💕നിനക്കായ്‌💕: ഭാഗം 1

രചന: ആമി

Thank you for reading this post, don't forget to subscribe!

മാളു നീ പറയുന്നുണ്ടോ…. ഇല്ല മോളെ ഗായത്രി…അങ്ങനെ നീ ഇപ്പൊ അറിയണ്ട.. പ്ലീസ് ടി.. ഒന്ന് പറ മോളെ.. എന്താ സ്നേഹം… കുറച്ചു മുൻപ് നീ എന്തൊക്കെയാ പറഞ്ഞത്.. എന്നെ വേഗം കെട്ടിച്ചു വിടണം.. എന്റെ ശല്യം ഒഴിവാക്കണം എന്നൊക്കെ അല്ലെ.. അങ്ങനെ ഇപ്പൊ നീ അജുവേട്ടൻ വരുന്നത് അറിയണ്ട… ഗായത്രി പിന്നെ ഒന്നും മിണ്ടാതെ തിരിഞ്ഞു നടന്നു… മാളു അത് കണ്ടു ചിരിച്ചു കൊണ്ട് ഗായത്രിയുടെ പുറകിൽ പോയി കെട്ടിപിടിച്ചു… എന്റെ ഗായു പിണങ്ങിയോ.. പോടീ.. ഞാൻ പറയാം… വേണ്ട.. അജുവേട്ടൻ വരുമ്പോൾ ഞാൻ കാണുമല്ലോ.. അപ്പൊ അറിഞ്ഞോളാം…

ഓഹോ.. എന്ന ഒക്കെ.. പിന്നെ എന്നോട് ചോദിച്ചു എന്റെ ഗായത്രി കൊച്ചു എവിടെ വിശേഷം എന്താ എന്നൊക്കെ… അത് കേട്ടതും ഗായത്രിയുടെ മുഖം തിളങ്ങി.. അവൾ ആകാംഷയോടെ മാളുവിനെ നോക്കി.. മാളു അത് മനസ്സിലാക്കി വേഗം തിരിഞ്ഞു നിന്നു.. അപ്പൊ നീ ഏട്ടൻ വരുമ്പോൾ ചോദിച്ചോ ട്ടോ… ഞാൻ പോകട്ടെ.. ടി പ്ലീസ്.. നല്ല കുട്ടി അല്ലെ.. ഒന്ന് പറ മുത്തേ… അപ്പൊ നീ കാണുമ്പോൾ ചോദിക്കില്ലേ… നിനക്ക് അറിയില്ലേ ടി.. പ്ലീസ് എന്താ പറഞ്ഞത് പറ.. എന്റെ ഗായു..

നിനക്ക് ഏട്ടനെ വിളിച്ചു കാര്യം പറഞ്ഞൂടെ.. നീ അജു ഏട്ടൻ എന്താ പറഞ്ഞത് പറയുന്നുണ്ടോ… ഗായത്രിക്ക് ദേഷ്യം വന്നിരുന്നു.. അത് കണ്ടു മാളുവിന്‌ ചിരിയും… ഒന്നും പറഞ്ഞില്ല.. ഞാൻ വെറുതെ പറഞ്ഞതാ… മാളുവിന്റെ വാക്കുകൾ കേട്ട് ഗായത്രിയുടെ മുഖം മങ്ങി.. മാളുവിനും സങ്കടം തോന്നി… മാളു അവളുടെ തോളിൽ പിടിച്ചു നടന്നു.. സാരമില്ല.. ഒരിക്കൽ നിന്റെ സ്നേഹം എന്റെ ഏട്ടൻ മനസ്സിലാക്കും.. നിന്നെ സ്വീകരിക്കും എന്റെ നാത്തൂൻ ആയി..ഇപ്രാവശ്യം വരുമ്പോൾ എന്തായാലും ഏട്ടനോട് നിന്റെ മനസ്സിൽ ഉള്ളത് പറയണം… ബാക്കി നമുക്ക് പിന്നെ നോക്കാം…

ഗായത്രി ഒരു നെടുവീർപ്പോടെ മാളുവിനെ നോക്കി.. പിന്നെ രണ്ടു പേരും നടന്നു വീട്ടിലേക്കു.. മാളുവിന്റെ വീടിന് മുന്നിൽ നിർത്തിയ ബൈക്ക് കണ്ടതും ഗായത്രിയുടെ മുഖം പ്രകാശിച്ചു.. അവൾ മാളുവിനെ നോക്കി… മാളുവിനും സന്തോഷം തോന്നി… എടി അജു ഏട്ടൻ വന്നു..നീ വാ നമുക്ക് ഇപ്പോൾ തന്നെ പറയാം.. പോടീ വന്നു കയറുമ്പോൾ തന്നെ എന്റെ കാര്യം അല്ലെ പറയേണ്ടത്… എന്ന കുറച്ചു കഴിഞ്ഞു പറയാം.. നീ വാ… ഇല്ല.. ഞാൻ പോട്ടെ പിന്നെ വരാം… ഇന്ന് നീ പറഞ്ഞു കഴിഞ്ഞു പോയാൽ മതി.. ഇന്നത്തോടെ ഇതിന് ഒരു അവസാനം ഉണ്ടാക്കണം..

മാളു ഗായത്രിയുടെ കയ്യിൽ പിടിച്ചു വീടിനു ഉള്ളിലേക്ക് നടന്നു . ഗായത്രിയുടെ നെഞ്ചിടിപ്പ് കൂടി വന്നു.. അകത്തേക്കു വെക്കുന്ന ഓരോ ചുവടുകളും അവൾ പേടിയോടെ വെച്ചു… അകത്തു കയറിയതും പുറം തിരിഞ്ഞു നിൽക്കുന്ന അവനെ കണ്ടതും അവളുടെ കാലുകൾ നിശ്ചലം ആയി.. വിയർപ്പ് തുള്ളികൾ നെറ്റിയിലും കഴുത്തിലും ഒഴുകി ഇറങ്ങി.. കണ്ണിൽ ഇരുട്ട് കയറി… ആ രൂപം തിരിഞ്ഞു നോക്കിയതും ഗായത്രി ഞെട്ടി എഴുനേറ്റു… കിതപ്പോടെ ഗായത്രി ഇരുന്നു.. നെറ്റിയിലെയും കഴുത്തിലേയും വിയർപ്പ് അവൾ ഷാൾ കൊണ്ട് തുടച്ചു.. പിന്നെ മേശയിൽ കൈ എത്തിച്ചു കൊണ്ട് വെള്ളം എടുത്തു കുടിച്ചു..ആ രൂപം ഓർക്കുന്തോറും അവൾക്കു എന്തോ പരവേശം തോന്നി…

ചുറ്റും നോക്കി അവൾ പേടിയോടെ മുറിയിൽ നിന്നും ഇറങ്ങി… അടുത്ത മുറിയുടെ വാതിൽ തുറന്നു അവൾ അതിനുള്ളിൽ കടന്നു വാതിൽ കുറ്റി ഇട്ടു.. പിന്നെ കിടക്കയിൽ കിടക്കുന്ന ആനിയുടെ കൂടെ കേറി കിടന്നു.. അവളുടെ സാമീപ്യം അറിഞ്ഞ ആനി ഗായത്രിയെ ചേർത്ത് പിടിച്ചു കിടന്നു.. ഗായത്രിയും പതിയെ ഉറക്കത്തിലേക്ക് വഴുതി വീണു… മുഖത്തു സൂര്യ രശ്മികൾ പതിഞ്ഞപ്പോൾ ആണ് ഗായത്രി കണ്ണ് തുറന്നത്.. അടുത്ത് കിടന്നു ഉറങ്ങുന്ന ആനിയെ ഉണർത്താതെ ഗായത്രി എഴുന്നേറ്റു അവളുടെ മുറിയിൽ പോയി… ഗായത്രി കുളിച്ചു പ്രാർത്ഥിക്കുമ്പോൾ ആണ് ആനി എഴുനേറ്റു ഹാളിൽ വന്നത്…

ആനിയെ ഒന്ന് നോക്കി ചിരിച്ചു കൊണ്ട് ഗായത്രി വീണ്ടും പ്രാർത്ഥന തുടർന്നു… ആനി സോഫയിൽ ഇരുന്നു ഗായത്രിയെ തന്നെ നോക്കുകയായിരുന്നു… എന്നും രാവിലെ എഴുന്നേറ്റു കുളിച്ചു വിളക്ക് വെച്ചു പ്രാർത്ഥിക്കുന്ന ഗായത്രി അവൾക്ക് ഒരു അത്ഭുതം ആയിരുന്നു.. മൂന്നാറിലെ കൊടും തണുപ്പിൽ പോലും അവൾ ആ ശീലം മാറ്റിയില്ല… അരയ്ക്ക് താഴെ നിൽക്കുന്ന മുടി മുറിക്കാതെ സാരിയും ചുരിദാറും അല്ലതെ മറ്റൊരു വേഷം പോലും ധരിക്കാതെ നടക്കുന്ന ഗായത്രി അവൾക്കു വലിയ ഒരു അത്ഭുതം തന്നെ ആണ്..

എറണാകുളം പോലെ ഉള്ള ഒരു സിറ്റിയിൽ കഴിഞ്ഞിട്ടും അവളിൽ ഒരു മാറ്റവും ഉണ്ടായിട്ടില്ല..ഒരു പൊട്ട് പോലും മാറ്റിയില്ല ആ കറുത്ത ചെറിയ പൊട്ട് അല്ലാതെ… എന്താ ടി ഇങ്ങനെ നോക്കുന്നെ… നെറ്റിൽ പ്രസാദം തൊട്ട് കൊണ്ട് ഗായത്രി ആനിയെ നോക്കി ചോദിച്ചു..ആനി ഒന്ന് ചിരിച്ചു കൊണ്ട് അവളെ നോക്കി.. നിന്നെ കുറിച്ച് ഓർത്തു പോയതാ.. നമ്മൾ ഇപ്പൊ രണ്ടു വർഷം ആവാറായി ഒരുമിച്ചു ജീവിക്കാൻ തുടങ്ങിയിട്ട്… ഇത് വരെ നിനക്ക് ഒരു മാറ്റവും ഇല്ലല്ലോ ഗായത്രി…

ആര് പറഞ്ഞു മാറ്റം ഇല്ലെന്നു.. പഴയ ഗായത്രി അല്ല ഇത്.. ഇത് ഉള്ളിൽ കരയുമ്പോളും ചുണ്ടിൽ ചിരിക്കാൻ ശീലിച്ച ഗായത്രി ആണ്… ഇന്നലെ രാത്രി വീണ്ടും നീ ആ രാക്ഷസനെ സ്വപ്നം കണ്ടു ലെ… മ്മ്..പക്ഷെ എന്റെ മാളുവും ഉണ്ടായിരുന്നു… നിനക്ക് അവരെ ഒക്കെ കാണാൻ തോന്നുന്നില്ലേ ഗായത്രി… ഉണ്ട്.. പക്ഷെ ഈ ജന്മം ഗായത്രി അവരുടെ അടുത്ത് പോവില്ല.. അത് എന്റെ വാശി തന്നെ ആണ്… അതൊക്കെ വിട്.. വെറുതെ അതും ഇതും പറഞ്ഞു നമ്മുടെ സൺ‌ഡേ കുളം ആക്കണ്ട.. പിന്നെ ഇന്നെന്താ പ്ലാൻ… എന്ത് പ്ലാൻ.. എല്ലാ സൺ‌ഡേയും പോലെ ചിക്കൻ ഓർ ഫിഷ് നീ വാങ്ങുന്നു..

ഞാൻ ഉണ്ടാക്കുന്നു.. കഴിക്കുന്നു.. അത്ര തന്നെ.. ഇന്ന് ഒരു ചെയ്ഞ്ചു… ഉച്ച കഴിഞ്ഞു നമുക്ക് ഒന്ന് ഷോപ്പിങ് പോവാ… ഇച്ചായൻ കുറച്ചു പൈസ അയച്ചു തന്നിട്ടുണ്ട്… നിന്റെ ഇച്ചായനു ഇത് തന്നെ ആണോ പണി.. കെട്ട്യോളെ പൈസ കൊടുത്തു വഷളാക്കുന്നുണ്ട്.. ഞാൻ ഒന്നു പറയുന്നുണ്ട്… അയ്യോ മോളെ ചതിക്കല്ലേ.. ജീവിച്ചു പൊയ്ക്കോട്ടേ ഞാൻ… ഗായത്രി ചിരിച്ചു കൊണ്ട് തലയിൽ നിന്നും മുണ്ട് എടുത്തു..ആനി വേഗം എഴുന്നേറ്റു കുളിക്കാൻ പോയി..അന്ന് അവർ രണ്ടു പേരും ഒരുമിച്ചു ഫുഡ് ഉണ്ടാക്കി കഴിച്ചു.. ഉച്ച കഴിഞ്ഞു രണ്ടു പേരും ഷോപ്പിംഗിനു വേണ്ടി മാളിൽ പോയി..

കൊച്ചിയിലെ വലിയ ഒരു മാളിൽ ആയിരുന്നു അവർ പോയത്.. ഗായത്രി സാദാ ഒരു കോട്ടൺ സാരീ ആയിരുന്നു വേഷം..ആനി ആണെങ്കിൽ മോഡേൺ ആയിരുന്നു.. ജീൻസും ടൈറ്റ് ടോപ്പും… രണ്ടു പേരും ആവശ്യം ഉള്ളത് ഒക്കെ വാങ്ങി ഒരു റെസ്റ്റോറന്റിൽ കയറി ഒരു കോഫി ഓർഡർ ചെയ്തു.. കുറച്ചു കഴിഞ്ഞു കോഫി വന്നു അത് കുടിക്കുമ്പോൾ ആണ് ഗായത്രി ഇരുന്നു പരുങ്ങുന്നത് ആനി കണ്ടത്.. അവളുടെ നോട്ടം പോകുന്ന ഭാഗത്തേക്ക് നോക്കിയ ആനി ചിരിച്ചു കൊണ്ട് ഗായത്രിയെ നോക്കി…

ഇവന് എങ്ങനെ അറിയുന്നു നീ പോകുന്ന സ്ഥലം ഒക്കെ… ആ ആർക്കറിയാം… മനുഷ്യനെ ഒരു സമാധാനം തരില്ല… അങ്ങനെ പറയല്ലേ മോളെ.. പണ്ട് നീയും ഇങ്ങനെ ആയിരുന്നല്ലോ… അത് പോലെ ഇപ്പൊ നിനക്ക് തിരിച്ചു കിട്ടി… പോടീ.. നീ വേഗം കുടിക്ക്.. നമുക്ക് പോവാം… ആനി ചിരിച്ചു കൊണ്ട് വേഗം കോഫി കുടിച്ചു.. ഗായത്രി വേഗം തന്നെ അവനെ കാണാതെ എഴുന്നേറ്റു നടന്നു.. റെസ്റ്റോറന്റ് കഴിഞ്ഞു ആശ്വാസതിൽ ശ്വാസം വിട്ടതും ഗായത്രി കണ്ടു ചിരിച്ചു കൊണ്ട് തന്റെ മുന്നിൽ നിൽക്കുന്ന പവനെ.. അവൾ വേഗം ആനിയുടെ കൈ പിടിച്ചു അവനെ മറി കടന്നു നടന്നു..

പവൻ അവൾക്കു പുറകിൽ ഓടി.. എന്റെ ഗായത്രി നീ ഒന്ന് പതുക്കെ പോ… അവന്റെ വാക്കുകൾക്ക് മറുപടി നൽകാതെ ഗായത്രി വേഗം നടന്നു.. അത് കണ്ടു ദേഷ്യം വന്നു പവൻ അവൾക് മുന്നിൽ കയറി നിന്ന് അവൾക്കു തടസ്സം ഉണ്ടാക്കി.. എനിക്ക് പറയാൻ ഉള്ളത് കേട്ടിട്ട് പൊയ്ക്കോ നീ… നിങ്ങൾക്ക് പറയാൻ ഉള്ളത് ഞാൻ കേട്ടു.. എന്റെ മറുപടിയും നിങ്ങൾ കേട്ടു.. ഇനി എനിക്ക് ഒന്നും കേൾക്കാനും പറയാനും ഇല്ല… നിന്റെ നിലപാടിൽ ഒരു മാറ്റവും ഇല്ലേ.. ഇല്ല.. എനിക്ക് പോണം വഴി മാറു…

അവൾക്കു മുന്നിൽ നിന്നും മറി നിന്ന് പവൻ അവളെ പ്രതീക്ഷയോടെ നോക്കി.. അവനെ ഒന്ന് നോക്കുക പോലും ചെയ്യാതെ ഗായത്രി നടന്നു പോയി.. പവൻ അവളെ കണ്ണിൽ നിന്നും മായും വരെ നോക്കി നിന്നു… ഫ്ലാറ്റിൽ എത്തിയ ആനി ഗായത്രിയെ ദേഷ്യത്തിൽ നോക്കി.. അത് മനസിലായി ഗായത്രി അവളോട്‌ ഒന്നും മിണ്ടാതെ മുറിയിലേക്ക് പോകാൻ നിന്നു.. അവളെ തടഞ്ഞു നിർത്തി ആനി.. നീ എന്തിനാ അവനോടു അങ്ങനെ ഒക്കെ പറഞ്ഞത്… പിന്നെ ഇഷ്ടം ആണെന്ന് പറയണോ.. എന്താ പറഞ്ഞാൽ..

എത്ര കാലം ആയി പുറകിൽ നടക്കുന്നു.. പാവം.. ഞാൻ ആരോടും പുറകെ നടക്കാൻ പറഞ്ഞിട്ടില്ല.. പിന്നെ എന്റെ കാര്യം ഞാൻ തുറന്നു പറഞ്ഞതാണ്.. പിന്നെ വീണ്ടും നടക്കുന്നത് എന്തിനാ… നീ ഇപ്പോളും അവനെ കാത്തിരിക്കുകയാണോ… അല്ല.. എന്റെ ജീവിതത്തിൽ ഇനി ഒരു പുരുഷൻ ഉണ്ടാവില്ല.. അത് എനിക്ക് ഉറപ്പാണ്.. ഗായത്രി വെറുതെ നിന്റെ ജീവിതം നശിപ്പിക്കരുത്.. നിന്നെ ഒരു തരി പോലും സ്നേഹിക്കാത്തവനെ നിന്റെ സ്നേഹത്തിന് ഒരു വിലയും നല്കാത്തവനെ ഓർത്തു നീ നിന്റെ ജീവിതം കളയരുത്.. ഇല്ല ആനി.. ഞാൻ ആർക്കും വേണ്ടിയും എന്റെ ജീവിതം കളയില്ല..

ഇത് എനിക്ക് ദൈവം തന്ന ശിക്ഷ ആണ്.. അർഹത ഇല്ലാത്തത് ആഗ്രഹിച്ചതിനു… നിന്നോട് പറഞ്ഞു ജയിക്കാൻ ഞാൻ ഇല്ല.. രാത്രി ഇനി ആ ചെകുത്താനെ സ്വപ്നം കണ്ടു എന്റെ അടുത്ത് വന്നു കിടന്നാൽ ഉണ്ടല്ലോ… ഞാൻ വരും.. നീ ഇച്ചായനോട് സൊള്ളി വാതിൽ കുറ്റി ഇടല്ലേ.. ഹാ.. ആനി ചിരിച്ചു കൊണ്ട് മുറിയിൽ പോയി.. ഗായത്രി കുളിച്ചു ഒരു ചുരിദാർ എടുത്തു ഇട്ടു.. ബാൽക്കണിയിൽ പോയി ആകാശത്തേക്ക് നോക്കി.. ചന്ദ്രൻ തേങ്ങ പൂൾ പോലെ മാത്രം ഉള്ളു.. അത് കണ്ടതും അവളുടെ കണ്ണുകൾ അതിന്റെ ചുറ്റും ഉള്ള നക്ഷത്രങ്ങളെ തിരഞ്ഞു..

എന്തോ കണ്ടെത്തിയ സന്തോഷത്തിൽ ഗായത്രിയുടെ മുഖം തെളിഞ്ഞു.. ഒപ്പം കണ്ണുകളിൽ നനവും… അമ്മ അച്ഛാ… മോൾക്ക്‌ ഇവിടെ സുഖം ആണ് ട്ടോ.. നിങ്ങൾ ഇല്ലാത്ത വിഷമം മാത്രം ഉള്ളു..നിങ്ങൾ സങ്കടപ്പെടല്ലേ ട്ടോ…മോൾക്ക്‌ ഇവിടെ ഒറ്റയ്ക്ക് നിന്ന് മടുത്തു അച്ഛാ.. എന്നെ കൂടെ കൊണ്ട് പോകുമോ.. എന്റെ കുറുമ്പുകൾ എല്ലാം നടക്കുന്നത് എന്റെ അച്ഛന്റെ അടുത്ത് അല്ലെ.. ഇവിടെ എനിക്ക് കുറുമ്പ് കാണിക്കാൻ ആരും ഇല്ല.. അമ്മ.. അമ്മ നേരെത്തെ അങ്ങോട്ട്‌ പോയത് അല്ലെ.. എന്നെ കാണാൻ തോന്നുന്നില്ലേ അമ്മയ്ക്ക്.. വാ അമ്മ.. എന്നെ കൂടെ നിങ്ങളുടെ അടുത്ത് കൊണ്ട് പോ…

ഒരു തേങ്ങലോടെ അവൾ അവിടെ ഉള്ള ചെയറിൽ ഇരുന്നു.. കണ്ണുകൾ നിറഞ്ഞു കാഴ്ച മങ്ങി.. ഗായത്രി കണ്ണുകൾ തുടച്ചു കൊണ്ട് ചുണ്ടിൽ പുഞ്ചിരി വരുത്തി.. ഇല്ല അച്ഛാ.. അച്ഛന്റെ മോളു കരയില്ല ട്ടോ.. അച്ഛൻ വിഷമിക്കണ്ട.. മോളും വേഗം അങ്ങോട്ട്‌ വരും.. എനിക്ക് ഇവിടെ പിടിച്ചു നില്കാൻ പറ്റുന്നില്ല.. എത്ര ഒക്കെ മറന്നാലും ഉള്ളിൽ അയാളുടെ മുഖം ഓടി എത്തുന്നു.. എങ്ങനെ മറക്കും അല്ലെ.. ഇല്ല മറക്കില്ല..ഒരിക്കലും.. എന്റെ ജീവിതം നശിപ്പിച്ച അയാളോട് എനിക്ക് ദേഷ്യം ഇല്ല.. പക്ഷെ എന്റെ അച്ഛന് എന്നെ വിട്ടു പോവാൻ കാരണം അയാള… എന്റെ മനസ്സിൽ പക മാത്രം ഉള്ളു അയാളോട്..

ഗായത്രി എന്തോ ഓർത്തു കൊണ്ട് കഴുത്തിൽ ചുരിദാറിനു ഉള്ളിൽ കിടക്കുന്ന മാല കയ്യിൽ എടുത്തു.. അതിൽ തൂങ്ങി ആടുന്ന ഓം എന്നെഴുതിയ ആലിലയുടെ ആകൃതി ഉള്ള ലോക്കറ്റിൽ നോക്കി.. കണ്ണിൽ നിന്നും ഒരു തുള്ളി അതിൽ വീണു… അർജുൻ മാധവ്… നിങ്ങൾക്ക് ഈ ജന്മം ഞാൻ മാപ്പ് നൽകില്ല.. എന്റെ അച്ഛൻ മരിക്കാൻ കാരണം നിങ്ങൾ ആണ്.. എന്റെ ജീവിതം നശിക്കാൻ കാരണം നിങ്ങൾ ആണ്.. ഈ താലി എന്റെ പ്രതീക്ഷ അല്ല പ്രതികാരം ആണ്… കണ്ണുകൾ നിറഞ്ഞു ഒഴുകുമ്പോളും അതിൽ തെളിഞ്ഞു നിന്നിരുന്നു അവൾക്കു അർജുനോട് ഉള്ള പക.. (തുടരും )