിരിച്ചു വിടാൻ തോന്നിയില്ല ….. എവിടെ എങ്കിലും ഇടിച്ചു മരിച്ചാലോ എന്ന് വരെ ആലോചിച്ചു….. പക്ഷെ…. മോള് …. അവളെ ഒന്ന് കൊഞ്ചിക്കാതെ ….. ചുംബിക്കാതെ……. എങ്ങനാ ഈ ലോകം വിട്ട് പോവുക…….

ശ്രദ്ധ വിട്ടൊരു നേരത്ത് ബൈക്ക് മറിഞ്ഞു, ദീപൻ നിലത്തേക്ക് വീണു…. കറങ്ങിക്കൊണ്ടിരുന്ന വീലിൽ കാലിടിച്ചു മുട്ടിനു താഴെ ചേന ചെത്തിയപോലെ മാംസം പോയി….. ചുറ്റും നോക്കി…. ആരുമില്ല…… കീ ഊരി, ഉടുത്തിരുന്ന വെള്ളമുണ്ടിന്റെ തേര് കീറി മുറിവ് നന്നായി തുടച്ചു കെട്ടി….. നന്നായി വേദനിക്കുന്നുണ്ട്……കീറിക്കെട്ടിയ തുണിയിലൊതുങ്ങാതെ രക്തം പുറത്തേക്ക് പാഞ്ഞു …….

ആഹ്…….

നടത്തിനൊപ്പം വേദനയോടെ അവനൊന്നു ഞരങ്ങി….. ബൈക്ക് ഉയർത്തി, പെട്രോൾ ടാങ്ക് ഒന്ന് തുറന്നു ചെക്ക് ചെയ്തിട്ട്, അവൻ വണ്ടിയിൽ കയറിയിരുന്നു….. ബൈക്ക് സ്റ്റാർട്ട്‌ ചെയ്യുമ്പോഴെല്ലാം മുറിവ് നന്നായി നൊന്തു…… വലതു വശമാണ്………

💔💔

ചട്ടിച്ചട്ടി ഒരു കുഞ്ഞ് ആശുപത്രിയിലേക്ക് ചെന്നു കയറുമ്പോൾ അവരുടെ ഇളം നീല ടൈലുകൾക്ക് മേലെ അവന്റെ കാലിൽ നിന്ന് ചുവപ്പ് പടരുന്നുണ്ടായിരുന്നു…… അവിടെ ഒരു ദിവസം പിടിച്ചു കിടത്താൻ ശ്രമിച്ചെങ്കിലും ദീപൻ സമ്മതിച്ചില്ല…… എന്തെന്നറിയില്ല….. പോരുന്ന വഴി മുഴുവൻ മോളായിരുന്നു ഉള്ളിൽ…. ഒന്നാമത് പനിച്ചു കിടക്കുന്നത് കണ്ടിട്ടാണ് അവിടെന്ന് ഇറങ്ങിയത്…… നാട്ടുകാരുടെ സ്വഭാവം ഇന്ന് കണ്ടതുമാണ്…. എന്തെങ്കിലും ആവശ്യം വന്നാൽ എന്ത് ചെയ്യും…… ആ ചെറുക്കൻ വരുവോ…. വരാൻ പറ്റിയില്ലെങ്കിലോ……..

ദീപന് കട്ടിലിൽ കിടന്നിട്ട് ഉറച്ചില്ല…… അവസാനം ബഹളമായി….. ആകെ ഉള്ള മൂന്ന് സിസ്റ്റർമാരും ഓടി വന്നു……

” ഒരു മണിക്കൂർ സമയം ഞാൻ തരും…. അതിനുള്ളിൽ ഈ തൂങ്ങിക്കിടക്കുന്ന കുപ്പീലെ വെള്ളോം മേത്തു കേറ്റിത്തീർത്തു ഡിസ്ചാർജ് ആക്കിയിരിക്കണം….അല്ലേൽ നാളെ മുതൽ ജോലിക്ക് വന്നിട്ട് സൂചി എടുക്കാൻ ഈ കൈ ഇതേ പോലെ ഉണ്ടാവില്ല ….. ”

സിസ്റ്റേഴ്സ് പരസ്പരം നോക്കി അവസാനം ഐ വി ഇൻഫ്യൂഷൻ സ്പീഡ് കൂട്ടി ഇട്ടു…… കുറച്ചു നേരം കൊണ്ട് തന്നെ അതും തീരാറായി …. കാലിന്റെ അസ്ഥികൾ അകലുന്ന പോലെ വേദനഎടുക്കുന്നു……. രാവിലെ ഗീതു പറഞ്ഞതാണവനോർമ്മ വന്നത്…… തുടയെല്ലുകൾ ഞെരിയുന്ന ശബ്ദം…… അതവൾ കേട്ടിരുന്നത്രെ…….. മറ്റുള്ളവരുടെ നോവിൽ രസിക്കുന്നവർ….. ഞാനും നീയും നമ്മളും…..

ബിൽ എല്ലാം തീർത്തു…. കുറെ ഗുളികകളുമായി ഇറങ്ങിയിട്ട് അവൻ ഒന്നുടെ തിരിച്ചു വന്നു…..

” വിട്ട് കള സിസ്റ്റർമാരേ… എന്റെ കുഞ്ഞിന് പനിയാ….. ഒന്ന് കാണാൻ ഉള്ള തിടുക്കം കൊണ്ട് പറഞ്ഞതാ…… സോറി ”

ഒന്നും മിണ്ടാതെ നിൽക്കുന്ന അവരെ നോക്കി ചിരിക്കാൻ ശ്രമിച്ചു കൊണ്ട് മുറ്റത്തേക്കിറങ്ങി ബൈക്കെടുത്ത് അവൻ വീട് ലക്ഷ്യം വെച്ച് ഓടിച്ചു പോയി…

💔💔💔

ഒന്ന് മയങ്ങി വന്നപ്പോഴാണ് ഗീതു കോളിംഗ് ബെൽ അടിയുന്ന ഒച്ച കേട്ടത്….മോളെ ഒന്ന് തൊട്ട് നോക്കിയിട്ട് അവളെണീറ്റു കിളി വാതിലിൽ കൂടി മുൻ വശത്തേക്ക് നോക്കി …. മുറ്റത്തു ദീപനെ കണ്ട് അവൾക്ക് മടുപ്പ് തോന്നി…..

ഇറങ്ങി ചെല്ലാതിരിക്കാൻ ഒരുങ്ങിയെങ്കിലും അടുപ്പിച്ചു രണ്ടു ബെൽ അടിച്ചതോടെ, അമ്മയെയും കൂടി എണീപ്പിക്കും എന്ന ചിന്തയിൽ അവളിറങ്ങി ചെന്നു…….ഉറക്കത്തിൽ പെട്ടെന്ന് ഒന്നും അമ്മ അറിയാറില്ല……

പക്ഷെ അമ്മയ്ക്ക് രാത്രി സന്ദർശകരെ പേടിയാണ്….. ഇതുപോലെ ഒരു രാത്രിയിൽ ആണല്ലോ തന്റെ കുടുംബത്തെ ശിഥിലമാക്കാനായി നരഭോജികൾ എത്തിയത്….

വാതിൽ തുറന്ന് ഇറയത്തേക്ക് ഇറങ്ങിയതേ അവളെയും വലിച്ചകത്താക്കിക്കൊണ്ട് അവൻ വാതിലടച്ചു…..

ഗീതു പിടച്ചെങ്കിലും അവൻ വായ കൈ കൊണ്ട് കൂടുതൽ ചേർത്ത് പിടിച്ചു…. വാതിൽ കുറ്റിയിട്ടിട്ട് അവളെയും വലിച്ചു കൊണ്ട് മുറിയിലേക്ക് അവൻ ചെന്നു …….രാവിലെ അഴയിൽ ഇട്ട ദുപ്പട്ട മടക്കി കസേരയിൽ ഇട്ടിരുന്നു…

അത് ആഞ്ഞെടുത്ത് നിമിഷ നേരം കൊണ്ട് ദീപൻ അവളുടെ കൈ രണ്ടും കസേരയ്ക്ക് ഇടയിലൂടെ പുറകിലേക്ക് ചേർത്ത് കൂട്ടിക്കെട്ടി അവളെ ഇരുത്തി …. അവളോരോന്ന് ഉറക്കെ പറഞ്ഞെങ്കിലും കെട്ടിയിട്ട് അവൻ ബെഡിലേക്ക് ഇരുന്നു….

” ഗീതൂ…. ഒച്ചയുണ്ടാക്കി വെറുതെ അപ്പുറത്തു കിടക്കുന്ന അമ്മയെ പേടിപ്പിക്കേണ്ട….. ഒന്നെങ്കിൽ നീ ആളെ കൂട്ടി, അവരെന്നെ ഇവിടെ നിന്നിറക്കി കൊണ്ട് പോവണം…. അല്ലെങ്കിൽ ഞാൻ എനിക്ക് തോന്നുമ്പോൾ പോവണം….. രണ്ടിലൊന്ന് മാത്രേ നടക്കൂ….. ദാ കണ്ടോ….. മേലും നൊന്താ ഞാൻ ഇവിടെ വരെ വന്നത്…. എന്തിനാന്നറിയോ ഗീതൂ…. എന്റെ മോളൂട്ടിയെ ഒന്ന് കാണാനാ…… വേദനിച്ചിട്ട് വണ്ടി സ്റ്റാർട്ടാക്കാൻ പോലും പറ്റണില്ലാരുന്നു ഗീതുവേ…. ന്നിട്ടും ഓടി വന്നത് എന്റെ കൊച്ചിനെ സുഖമില്ലാതെ കണ്ടിട്ടാണല്ലോ ഇവിടെന്ന് പോയത് എന്നോർത്തിട്ടാ ….. ക്ഷമിച്ചേക്ക് ഗീതൂ…..”

കസേര പുറകിൽ കിടന്നു പിടച്ചുകൊണ്ടിരുന്നു……….
ദീപൻ അതീവ തൃഷ്ണയോടെ മോളുടെ നെറ്റിയിൽ ഉമ്മ വെച്ചു…. കവിളിലും നെറ്റിയിലും കാല് പാദത്തിലുമെല്ലാം ചൂട് നോക്കി…… മോള് പിന്നെയും ചെരിഞ്ഞു കട്ടിലിന്റെ ഓരം ചേർന്ന് കമിഴ്ന്നു വരാൻ തുടങ്ങിയപ്പോൾ ദീപൻ കട്ടിലിന്റെ അങ്ങേ സൈഡിലേക്ക് നിരങ്ങി കയറി….. കാലിലെ മുറിവ് പലവട്ടം താങ്ങി, ചോര ബെഡ്ഷീറ്റിൽ കുത്തുകളുണ്ടാക്കി ….. ആ വേദനയെ വക വെയ്ക്കാതെ ഗീതുവിനഭിമുഖമായി കിടന്നു കുഞ്ഞിനെ അവൻ നെഞ്ചോട് ചേർത്ത് പിടിച്ചു…. അവന്റെ വിയർത്ത ഷർട്ടിലേക്ക് മോള് ചുരുണ്ടു കൂടുന്നത് കണ്ട് ഗീതുവിനുള്ളിൽ അറപ്പ് തോന്നി….. പതിഞ്ഞ ശബ്ദത്തിൽ അവനെ തിരുത്താൻ നോക്കിയിട്ടും അതൊന്നും കേൾക്കാത്ത പോലെ അവൻ കുഞ്ഞിനെ പിന്നെയും ചേർത്ത് പിടിച്ചു…..

വിയർപ്പിന്റെ നനവ് അറിഞ്ഞിട്ട് മോള് പെട്ടെന്ന് കുതറി….. ദീപന് അത് സഹിക്കാൻ പോലും പറ്റിയില്ല….വീണ്ടും മോളെ ചേർക്കാൻ ശ്രമിച്ചെങ്കിലും പെട്ടെന്ന് എന്തോ ഓർത്ത പോലെ ഷർട്ട്‌ ഊരി അതുകൊണ്ട് നെഞ്ച് തുടച്ചിട്ട് ഷർട്ട് കാലിന്റെ ഭാഗത്തേയ്ക്ക് ഇട്ടു…..

ഹോസ്പിറ്റലിൽ നിന്ന് വന്ന വഴി കുളിച്ചിട്ട് ഒന്ന് തുടയ്ക്കുക കൂടി ചെയ്യാതെ ഡ്രസ്സ്‌ എടുത്തിട്ട് ഓടി വന്നതാണ്….. ബൈക്കിൽ ഇരുന്നപ്പോഴും വിയർക്കുന്നുണ്ടായിരുന്നു നല്ലപോലെ…. പിന്നെ താങ്ങാൻ പറ്റാത്ത വേദന കൊണ്ടും സ്വയം അയാൾ വിയർത്തിരുന്നു…..

മലർന്ന് കിടന്നിട്ട് മോളെ ദീപൻ വാരിയെടുത്ത് നെഞ്ചിലേക്ക് കിടത്തുന്നത് കണ്ടപ്പോൾ ഗീതുവിന്റെ മുഖം തീക്കനൽ പോലെ ചുവന്നു….

അവളത് പുറത്തേക്ക് പറഞ്ഞെങ്കിലും അതൊന്നും കേൾക്കാത്ത ഭാവത്തിൽ ദീപൻ തന്റെ ചെറു രോമങ്ങൾക്ക് മീതെ, വായ ചെറുതായി തുറന്നുറങ്ങുന്ന മോളെ, തലോടുകയായിരുന്നു…..

നെറുകയിൽ ഉമ്മ വെയ്ക്കുകയായിരുന്നു…… അച്ഛൻ എന്ന വാക്കിന്റെ അർത്ഥം സ്വയം കല്പിച്ചെടുക്കുകയായിരുന്നു……

തന്റെ മകളേ ഒന്ന് അടുത്തിങ്ങനെ സമാധാനത്തോടെ കാണാൻ പറ്റിയ സന്തോഷത്തിൽ, അവൻ കരയുമ്പോൾ….. ഒരിക്കൽ കൂടി താൻ തോറ്റു പോയ നൊമ്പരത്തിൽ അവളുടെ മിഴികൾ പെയ്തു .. കവിളുകളോട് മൗനമായി പരാതി പറഞ്ഞുകൊണ്ട്…… പക്ഷെ ദീപനതൊന്നും കാണുന്നേ ഉണ്ടായിരുന്നില്ല……..സ്വാർഥനായ മനുഷ്യൻ, തന്റെ സങ്കടങ്ങളെ മാത്രേ കാണൂ……. മോളെ ഒന്ന് എണീപ്പിക്കാൻ തുനിഞ്ഞെങ്കിലും എണീറ്റാൽ കുഞ്ഞ് കൈ വിട്ട് പോകും എന്ന ചിന്തയിൽ അവനാ മോഹമുപേക്ഷിച്ചു….. പകരം നന്ദുവിന്റെ പുറത്ത് പിന്നെയും തട്ടി അവൻ താളം പിടിച്ചു …. അവന് സ്വയം അത്ഭുതം തോന്നി …… ഒരിക്കൽ പോലുമൊരു കുഞ്ഞിന് വേണ്ടി താളം പിടിക്കാത്ത കൈകളാണ്…… എല്ലാം അറിയാതെ സംഭവിച്ചു പോകുന്നു…… എന്റെ ശരീരവും മനസും എപ്പോഴേ നിന്നിൽ ലയിച്ചു കഴിഞ്ഞിരിക്കുന്നു കുഞ്ഞോളേ……

ഒരിക്കൽ നിങ്ങളെന്റെ ജീവിതത്തിനു കൂച്ചു വിലങ്ങിട്ടിരുന്നു, ദീപാ, ഇതുപോലെ……ആ വിലങ്ങു മനസ്സിൽ നിന്ന് അറുത്തു മാറ്റാൻ ഇപ്പോഴും കഴിയാത്ത ഒരുവളെയാണ് നീ പിന്നെയും ഇന്ന് വിലങ്ങിട്ടത്‌……. എന്റെ സ്വപ്നം….. അതെന്റെ മകളാണ്…. അവളെയെങ്കിലും എനിക്ക് സ്വതന്ത്രയാക്കിയേ പറ്റൂ……

കണ്മുന്നിൽ കാണുന്ന ദീപന്റെ സ്നേഹപ്രകടനം കാണാൻ വയ്യാതെ അവൾ കണ്ണടച്ചു…. ആണിന്റെ ശരീരബലത്തിനു മുന്നിൽ തോൽക്കേണ്ടി വരുന്ന പെണ്ണ് ……

അതിനു ഞാനോ നീയോ എന്നില്ല…… വിവിധ തരത്തിലായി അടിച്ചേൽപ്പിക്കപ്പെടുന്ന പുരുഷ മേധാവിത്തം…… മനക്കരുത്തുണ്ടായിട്ടും പെണ്ണ് പലപ്പോഴും തോല്പിക്കപ്പെടുന്നത് പുരുഷന്റെ കൈക്കരുത്തിലാണ് ….. അഹന്തയായി അവൻ കൊണ്ട് നടക്കുന്ന അവന്റെ മെയ്‌ക്കരുത്ത്…….

ഇടയ്ക്ക് ഒന്ന് കുറുകിക്കൊണ്ട് നന്ദൂട്ടി രണ്ടു കയ്യും, പറക്കാൻ തുടങ്ങുന്ന കുഞ്ഞാറ്റക്കിളിയെ പോലെ അവന്റെ നെഞ്ചിൽ വിരിച്ചിട്ട് കിടന്നുറങ്ങി……

ഇടയ്ക്ക് കണ്ണ് തുറന്നു നോക്കിയ ഗീതു കണ്ടത്, ദീപന്റെ കഴുത്തിലേക്ക് മുഖം ഒട്ടിച്ചു കിടന്നുറങ്ങുന്ന നന്ദൂട്ടിയെയും അവളെ പൊതിഞ്ഞു പിടിച്ചുറങ്ങുന്ന ദീപനെയുമായിരുന്നു…..

നാളുകൾക്ക് ശേഷം ദീപൻ ശാന്തമായി ഉറങ്ങുമ്പോൾ, ഉറക്കം നഷ്ടപ്പെട്ടു കണ്മുന്നിലെ ദൃശ്യം ഏൽപ്പിക്കുന്ന നൊമ്പരം താങ്ങാൻ വയ്യാതെ ഗീതു ഏങ്ങിക്കരഞ്ഞു……ചില രാത്രികൾക്ക് നെഞ്ച് പൊട്ടുന്ന നോവ് തരാൻ മാത്രമേ അറിയൂ…

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4

💔 മൊഴിയിടറാതെ 💔 : ഭാഗം 5

💔 മൊഴിയിടറാതെ 💔 : ഭാഗം 6

💔 മൊഴിയിടറാതെ 💔 : ഭാഗം 7

💔 മൊഴിയിടറാതെ 💔 : ഭാഗം 8

💔 മൊഴിയിടറാതെ 💔 : ഭാഗം 9

💔 മൊഴിയിടറാതെ 💔 : ഭാഗം 10