💔 മൊഴിയിടറാതെ 💔 : ഭാഗം 13

നോവൽ
എഴുത്തുകാരി: തമസാ

Thank you for reading this post, don't forget to subscribe!

---

രാത്രി നെഞ്ചിൽ നനവറിഞ്ഞിട്ട് ദീപൻ കണ്ണ് തുറന്നു………സമാധാനമായി ഉറങ്ങിയെങ്കിലും ശരീരത്തിൽ മകൾ കിടക്കുന്നത് കൊണ്ട് അവന് നല്ല ശ്രദ്ധ ഉണ്ടായിരുന്നു…….

കൂടെ കാല് വലിയുമ്പോൾ മുട്ടിനു താഴെ വേദനിക്കുന്നുണ്ടായിരുന്നു…….. നന്ദു അസ്വസ്ഥത കാണിക്കാൻ തുടങ്ങിയപ്പോഴേ മനസിലായി, മൂത്രത്തിന്റെ നനവ് കുഞ്ഞിന്റെ ഉറക്കം അലോസരപ്പെടുത്തുന്നുണ്ടെന്ന്……….

സ്വിച്ച് ബോർഡ്‌ എവിടെ ആണെന്ന് അറിയില്ലാത്തത് കൊണ്ട് മൊബൈൽ വെട്ടം ഓൺ ആക്കി ജനലിലേക്ക് ചാരി വെച്ചു……. മങ്ങിയ വെള്ളവെളിച്ചം മുറിയിലാകെ നിറഞ്ഞു….. പെട്ടെന്ന്, ഗീതുവിനെ നോക്കുമ്പോൾ അവൾ കസേരയിലേക്ക് ചാരി കിടക്കുന്നുണ്ടായിരുന്നു….

മുറിവിൽ ചുള്ളൻ കുത്തിയപോലെ വരിഞ്ഞു നോവുമ്പോഴും അവൻ പണിപ്പെട്ട് എണീറ്റു……. ഒരു കൈ കൊണ്ട് മോളേ താങ്ങി മറു കൈ കുത്തിയാണ് എണീറ്റത്….. മേല് മുഴുവൻ വീണതിന്റെ നൊമ്പരമുണ്ട്….

താൻ എണീറ്റത് ഗീതു അറിഞ്ഞിട്ടില്ലെന്ന് അവന് തോന്നി…. നന്ദൂട്ടിയെ കട്ടിലിൽ കിടത്തിയിട്ട് തിരിഞ്ഞു സമയം നോക്കി…. രണ്ടരയാവാൻ പോവുന്നു….. മേല് മുഴുവൻ തൊട്ട് നോക്കി…..മോൾടെ പനി മൊത്തത്തിൽ വിട്ടിട്ടുണ്ട്…..

മോൾക്ക് മാറാൻ ഉള്ള കുഞ്ഞു നിക്കർ നോക്കിയിട്ട് കണ്ടില്ല …… നനഞ്ഞ മൂത്രത്തിൽ കുതിർന്ന തുണിയൂരി എടുക്കുമ്പോൾ അവന് ആദ്യം സന്തോഷവും പിന്നെ സങ്കടവും തോന്നി……….

നഗ്നതയിലല്ല കുഴപ്പം…… ലിംഗത്തിലല്ല കുഴപ്പം…… പ്രായത്തിലല്ല കുഴപ്പം……….. നോക്കുന്ന കണ്ണിനാണ് കുഴപ്പം… ……..

കുഞ്ഞിന്റെ പൊക്കിളിനു മീതെ അവന്റെ കണ്ണുനീർ തുള്ളി ഒന്ന് വീണു….. അടുത്തിരിക്കുന്ന സ്റ്റൂളിന്റെ മുകളിൽ മടക്കി വെച്ചിരുന്ന നൈറ്റിക്ക് താഴെ അപ്പോഴാണ് അവൻ ഒരു കുഞ്ഞി നിക്കർ കണ്ടത് ….. അതെടുത്തു മോളേ ഉടുപ്പിച്ചു……ആ നിമിഷങ്ങളിൽ വേദനയോടെ എങ്കിലും അവനതോരോന്നും ആസ്വദിക്കുകയായിരുന്നു……….

അവന്റെ പറവക്കുഞ്ഞിനെ ഒന്നുകൂടി നോക്കിയിട്ട്, ഭിത്തിയുടെ അരികിലേക്ക് അവളെ നീക്കി കിടത്തി……ഒന്ന് ചെരിഞ്ഞിട്ട് കുഞ്ഞ് പിന്നെയും ഉറങ്ങി…….

ഗീതുവിന്റെ മുഖത്തേയ്ക്ക് നോക്കിയിരിക്കെ, നെഞ്ചിലെ ഞരമ്പുകളിലൂടെ രക്തമൊഴുക്ക് നിലച്ചു പോവുകയാണോ എന്നവന് തോന്നി……. ഗിരിയുടെ കൂടെ അവന്റെ ബൈക്കിനു പുറകിലിരുന്നു പോകുന്നത് രണ്ടു മൂന്ന് വട്ടം കണ്ടിട്ടുണ്ടായിരുന്നു….. അന്നൊക്കെ നല്ല ഭംഗി ആയിരുന്നു കാണാൻ…..കണ്ടപ്പോഴെല്ലാം ആ മുഖത്തൊരു കുസൃതിച്ചിരി ഉണ്ടായിരുന്നു എന്ന് തോന്നുന്നു…..

ഇപ്പോഴോ….. കണ്ണിനു മുകളിലും താഴെയും കറുപ്പ്…ചിരിയില്ല….. കൈമുട്ടിലെ എല്ലെല്ലാം ഉന്തിയത് പോലെ…….. കവിളൊന്നുമില്ല……….പഠിച്ചു നടക്കേണ്ട പ്രായമാണ് ഇങ്ങനെ…….

കണ്ണിൽ ഉറഞ്ഞു കൂടിയ പച്ചവെള്ളത്തെ തുടച്ചിട്ട്, തുണിയെല്ലാം കട്ടിലിലേക്ക് മറിച്ചിട്ടിട്ട് ആ സ്റ്റൂൾ എടുത്ത് അവളുടെ കസേരയുടെ അടുത്തിരുന്നു….. തറയിൽ നിന്നൊരു തണുപ്പ് സൂചി പോലെ കാലിൽ കുത്തുന്നുണ്ടായിരുന്നു……..

താൻ കെട്ടി വെച്ച കൈ വിരലുകളെ തൊടാതെ അവൻ നോക്കിയിരുന്നു…. പ്രാരാബ്ദക്കൈകൾ……. ജീവിക്കരുതായിരുന്നു ഗീതൂ നീ……അന്ന് നിന്നെയും കൊന്നിട്ട് പോയാൽ മതിയായിരുന്നു എന്ന് തോന്നുവാ……

കൊല്ലണം എന്നുറപ്പിച്ച ഗിരിയ്ക്ക് എന്തിന് അവസാന നിമിഷവും നിന്നെ വെച്ചൊരു വേദന കൊടുത്തു…… അമ്മ…. ഒന്നുല്ല….. തൊട്ടപ്പുറത്തുണ്ടായിട്ടും ആ മുഖം പോയി കാണാൻ ഭയമാണ്…….. പ്രതികാരം എന്ന പേരിൽ നടത്തിയ കാമക്കൂത്തുകൾക്ക് ഒടുവിൽ നിന്നെ കൊല്ലാമായിരുന്നു……. അല്ലെങ്കിൽ അതിനും മുന്നേ ” വേണ്ട ” എന്നൊരു വാക്കിൽ നിന്നെ ജീവിക്കാൻ വിടാമായിരുന്നു……..

വിളിച്ചുണർത്താൻ ഒരു ഭയം പോലെ തോന്നി….. മോളേ കണ്ടില്ലെങ്കിൽ…… അവൾക്ക് പനി എങ്ങനെ ഉണ്ടെന്ന് അറിഞ്ഞില്ലേൽ താൻ മരിച്ചു പോകും എന്ന് തോന്നി…….. സ്വാർത്ഥനാണ്……. തെറ്റ് ചെയ്യുന്നതിന് മുന്നേ ഒന്നും ചിന്തിക്കാതെ അതിന് ശേഷം ചിന്തിക്കുന്ന സ്വാർത്ഥൻ….. അതിനു ശേഷവും സ്വയം ന്യായീകരിക്കാൻ നോക്കുന്ന സ്വാർത്ഥൻ….

ഗീതൂ……..

വിളിച്ചു കൊണ്ട് അവളുടെ കൈപ്പത്തിക്ക് മേലേ ചുംബിച്ചു……

തളർന്നു മയങ്ങിയ ഗീതു അവന്റെ ഒരു വിളിയിൽ തന്നെ എഴുന്നേറ്റു…. കെട്ടിയ കൈകൾ അവൾക്ക് നൊമ്പരം കൊടുക്കുന്നുണ്ടായിരുന്നു…… അതിലും നൊമ്പരം തൊട്ട് മുന്നിൽ അവനെ കണ്ടിട്ടായിരുന്നു……. ഇനിയും മിഴികൾ നിറച്ചെന്നെ തോൽപ്പിക്കരുതേ…… അവൾ ഇനിയും കണ്ണ് തുറക്കാത്ത ദൈവങ്ങളോട് അപേക്ഷിച്ചു……

കണ്ണുനീർ ഉണങ്ങിപ്പിടിച്ചിരിക്കുന്ന കവിൾ … ഉപ്പു തരി പോലെ കണ്ണീർച്ചാലിൽ വെള്ള നിറത്തിൽ കണ്ണുനീർ വരണ്ടിരിപ്പുണ്ട്‌ ………. കാലുകളുടെ വേദന ഒരു നിമിഷം ദീപനറിഞ്ഞില്ല……. എണീറ്റ് ചെന്നിട്ട് അവളുടെ നെറ്റിയിൽ ദീർഘ നേരം ചുംബിച്ചു………

എനിക്കറിയാം, എന്റെ സാമീപ്യം പോലും നിനക്ക് അരോചകമാണെന്ന്… പക്ഷെ ഈ ചുംബനത്തിൽ ഞാൻ ഇത്രയും നാൾ ഉള്ളിൽ കൊണ്ട് നടന്ന സ്നേഹം മൊത്തമായിട്ടുണ്ട്………… ബഹുമാനം ആകും ചിലപ്പോൾ കൂടുതൽ…..

എന്റെ കുഞ്ഞിനെ പേറിയ വയറിനോടെനിക്ക് പ്രണയമാണ്….. എന്റെ കുഞ്ഞിനെ താങ്ങി നിർത്തിയ തുടയെല്ലുകളോടെനിക്ക് ബഹുമാനമാണ്….. എന്റെ കുഞ്ഞിനെ പാലൂട്ടിയ മുലകളോടെനിക്ക് കടപ്പാടാണ്……… എന്റെ കുഞ്ഞിനെ ചേർത്ത് നിർത്തിയ കൈകളോടെനിക്ക് വാത്സല്യമാണ്…..

ദീപൻ കടക്കാരനാണ്…….. നീയെന്ന പെണ്ണിനോട് ദീപൻ കടപ്പെട്ടിരിക്കുന്നു……….

അവളെ നോക്കുമ്പോൾ കണ്ണ് തുറക്കാതെ ഇരിക്കുകയായിരുന്നു ഗീതു…. അനിഷ്ടത്തോടെ…..

..

” ഭീരുവാണ് നിങ്ങൾ….. എന്നും രാത്രിയുടെ കറുത്ത ചായം നോക്കിയിരിക്കുന്ന ഭീരു….. പകൽ വെളിച്ചത്തിൽ അസ്തിത്വമില്ലാത്തവൻ……… ”

തന്നെ നോക്കാതെ തന്നെ അവൾ പറയുന്നത് അവനും കേട്ട് ഇരുന്നു……പതഞ്ഞു പൊങ്ങുന്ന വെറുപ്പിന്റെ ഭാവം അവൻ കണ്ടില്ലെന്ന് നടിച്ചു…..

” നീ പറഞ്ഞത് നേരാണ് ഗീതൂ…… പകൽ വെളിച്ചത്തിൽ ദീപൻ ഭീരുവാണ്…… എന്റെ കുഞ്ഞിന്റെയും അവളുടെ അമ്മയെയും നോക്കാൻ തന്നെ പകൽ വെളിച്ചത്തിൽ ദീപന് ഭയമാണ്….. കാരണം അന്നേരം എന്റെ കൂടെ എന്റെ തന്നെ നിഴലുണ്ടല്ലോ…….. ”

ചുണ്ടും കോട്ടി ഗീതു മറ്റൊരു ദിശയിലേക്ക് നോട്ടമെറിഞ്ഞു……

” ഗീതു ഞാൻ ഇന്ന് ടെസ്റ്റിന്റെ കാര്യങ്ങൾ അന്വേഷിച്ചു……. നിനക്ക് താത്പര്യമില്ലെന്ന് എനിക്കറിയാം…… എങ്കിലും എന്നേ നീ കേട്ടെ പറ്റൂ… നിന്റെ കൺസെൻറ് ഇല്ലാതെ പറ്റില്ല എന്നാണ് ലാബുകാര് പറയുന്നത്…… ടെസ്റ്റ്‌ നടത്തിയാൽ, ചിലപ്പോൾ അവളിൽ ഒഴുകുന്ന രക്തം എന്റെ അല്ല എന്ന് തെളിയുമായിരിക്കാം…… അത് എനിക്ക് പ്രശ്നമല്ല ഗീതൂ….. സ്ഥാനം മനസിലല്ലേ, എന്റെ ഉള്ളിൽ അവളെന്റെ പകർപ്പാണ്….. എന്റെ മകളാണ് …. അത് എന്നും എന്റെ മനസ്സിൽ അങ്ങനെ തന്നെ ആയിരിക്കും…… എങ്കിലും തെളിയിക്കാൻ ഒരു മോഹം….. മോഹം അല്ല….. അതീവ മോഹം……..

പകരം നീ പറയുന്നതെന്തും ഞാൻ അനുസരിക്കും….. അത് പോരേ…… അവളെ കാണരുതെന്ന് പറഞ്ഞാൽ പിന്നെ ഒരിക്കലും വരില്ല….വാക്കാണ്.. പക്ഷെ ടെസ്റ്റ്‌ നടത്തി കുഞ്ഞിന്റെ അച്ഛൻ ആരാണെന്ന് എനിക്കറിയണം…… ഒന്ന് സമ്മതിച്ചു കൂടെ, നിനക്ക്? ”

അവന്റെ മുഖത്തേക്ക് അവൾ ആഞ്ഞു തുപ്പി…… രാത്രി മഞ്ഞു പോലെ അവളുടെ ഉമിനീർ കട്ടകുത്തി അവന്റെ കവിളിൽ വീണു……. തീരെ പ്രതീക്ഷിക്കാതിരുന്നാൽ അവൻ ചാടി എഴുന്നേറ്റ് അറപ്പോടെ അത് മുണ്ട് ഉയർത്തി തുടച്ചു……

” ഛെ…… നീയെന്താ ഗീതൂ ഇങ്ങനെ….. അന്തസ്സ് കെട്ട പെണ്ണുങ്ങളെ പോലെ……. ”

” ഞാൻ അന്തസ്സ് കെട്ട സ്ത്രീയല്ല ദീപാ …….മനുഷ്യന്റെ ബലഹീനതകൾ അവരെ തന്നെ കീഴ്പ്പെടുത്തുമ്പോഴാണ് അവർക്ക് അന്തസ്സില്ലാ എന്ന് സമൂഹം മുദ്രകുത്തുന്നത്……. ഗീതുവിന്‌ ബലഹീനതകളില്ല…. ചാപല്യങ്ങളില്ല……. തന്റേടത്തോടെ, അടിയുറച്ചു നിൽക്കുന്ന എല്ലാവരും മറ്റുള്ളവർക്ക് അന്തസ്സില്ലാത്തവരാവും….. പക്ഷേ ഇത് എന്റെ അഭിമാനം എന്ന് ഞാൻ പറയും….. അതിനെ ചോദ്യം ചെയ്യാൻ ശ്രമിച്ചാൽ എന്നെക്കൊണ്ട് ആവും വിധം ഞാൻ പ്രതികരിക്കും…….

ഇപ്പോൾ നിന്റെ മുഖത്ത് വീണ തുപ്പലില്ലേ….. അത് പോലെ….. ഇതും എന്റെ പ്രതികരണമാണ്……. നിനക്ക് അറച്ചല്ലേ….. അതിലും അറപ്പ് തോന്നുന്നുണ്ട് എനിക്ക് നിന്നെ കാണുമ്പോൾ….

പിന്നെ നീ ഞാൻ പറയുന്നതെന്തും അനുസരിക്കും, അത് നിന്റെ വാക്കാണ് എന്ന് പറഞ്ഞില്ലേ……. എന്റെ കുഞ്ഞിന്റെ രോമത്തിൽ പോലും അവകാശം ഉറപ്പിച്ചു പറയാൻ പറ്റാത്ത നീ എന്റെ കണ്മുന്നിൽ വരരുതെന്ന് പറഞ്ഞിട്ട് ഒരു നാണവും ഇല്ലാതെ വലിഞ്ഞു കയറി വരുന്ന നിനക്കെന്ത് അന്തസ്സാ ഉള്ളത്………

അന്തസ്സുള്ള ആരെങ്കിലും, ഒരു പെണ്ണ് ഇത്തിരി ഇല്ലാത്ത കുഞ്ഞിനേം, കിടപ്പിലായ അമ്മയെയും കൊണ്ട് താമസിക്കുന്ന വീട്ടിലേക്ക് ഇടിച്ചു കേറി വരുവോ….. അവളുടെ സമ്മതമില്ലാതെ ഈ കണ്ട തോന്ന്യവാസം മൊത്തം കാട്ടുമോ…… അങ്ങനെ ഉള്ള താനാണോ എന്നേ അന്തസ്സ് പഠിപ്പിക്കുന്നത്…..? !!!!. ”

ദീപന് സ്വയം നിയന്ത്രിക്കാൻ നല്ല പാടുപെടേണ്ടി വന്നു… കുറച്ചു നേരം അവളെ ദഹിപ്പിക്കും പോലെ നോക്കിയിട്ട് അവൻ അവളുടെ അടുത്തെത്തി നെറുകയിലെ മുടിയിൽ തലോടി……

” ഗീതൂ….. ദീപൻ ആരുടെയും പുറകെ ഇതുവരെ ഇങ്ങനെ പോയിട്ടില്ല …… ചോദിച്ചിട്ട് തന്നില്ലേൽ തട്ടിപ്പറിച്ചാ ശീലം…..വേണം എന്നൊന്ന് ആഗ്രഹിച്ചാൽ നിന്നെ കൊന്നിട്ടാണേലും കൊച്ചിനെ ഞാൻ കൊണ്ടുപോയേനെ…. പക്ഷേ കരുണ എന്താന്ന് പഠിച്ചു കൊണ്ടിരിക്കുവാ ഞാൻ….. പിന്നെ…..നിന്നെ എപ്പോഴോ ഞാൻ സ്നേഹിച്ചു പോയി……. ആദ്യം കുറ്റബോധം ആയിരുന്നു…. ദയ ആയിരുന്നു….. പിന്നെ ബഹുമാനം….. പ്രണയം….. ദാ ഇപ്പൊ വാത്സല്യം വരെ ഉണ്ട്……. അതുകൊണ്ടാ….. എന്റെ കൂടെ എന്നും നീയും കുഞ്ഞും വേണമെന്ന് ആഗ്രഹിച്ചു…… എന്റെ തെറ്റ് തിരുത്താനാണെന്ന് വേണെങ്കിൽ നീ കരുതിക്കോ……. എന്നാലും നിനക്ക് നന്മയല്ലേ ഗീതൂ വരോളൂ….. ”

കൈ കടയുന്നുണ്ടായിരുന്നു അവൾക്ക് ….. കൈ കസേരയിലിട്ട് അവൾ ഉരച്ചുകൊണ്ടിരുന്നു….. തല വേദനിച്ചു വിങ്ങിപ്പൊട്ടി…. അതിനനുസരിച്ച് അവൾ മുഖം ചുളിച്ചു…..പക്ഷേ അവനുള്ള മറുപടി കൊടുക്കാത്തതിന്റെ സങ്കടം തൊണ്ടയിൽ മുഴ പോലെ തടഞ്ഞു……. ആ വേദന ഇനിയും താങ്ങാൻ പറ്റില്ലെന്നവളറിഞ്ഞു……

” നീയൊന്ന് ഈ കെട്ടഴിക്ക്….. എനിക്ക് നിന്നോട് കുറച്ചു ചോദിക്കാനുണ്ട് ….. എന്നോട് ദയ തോന്നിയിട്ടാണല്ലേ നീയെന്നെ കൂടെ കൂട്ടണംന്ന് ആഗ്രഹിച്ചത്…. ആ ദയ നിനക്കെന്തേ എന്നേ ഇവിടെയിട്ട് കൊത്തിപ്പറിച്ചപ്പോൾ തോന്നാഞ്ഞത്….? .. ഞാനീ നാട്ടുകാരുടെ മുന്നിലേക്ക് രണ്ടു മീറ്റർ തുണി പുതച്ചെറിയപ്പെടുമ്പോൾ നിനക്ക് ദയ തോന്നിയില്ലേ….. കുറ്റബോധം തോന്നിയില്ലേ…..

ഇല്ലല്ലേ….. എന്നിട്ടിപ്പോ…… ഞാൻ ഒരു വശത്തു നിന്ന് ഈ നാട്ടുകാരുടെ മുന്നിലൊന്നു പിടിച്ചു നിൽക്കാൻ തുടങ്ങിയപ്പോ……ആർക്ക് വേണം നിന്റെ കുറ്റബോധം….. !!

പിന്നെ വാത്സല്യം….. എന്റെ ഏട്ടന്റെ കുഞ്ഞായി പതിനെട്ടു വയസ് വരെ വാത്സല്യം അറിഞ്ഞതാ ഞാൻ….. അത് വേരോടെ പിഴുതു കളഞ്ഞത് നിങ്ങളാണ്……. എന്നിട്ട് എനിക്ക് നഷ്ടപ്പെട്ടതൊക്കെ നീ ഓഫർ ചെയ്യുവാണോ…. എന്റെ ഏട്ടൻ മരിക്കുമ്പോൾ ഞാൻ എന്തായിരുന്നു എന്ന് തനിക്കറിയുവോ…… ഏട്ടന്റെ കൂടെ ഞാൻ എന്നും ബാല്യത്തിലായിരുന്നു….. കൗമാരം എന്താണെന്ന് അറിഞ്ഞിട്ടില്ല ഞാൻ……… അതുപോലെ ലാളിച്ചാ ഗിരിയേട്ടനും അമ്മയും എന്നേ കൊണ്ട് നടന്നത്….. ആ ഞാനാ ഒറ്റ ദിവസം കൊണ്ട് നഷ്ടം കൊണ്ട് കൂപ്പുകുത്തിയ ജീവിതം ഏറ്റുവാങ്ങിയത്…..

കണ്ടതല്ലേ എല്ലായിടത്തും ഞാൻ അപമാനിതയാവുന്നത്…. എന്താ അപ്പൊ തനിക്ക് കുറ്റബോധം ഉണ്ടായില്ലേ…. പറയായിരുന്നില്ലേ ഇതിനൊക്കെ പുറകിലെ പരിശുദ്ധ കരങ്ങൾ എന്റെയാണെന്ന്…. പറയില്ല….. അതിന് സ്വന്തമായി ഒരു നട്ടെല്ല് വേണം…… കടം മേടിച്ച വാഴപ്പിണ്ടിയുമായി നടക്കുന്നവർക്ക് നാവും കാണില്ല….. ”

അവൾ നാവടക്കില്ല എന്ന് ദീപന് ഉറപ്പായിരുന്നു….. ആ മനസ് തന്റെ കുഞ്ഞിന് വേണ്ടി മാത്രമേ അലിയൂ…. പ്രത്യേകിച്ച് തനിക്കായി ഒരിക്കലും അലിയില്ല…..

” എനിക്കിനി ഒന്നും പറയാനില്ല ഗീതൂ…. പിന്നെ ഞാൻ എന്റെ കുഞ്ഞിന്റെ മേലുള്ള അവകാശത്തിൻ മേൽ നിന്നോട് ചോദിക്കാതെ ഒരു കാര്യം ചെയ്യാൻ പോകുവാ…. എന്റെ കുഞ്ഞിന്റെ മുടി ഞാൻ വെട്ടി എടുക്കുവാ……. ആരെ കൊന്നിട്ടാണേലും തെളിയിക്കാൻ പറ്റുമോ എന്ന് ഞാനൊന്ന് നോക്കട്ടെ……. ”

അവൾക്ക് നേരെ വിജയച്ചിരി ചിരിച്ചു കൊണ്ട് അവളെ നോക്കിയിട്ട്, പഴ്സിൽ മടക്കി വെച്ച കുഞ്ഞ് സ്റ്റീൽ കത്രികയെടുത്തു മോളുടെ അടുത്തേക്കവൻ ഇരുന്നു…… മോളുടെ നെറ്റിയിൽ ഉമ്മ വെച്ചു…… കുഞ്ഞുടുപ്പിന് പുറത്തു കാണുന്ന ഉണ്ണിവയറിൽ ചുണ്ടമർത്തി …… മീശത്തുമ്പ് കൊണ്ടിട്ട് കുഞ്ഞൊന്ന് പുളഞ്ഞു……

കാലിന്റെ വേദന കാരണം മോളുടെ മേലേയ്ക്ക് ചായുന്നത് അവന് പ്രയാസം തോന്നി….. പക്ഷേ തന്റെ ഉള്ളിലെ വികാരങ്ങളെ തടഞ്ഞു നിർത്താൻ ദീപന് കഴിയുമായിരുന്നില്ല……

മോളുടെ കൺപീലി…… തൂങ്ങിക്കിടക്കുന്ന കവിൾ…… നനുത്ത പുരികം……കൂർത്ത മൂക്ക്….. അവനതെല്ലാം ആസ്വദിച്ചു കൊണ്ടിരുന്നു…… ഒടുവിൽ കുഞ്ഞിന്റെ താടയിലെ ചുഴിയിൽ കൈയാൽ തടവി….. ഒടുവിൽ ചുംബിച്ചു……

” അച്ഛേടെ കുഞ്ഞോളേ…..മോൾക്ക് അച്ഛെനെ വേണ്ടേ…… ന്റെ അച്ഛയാന്ന് ല്ലാരോടും പറയണ്ടേ വലുതാവുമ്പോ…….അച്ഛയ്ക്കും എല്ലാരോടും പറയണം അച്ഛന്റെ ചക്കരയാ മോളെന്ന്….. അച്ഛേടെ മാത്രം കുഞ്ഞാന്ന്… ”

കിടക്കുന്ന കുഞ്ഞിനെ നോവിക്കാതെ മോളുടെ മേലെ കിടന്നു കൊണ്ട് അവൻ കുഞ്ഞിനെ ആകമാനം വാത്സല്യം കൊണ്ട് പൊതിഞ്ഞു…… കയ്യിലെ കത്രിക കൊണ്ട് മോളുടെ കുറച്ചു മുടിയിഴകൾ കൂട്ടിപ്പിടിച്ചു മുറിച്ചെടുത്തു ദീപൻ……. സന്തോഷത്തോടെ അതിൽ നോക്കി ചിരിച്ചു കൊണ്ട് പഴ്സിലെ കുഞ്ഞ് കവറിൽ ഇട്ട് കത്രികയോടൊപ്പം എടുത്തു വെച്ചു….. അത്രയും നേരം കുതിരക്കുളമ്പടി പോലെ ഇടിച്ചു കൊണ്ടിരുന്ന ഗീതുവിന്റെ ഹൃദയം ഒന്ന് ശാന്തമായി……

” ഇനി ഞാൻ പോവട്ടെ ഗീതൂ …. ഇതിന് വേണ്ടി വന്നതല്ല….പക്ഷേ അവസരം കിട്ടിയാൽ കളയരുതെന്നോർത്ത് പഴ്സിൽ സൂക്ഷിച്ചിരുന്നതാ….. ആവശ്യം വന്നു….. അവസരവും…… കുറച്ചു മുൻപാ ഓർത്തത് തന്നെ….ഇനി നിന്റെ മുന്നിലേക്ക് ദീപൻ വരും….. എന്റെ കുഞ്ഞിന് മേലെ, അവളുടെ അച്ഛനെന്ന അവകാശവുമായി…… എന്നിട്ട് ഞാൻ നിനക്കും തരും….. ദീപന്റെ മാത്രം കുഞ്ഞിന്റെ അമ്മ എന്ന പേര്…. അവകാശം….. അധികാരം… സ്നേഹം…. പ്രണയം…… എല്ലാം…… കാത്തിരുന്നോ…… ”

അവളുടെ കയ്യിലെ കെട്ടഴിച്ചിട്ട് അവളെ കസേരയോടെ അവൻ കെട്ടിപ്പിടിച്ചു…… അവളുടെ മുഖത്ത് അവന്റെ മുഖത്ത് പടർന്ന അതേ വിജയച്ചിരി ആയിരുന്നു……

അവളോട്‌ യാത്ര പറഞ്ഞു തിരിഞ്ഞ അവന്റെ പുറകെ അവളും ചെന്നു…… പുറത്ത് ഇരുട്ട് വെളുത്തു തുടങ്ങിയിരുന്നു….. പുക മറ മാത്രമേ ആകാശത്തിനും ഭൂമിയ്ക്കും ഇടയിൽ ഉള്ളു എന്ന് തോന്നി……

വാതിൽക്കൽ നിന്ന് മുറ്റത്തേക്കിറങ്ങിയ ദീപൻ അവളെ നോക്കി ഒന്ന് കൂടി ചിരിച്ചു കൊണ്ട് പുറത്തേക്ക് നടന്നു ……

“ദീപൻ……….. ”

വിളികേട്ട് തിരിഞ്ഞു നോക്കിയ ദീപൻ ഒരുവേള ഗീതുവിന്റെ തുറന്ന ചിരി കണ്ട് അതിശയിച്ചു…..

” സ്വയം ജയിച്ചു എന്ന് തോന്നുന്നുണ്ടല്ലേ….. ഗീതുവിനെ തോല്പിച്ചുവെന്ന്…….. ”

.അവളുടെ സന്തോഷത്തിന്റെ അർത്ഥം അവന് മനസിലാകുന്നതേ ഉണ്ടായിരുന്നില്ല…..

” ദീപന് ഞാൻ ഒരു കാര്യം പറഞ്ഞു തരാം…. വൃത്തിക്ക് കേൾക്കണം….. പിന്നെ മറന്നു പോകരുത് ….. ഓക്കെ????…..

ഒളിച്ചും പാത്തും നടത്തുന്ന ഡി എൻ എ ടെസ്റ്റിന് അധികം ആരും മുടി ഉപയോഗിക്കാറില്ല….. നന്നായി അന്വേഷിക്കാത്തത് കൊണ്ടാ ദീപൻ അറിയാതിരുന്നത്…..വേരോടു കൂടിയ മുടിയാണ് ഉപയോഗിക്കേണ്ടത്…. ഇപ്പൊ ഇയാള് എന്റെ കുഞ്ഞിന്റെ തലയിൽ നിന്ന് മുറിച്ചെടുത്തില്ലേ….. അത് വെറും തണ്ടാണ്….. ഹെയർ റൂട്ട് ഇല്ലാത്ത വെറും തുമ്പറ്റം….. പരിശോധനയ്ക്ക് പോലുമെടുക്കില്ല….എടുത്താലും വെറുതെയാ… ..താൻ ശ്രമിച്ചു നോക്ക് എന്റെ കുഞ്ഞ് തന്റേതാണെന്ന് ഈ അഞ്ചാറു നാര് കൊണ്ട് തെളിയിക്കാൻ പറ്റുമോ എന്ന്….. ”

വിജയവും പുച്ഛവും ഇടകലർത്തി അവൾ ചിരിക്കുമ്പോൾ, അവളെ കൊല്ലാനുള്ള ദേഷ്യത്തോടെ ദീപൻ തന്റെ കാൽ ചുവട്ടിലെ മണ്ണ് അന്തരീക്ഷത്തിലേക്ക് ചവിട്ടിത്തെറിപ്പിച്ചു…….ഇത്രയും നേരം വിജയം മുന്നിൽ കണ്ടിട്ട് തോറ്റു പോയവന്റെ അമർഷം……

അത് നോക്കി നിൽക്കെ ഉച്ചിമുതൽ പാദം വരെ സുഖമുള്ളൊരു അനുഭൂതി നിറയുന്നതവളറിഞ്ഞു……. തോൽപ്പിക്കാൻ ശ്രമിച്ചവന്റെ മുന്നിലെ ജയത്തിനു മധുരമേറും…

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4

💔 മൊഴിയിടറാതെ 💔 : ഭാഗം 5

💔 മൊഴിയിടറാതെ 💔 : ഭാഗം 6

💔 മൊഴിയിടറാതെ 💔 : ഭാഗം 7

💔 മൊഴിയിടറാതെ 💔 : ഭാഗം 8

💔 മൊഴിയിടറാതെ 💔 : ഭാഗം 9

💔 മൊഴിയിടറാതെ 💔 : ഭാഗം 10

💔 മൊഴിയിടറാതെ 💔 : ഭാഗം 11

💔 മൊഴിയിടറാതെ 💔 : ഭാഗം 12