💔 മൊഴിയിടറാതെ 💔 : ഭാഗം 10

നോവൽ
എഴുത്തുകാരി: തമസാ

---

എവിടെ എങ്കിലും ഒന്നിരുന്നാൽ മതിയെന്ന് തോന്നി ഗീതുവിന്…. പക്ഷേ നടന്നിട്ടെത്താത്തതു പോലെ …… ശക്തി കൊടുക്കുവാൻ നോക്കിയിട്ടും ഇടയ്ക്ക് കാൽമുട്ട് വെട്ടുന്നുണ്ട് ………

റോഡിൽ നിന്ന് വീട്ടിലേക്കുള്ള കുറുക്കു വഴി ചാടുമ്പോൾ പണ്ടത്തെ പോലെ ഭയം തോന്നിയില്ല….. അതിനപ്പുറം മനസ് മരച്ചു പോയിരുന്നു…..

പലപ്പോഴും കേട്ടിട്ടുള്ളവ ആണെങ്കിലും വീണ്ടും നൊന്ത് പോവും…..

ട്രാൻസ്‌ഫോർമർ മറികടന്നുള്ള റബർ തോട്ടത്തിലൂടെ നടക്കുമ്പോൾ, തകർന്ന അവളുടെ കാലുകൾക്ക് പച്ചപ്പുല്ലുകൾ തലോടലായി……..

കൊന്തൻപുല്ലുകൾ അവളുടെ ചുരിദാറിന്റെ പാന്റിൽ കുത്തിനിന്നു……അവ സ്നേഹപ്പുല്ലാത്രേ…… ഉടുപ്പിലൊക്കെ പറ്റിപ്പിടിച്ചിരിക്കും….. തുടച്ചു കളഞ്ഞാലും പോവില്ല…….. അതുപോലെ ആണ് തനിക്ക് നേരെയുള്ള ഈ നാവാട്ടങ്ങളും……

തൂത്താലും തുടച്ചാലും പോകാൻ മടിച്ചു പിന്തുടരുകയാണ്…. പക്ഷേ സ്നേഹത്തോടെ അല്ലെന്ന് മാത്രം……

റബറ് വെട്ടാൻ വരുന്ന ആള്, കെട്ടിയ പടുതയ്ക്ക് കീഴിലേക്ക് കേറി നിന്നവൾ കിതച്ചു…….. സഹിക്കാൻ പറ്റുന്നില്ല….. ഹൃദയം നൊന്ത് വിണ്ടുകീറുകയാണ്…… രക്തം കിനിയുന്നു….

ബാഗ് തോളിൽ നിന്ന് നിലത്തേയ്ക്കിട്ടു കൊണ്ട് വെറും മണ്ണിലേക്ക് അവളിരുന്നു…. മുട്ടുയർത്തി വെച്ചിട്ട്, മോളേ തോളിൽ നിന്ന് തുടയിലേക്ക് പൊക്കിക്കിടത്തി അവളൊരു റബറിലേക്ക് ചാരിയിരുന്നു…..

ദുപ്പട്ടയുടെ അറ്റം കൊണ്ട് മുഖം നന്നായി അമർത്തി തുടച്ചിട്ട്, അത് മുഖത്തേക്ക് തന്നെ ഇട്ട് ഇരുന്നു …… അവളെ പോലെ…… ചാരത്തിനടിയിലെ തീക്കനൽ….. അതായിരുന്നു അവൾ….. ആരും മനസിലാക്കാത്ത സത്യവും അവളായിരുന്നു……. പക്ഷേ ശക്തമായൊരു കാറ്റിന്റെ ആവശ്യമേ ഉള്ളു, ആ കനൽ ആളിതുടങ്ങാൻ…. പിന്നെ തെളിഞ്ഞു കത്താൻ……

💔

ബൈക്ക് ട്രാൻസ്ഫോമറിന്റെ അടുത്ത് വെച്ചിട്ട് ചുറ്റുമൊന്ന് നോക്കിയിട്ടു ദീപൻ റബ്ബർ തോട്ടത്തിലേക്ക് കയറി …. അവളുടെ പുറകെ ആശുപത്രിയിൽ നിന്ന് ഇറങ്ങിയതായിരുന്നു….

അതിനിടയിൽ ഒരു പരിചയക്കാരനെ കണ്ടു….. അവന്റെ അടുത്ത് നിന്ന് പോരാൻ പറ്റിയില്ല… പക്ഷേ ഈ റോഡിലേക്ക് ആണ് വന്നത്… അപ്പോൾ പിന്നെ ഈ തോട്ടം ചാടാതെ പോവലുണ്ടാവില്ല…….. ദീപൻ തന്റെ കാവി മുണ്ട് മുറുക്കി ഉടുത്തു വേഗത്തിൽ കാലുകൾ മുന്നോട്ടു വെച്ചു….

💔

കാലുകളിൽ ഒരു സ്പർശമറിഞ്ഞിട്ടവൾ ഞെട്ടി കണ്ണ് തുറന്നു ദുപ്പട്ട മാറ്റി.. … തൊട്ട് മുന്നിൽ നിറമിഴിയോടെ തന്റെ കാല് പിടിച്ച് ഇരിക്കുന്ന അവനെ കണ്ട് ഭയപ്പാടോടെ അവൾ പുറകിലേക്ക് മലച്ചു……

അവൾ വീഴുമെന്ന് തോന്നിയപ്പോൾ ഒരു കൈ കൊണ്ട് അവളുടെ ചാരി വെച്ച തുടയിലെ കുഞ്ഞിനെ മുറുകെ പിടിച്ചുകൊണ്ടവളുടെ തോളിൽ ബലത്തിൽ പിടിച്ചു മുന്നോട്ട് വലിച്ചിരുത്തി….

കുഞ്ഞിനെ മാറോടടക്കിപ്പിടിച്ചവൾ കണ്ണടച്ചു ………

” ഗീതൂ…. ഓക്കെ അല്ലേ…. ”

അവളുടെ കവിളിൽ തട്ടി ദീപൻ ചോദിച്ചു…..

മറുപടി ഒന്നും കിട്ടാത്തത് കൊണ്ടവൻ ഒരിക്കൽ കൂടി വിളിച്ചു…..

” നിങ്ങൾക്ക് സത്യത്തിൽ എന്താ വേണ്ടത്…. ഞാൻ ഈ സമൂഹത്തിൽ അനുഭവിക്കുന്നതൊക്കെ കണ്ട് രസിക്കാൻ ആണോ ഇങ്ങനെ പുറകെ കൂടിയേക്കുന്നത്…. ”

അവൾ ഒലിച്ചിറങ്ങിയ കണ്ണുനീർ അമർത്തി വലിച്ചു തുടച്ചു…..

” അങ്ങനല്ലെന്നാ പറയാൻ വരുന്നതെങ്കില് വേണ്ട…… ”

സംസാരിച്ചു തുടങ്ങും മുന്നേ ദീപനെ ഗീതു തടഞ്ഞു…

“സഹായിക്കാനാണെങ്കി, എനിക്ക് ഇതെല്ലാം ഉപദ്രവം ആയിട്ടാ തോന്നുന്നത് ”

അവളുടെ അടുത്ത് നിന്ന് എണീറ്റ് മാറി അവൻ അടുത്ത് നിന്ന റബ്ബറിലേക്ക് ചാരി…..

” ഗീതൂ ഇപ്പോഴും ഞാൻ നിന്റെ ഒരു സമ്മതം കാത്തു നിൽക്കുവാ… നീ ഒന്നു സമ്മതിച്ചാൽ മാത്രം മതി, ദേ ഈ നിമിഷം ഞാൻ നിന്നെ കൂടെ കൊണ്ട് പോവാം ”

അവനെ നോക്കി പഠിക്കുകയായിരുന്നു അവളും…..

“ശരി…. ഞാൻ സമ്മതിക്കാം…. ”

ദീപന്റെ മുഖത്ത് കാർത്തികയായിരുന്നു….. കണ്ണുകൾ മാറ്റോടെ തിളങ്ങി… ഉള്ളം കയ്യടിച്ചു കൊണ്ടിരുന്നു …..

” പക്ഷേ ഈ നാട്ടുകാരോടെല്ലാം താൻ പറയണം, നിങ്ങൾ കൂട്ടുകാർ ചേർന്നെന്നെ പീഡിപ്പിച്ചതാണെന്ന്…..വിലയിട്ടുറപ്പിച്ചവരായിരുന്നു അറസ്റ്റ് ചെയ്ത പ്രതികളെന്ന്….. ഈ നാട്ടുകാർ,ഒരു പൊടിക്കുഞ്ഞു പോലും എന്നെ ദുഷിച്ച രീതിയിൽ നോക്കാത്ത ദിവസം, ഇവരെയൊക്കെ പറഞ്ഞു ബോധിപ്പിക്കുന്ന ദിവസം എന്നൊന്ന് ഉണ്ടെങ്കിൽ, അന്ന് ഞാൻ സമ്മതിക്കാം…. എന്താ… പറ്റുവോ….. ”

അതിനവന് ഉത്തരം ഉണ്ടായില്ല……..

പോകാനായി അവൾ മണ്ണിൽ നിന്നെണീറ്റു… ഞരങ്ങിക്കൊണ്ട് എണീറ്റ മോള് കരഞ്ഞു തുടങ്ങി….. നന്ദൂന് വിശന്നു തുടങ്ങിയിരുന്നു…. പാല് കൊടുക്കണം എന്നുണ്ടെങ്കിൽ കൂടി, ദീപൻ അവൾക്കൊരു ശല്യമായിരുന്നു ………

നന്ദുവിന്റെ കരച്ചിൽ കൂടിക്കൂടി വന്നു ….. മോൾക്ക് വിശക്കുന്നുണ്ടെന്ന് ദീപനും മനസിലാക്കി കഴിഞ്ഞിരുന്നു….. മോളുടെ മുടിയിൽ തലോടി അവൻ പതിയെ മുന്നോട്ട് നടന്നു…..

പറമ്പിലൊക്കെ വെച്ച് പാല് കൊടുത്താൽ കൊതി കിട്ടി കുഞ്ഞിന്റെ വയറിനു കേടാണെന്നാ പറയുക…… അവൾ ഒരു നിമിഷം ശങ്കിച്ചു…. ഇല്ല… എന്റെ കുഞ്ഞിന്റെ വിശപ്പിനേക്കാൾ വലുതല്ല പറഞ്ഞ് കേട്ട ശൈലിയൊന്നും……

💔

കുഞ്ഞിനേയും കൊണ്ട് കൈത്തോട് വട്ടം ചാടി ചെല്ലുമ്പോൾ, വരമ്പത്തു സിഗരറ്റും വലിച്ചു ദീപൻ നിൽപ്പുണ്ടായിരുന്നു……

” ഗീതൂ ….. ”

സിഗരറ്റ് തോട്ടിലേക്ക് എറിഞ്ഞിട്ട് പുകയാട്ടി തന്നെ കടന്നു പോയ അവളുടെ പുറകെ അവനും നടന്നു….

” ഗീതൂ, ഡി എൻ എ ടെസ്റ്റിന്റെ കാര്യം……നീ ഒന്നും പറഞ്ഞില്ല… ”

മടിച്ചു മടിച്ചവൻ ചോദിച്ചു…. ഉള്ളിലെ മടി എടുത്തു കാട്ടുന്ന പോലെ അവൻ തലയിൽ ചൊറിഞ്ഞു…..

” ഞാൻ പറഞ്ഞിരുന്നു …. ഇയാള് കേൾകാത്തതാവും…. എനിക്ക് താല്പര്യമില്ല….. എന്റെ കുഞ്ഞാ….. അവൾ എന്റെ മാത്രം ആയിരിക്കുകയും ചെയ്യും….. ”

തിരിഞ്ഞു നോക്കാതെ പറഞ്ഞു കൊണ്ട് അവൾ തെങ്ങുകൾ അതിരിട്ട പാട വഴിയിലൂടെ നടന്നു….

” ഗീതൂ…… പ്ലീസ്….. നീ ഒന്നും അറിയണ്ട…… എന്റെ കയ്യിൽ നിന്ന് തന്നെ കാശെടുക്കാം…. നിനക്കൊരു ചെലവും ഉണ്ടാവൂല.. … മോൾടെ സാമ്പിൾ മാത്രം മതി…. ”

പ്രതീക്ഷയോടെ അവൻ ചോദിച്ചു കൊണ്ടിരുന്നു ….

” ഒരു മുടിനാര് പോലും എന്റെ അറിവോടെ തനിക്ക് കിട്ടാൻ പോവുന്നില്ല ”

പറഞ്ഞിട്ട് കാര്യമില്ലെന്നറിയാവുന്നത് കൊണ്ട് അവൻ പിന്നെയും മടങ്ങിപ്പോവാതെ പുറകെ ചെന്നു….

മോളുണർന്നു കിടക്കുകയാണ്…… ആദ്യം വീഴാൻ പോയപ്പോൾ പിടിച്ചപ്പോൾ മോൾക്ക് രാവിലത്തെക്കാൾ പനി വിട്ട പോലെ തോന്നി…. ചോദിച്ചാലും ഒന്നും പറയില്ല… അതുകൊണ്ട് മോൾടെ പനിയെക്കുറിച്ചവൻ ചോദിച്ചതേ ഇല്ല…

ഗീതുവിന്റെ തോളിൽ കണ്ണും തുറന്നു കിടക്കുന്ന മോളേ നോക്കിക്കൊണ്ട് അവൻ നടന്നു…… നെറ്റിയിലേക്ക് വീണു കിടക്കുന്ന കുഞ്ഞു ചുരുണ്ട മുടികൾ….. നടക്കുന്നതിനനുസരിച്ചവ അനങ്ങുന്നത് കാണാൻ തന്നെ രസമാണ്…. മോള് തറയിലേക്ക് നോക്കിയാണ് കിടപ്പ്…. ഗീതു ദുപ്പട്ട അപ്പോഴും കുഞ്ഞിന് വെയിലേൽക്കാതെ ഇട്ടിരുന്നു….

ഇടയ്ക്ക് കുനിഞ്ഞവൻ മോളേ നോക്കും….. പിന്നെ തല അങ്ങോട്ടും ഇങ്ങോട്ടും ആട്ടും….. കണ്ണിറുക്കും…. നാക്ക് കടിക്കും ….. ക്ഷീണം ആയത് കൊണ്ട് വലിയ ചിരി ഒന്നും ഇല്ല…. പക്ഷേ കുഞ്ഞ് ഉണ്ടക്കണ്ണുകൾ വിരിച്ചു തന്നെ നോക്കുന്നത് തന്നെ ഒരു ഭാഗ്യമായി അവന് തോന്നി…… ദീപൻ അനങ്ങാതിരിക്കുമ്പോൾ ചെരിഞ്ഞു നോക്കും……

അച്ഛൻ …… ഉള്ളിൽ നിറയെ സന്തോഷം തോന്നുവാ….. നല്ലൊരു മനുഷ്യനാവാൻ പറ്റിയില്ല…. പക്ഷേ ഒരു നിമിഷം എങ്കിലും എന്റെ പൊന്നുമോൾടെ അച്ഛനായി ജീവിക്കാൻ ഒരു മോഹം……വ്യാമോഹം…. അതിമോഹം….. അതിൽ ഏതാണോ ആവോ….

അവൻ നെടുവീർപ്പിട്ടു….

ഒരു നിമിഷം മോൾക്ക് പനി വന്നത് നന്നായി എന്ന് തോന്നിയോ….. അറിയില്ല …

ചെങ്കൽപാതയിലേക്ക് കേറുമ്പോഴാണ്, മുകളിൽ നിന്നൊരൊച്ച കേട്ടത്…

” ഗീതുവോയ്…. കൂടെ പുതിയ സംബന്ധക്കാരനാണോ….? ”

ഒരുമിച്ച് മുകളിലേക്ക് നോക്കിയ ഗീതുവും ദീപനും തേങ്ങയിടുന്ന നാരായണേട്ടനെയാ കണ്ടത്……

” ഞാൻ വന്നിട്ട് പറഞ്ഞു തരാം കേട്ടോ….. ഇവരെ ഒന്ന് വീട്ടിലാക്കട്ടെ…. അപ്പോഴേക്കും ചേട്ടനിറങ്ങില്ലേ…. “?

അയാളെ നോക്കി പല്ല് ഞെരിച്ചു ദീപൻ….

അവൾക്കും ദേഷ്യം വന്നു….. ആ ദേഷ്യം അടക്കിപ്പിടിച്ച ശബ്ദമായി ദീപന് നേരെ പുറത്തു വന്നു…..

” താനാരാ ന്റെ കാര്യം അന്വേഷിക്കാൻ….. വീട്ടിലേക്ക് വന്നാൽ വാക്കത്തിഎടുക്കും ഞാൻ…. ”

” വാക്കത്തി എടുത്തോ…. എന്നാലും ദീപൻ വരും… ഉപദ്രവം ആണെങ്കിൽ കൂടി നീ സഹിക്കേണ്ടി വരും …..എനിക്കെന്റെ കൊച്ചിനെ കാണാൻ തോന്നിയാൽ വേണേൽ നട്ടപ്പാതിരയ്ക്കും ഞാൻ വരും…… എനിക്ക് വേണം എന്റെ മോളേ…. അതിപ്പോ എന്ത് ചെയ്തിട്ടായാലും….. ”

അവസാനം പറഞ്ഞതിലൊരു ഭീഷണി ഒളിഞ്ഞിരിക്കുന്ന പോലെ ഗീതുവിന്‌ തോന്നി…. വലിഞ്ഞു മുറുകിയ മുഖത്തോടെ അവൾ നടന്നു…..

വീടിന്റെ മുറ്റത്തു നിന്ന് അകത്തേക്ക് പടികൾ കേറുന്നതിനു മുന്നേ ഗീതു ദീപനെ തിരിഞ്ഞൊന്ന് നോക്കി…. ഉള്ളിൽ എന്തോ പിടച്ചിൽ തോന്നിയിട്ടും അതെല്ലാം സഹിച്ചവൻ പുറത്ത് ചിരിച്ചുകൊണ്ട് അവളെ നോക്കി……

” തിരിച്ചു പൊയ്‌ക്കോളണം…. കണ്ടുപോവരുത് ഞാൻ ഇറങ്ങി വരുമ്പോ ഈ മുറ്റത്ത്…. അല്ലേൽ ചിലപ്പോൾ എന്റെ മോളെക്കുറിച്ചു ഞാൻ മറന്നു പോവും….. വെട്ടിക്കീറും ഈ മുറ്റത്തിട്ട് നിങ്ങളെന്റെ ഏട്ടനെ കൊന്നപോലെ…… ”

ദുപ്പട്ട എടുത്ത് അഴയിലേക്ക് ഇട്ടിട്ടവൾ, വാതിൽ തുറന്നകത്തേക്ക് കയറി…. അവന് മുന്നിൽ ആ വാതിൽ പിന്നെയും അടഞ്ഞു……

മടുത്ത് സ്റ്റെപ്പിലേക്ക് തലയും താങ്ങി അവൻ ഇരുന്നു …. കണ്മുന്നിൽ ഓരോന്ന് നടക്കുന്നപോലെ…… ഗിരി…. ഗീതു…… അവരുടെ അമ്മ…… ഓരോരുത്തരെയും തങ്ങൾ………

പക്ഷേ….. ഇവർക്ക് ആർക്കും അറിയാത്ത മറ്റൊരുവൾ ഉണ്ടായിരുന്നു …… ഗീതുവിനോ അമ്മയ്ക്കോ ആർക്കും അവളെ അറിയുമായിരുന്നില്ലെന്ന് അവനോർത്തു…..

ഗിരി സ്നേഹിച്ചിരുന്ന പെങ്കൊച്ച്….. ഒരാൾ ഉണ്ടെന്ന് തന്റെയും ഗിരിയുടെയും കൂടെ ഉള്ള എല്ലാവർക്കും അറിയാമായിരുന്നു…. അവളെ വെച്ച് ഗിരിയെ ഒതുക്കാൻ, അവനോരോ കരുക്കൾ തങ്ങൾക്ക് എതിരെ നീക്കുമ്പോഴും പദ്ധതി ഇട്ടിരുന്നു ആദ്യം…. പക്ഷേ ആർക്കും കണ്ടുപിടിക്കാൻ പറ്റാത്ത അത്ര വൈഭവത്തിൽ ഗിരി എല്ലാരിൽ നിന്നും അവളെ മറച്ചു പിടിച്ചു……

ഇപ്പോ….. ഈ നിമിഷമാണ് ആദ്യമായി അങ്ങനെ ഒരുവളെ കുറിച്ച് ദീപൻ ചിന്തിച്ചത് തന്നെ….. അകത്തേക്ക് തിരിഞ്ഞു നോക്കിയ അവൻ ഗിരിയുടെ മാലയിട്ട ഫോട്ടോ വാതില്പടിക്ക് മേലെ കണ്ടു…… എങ്ങനെയാ ഗിരീ നിന്നോട് ഞാൻ മാപ്പ് പറയുക……

നിന്റെ പെങ്ങളെ….. അമ്മയെ….. പെണ്ണിനെ ഒക്കെ ഞാൻ കൂടി ചേർന്ന് വേദനിപ്പിച്ചു…… അമ്മയില്ലാതെ….. പെങ്ങളില്ലാതെ അനാഥ പ്രേതത്തെ പോലെ നിന്നെ മണ്ണിട്ട് മൂടിയതിനു കാരണക്കാരൻ ഞാൻ കൂടി അല്ലേ ഗിരീ…..

നോട്ടുകെട്ടുകൾ കണ്ട് കണ്ണ് മഞ്ഞളിച്ചു കുടുംബവും ബന്ധവും എല്ലാം മറന്നു ചാടിയതു നിന്റെയും എന്റെയും തെറ്റായിരുന്നു ഗിരീ…. നിന്നെ സ്നേഹിച്ച കുട്ടി….. അവളോട്‌ ഞാൻ എങ്ങനെയാ പ്രായശ്ചിത്തം ചെയ്യുക……. നിന്നെ അവസാനമായൊന്ന് കാണാൻ പോലും അവൾക്ക് കഴിഞ്ഞിട്ടുണ്ടാവില്ല…. ഇനി അവൾ ജീവിച്ചിരിപ്പില്ലേ…..അവൾക്ക് അതൊക്കെ താങ്ങാൻ പറ്റിയിരിക്കുവോ…. പറ്റിയില്ലെങ്കിൽ…… ഒരു പെൺജന്മം കൂടി താൻ കാരണം ……..

പക്ഷേ നിന്നെ ഒറ്റിയത് നിന്റെ കൂടെ ഉള്ളവർ ആയിരുന്നു….. നിനക്ക് ആരുമറിയാത്തൊരു പ്രണയം ഉണ്ടെന്നും അത്പോലെ അന്ന് നീ വീട്ടിലേക്ക് ഇറങ്ങിയ സമയം പറഞ്ഞു തന്നതും എല്ലാം അവരിലൊരാൾ ആയിരുന്നു… പത്തു കാശിനു കൂടെ കൂട്ടിയവരെ വിശ്വസിക്കരുത്…. നാളെ മുപ്പതു വെള്ളിക്കാശിനു നമ്മളെയും ഒറ്റും അവരെന്ന് കരുതണമായിരുന്നു……. ഇതൊക്കെ ആണ് മനുഷ്യൻ….

ആകാശത്തേക്ക് മിഴി നട്ട് ദീപൻ ഇരുന്നു .. ദിനംപ്രതി നോവ് കൂടുകയാണ്….. അവന്റെ കണ്ണ് നിറഞ്ഞു……

മുടിനാര് പോലും തരില്ലത്രേ അവളെനിക്ക്…. ന്റെ മോളേ…… ഞാൻ എങ്ങനെ ഇനി……..

സാമ്പിൾ കിട്ടാതെ എങ്ങനെ…. അല്ലെങ്കിൽ…. ഏയ്‌….. ഇത് തന്നെ ആണ് നല്ല മാർഗം….. കുഞ്ഞിന്റെ സാമ്പിൾ അവളെക്കൊണ്ട് എങ്ങനെ എങ്കിലും സമ്മതിപ്പിച്ചു മേടിക്കണം……

പെട്ടെന്ന് എന്തോ ഓർത്ത് ചാടിയെഴുന്നേറ്റ് ദീപൻ, അവളുടെ ദുപ്പട്ട അഴയിൽ നിന്ന് അനക്കാതെ എടുത്തു കൊണ്ട് വന്ന് ഇറയത്തേക്ക് വിരിച്ചു….. അകവും പുറവും സൂഷ്മതയോടെ പരിശോധിച്ചു….

ഇല്ല….. ഒരെണ്ണം പോലുമില്ല …..

ദുപ്പട്ടയെടുത്തു മടിയിലേക്ക് വെച്ച്, അത് മുറുക്കെ കെട്ടിപ്പിടിച്ചു കൊണ്ടവൻ കരഞ്ഞു……

ഒരു മുടിനാരെങ്കിലും കിട്ടിയിരുന്നെങ്കിൽ…….. എനിക്കെന്റെ കുഞ്ഞിൽ അവകാശം പറയാമായിരുന്നല്ലോ ദൈവമേ …

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4

💔 മൊഴിയിടറാതെ 💔 : ഭാഗം 5

💔 മൊഴിയിടറാതെ 💔 : ഭാഗം 6

💔 മൊഴിയിടറാതെ 💔 : ഭാഗം 7

💔 മൊഴിയിടറാതെ 💔 : ഭാഗം 8

💔 മൊഴിയിടറാതെ 💔 : ഭാഗം 9