💔 മൊഴിയിടറാതെ 💔 : ഭാഗം 14

നോവൽ
എഴുത്തുകാരി: തമസാ

---

വിജയവും പുച്ഛവും ഇടകലർത്തി അവൾ ചിരിക്കുമ്പോൾ, അവളെ കൊല്ലാനുള്ള ദേഷ്യത്തോടെ ദീപൻ തന്റെ കാൽ ചുവട്ടിലെ മണ്ണ് അന്തരീക്ഷത്തിലേക്ക് ചവിട്ടിത്തെറിപ്പിച്ചു…….ഇത്രയും നേരം വിജയം മുന്നിൽ കണ്ടിട്ട് തോറ്റു പോയവന്റെ അമർഷം……

അത് നോക്കി നിൽക്കെ ഉച്ചിമുതൽ പാദം വരെ സുഖമുള്ളൊരു അനുഭൂതി നിറയുന്നതവളറിഞ്ഞു……. തോൽപ്പിക്കാൻ ശ്രമിച്ചവന്റെ മുന്നിലെ ജയത്തിനു മധുരമേറും………

ഡീ……

മുറ്റത്തെ ചെറുക്കല്ലുകളെയും മണൽത്തരികളെയും ചവിട്ടി ഞെരിച്ചു കൊണ്ട് ദീപൻ, ഗീതുവിന്റെ അടുത്തേക്ക് നടന്നു…. പക്ഷേ അവൾ തെല്ലും കൂസാതെ അവനെ തന്നെ നോക്കി നിന്നു…… ചെന്ന വഴി അവളുടെ മുടിയിൽ കുത്തിപ്പിടിച്ചു കൊണ്ടവൻ അലറി…..

” നിനക്ക് നേരത്തെ പറയത്തില്ലാരുന്നോടീ ഇതൊക്കെ അറിയാമായിരുന്നെങ്കിൽ……. എന്റെ കൊച്ചിന്റെ മുടി നുറുക്കി എടുത്തപ്പോ എങ്കിലും നിനക്ക് തൊള്ള തൊറക്കാൻ മേലാരുന്നോ….. ”

വേദനിക്കുന്നുണ്ടെങ്കിലും അത് പുറത്ത് കാണിക്കാൻ അവളുടെ അഭിമാനം കൊണ്ട മനസിനായില്ല……. അവൾ അവന്റെ കൈ പറിച്ചെടുക്കാൻ ശ്രമിയ്ക്കും തോറും അവൻ ബലം കൂട്ടി……..

” വേണ്ടാ വേണ്ടാന്ന് പലവട്ടം പറഞ്ഞതല്ലെടീ ഞാൻ…… അപ്പൊ നിനക്ക് വാശി…… നിന്നെ കിടത്തിക്കളഞ്ഞിട്ടാണെലും സാമ്പിൾ എടുക്കാൻ എനിക്കറിയാൻ മേലാതോണ്ടൊന്നുമല്ല…… എന്റെ കൊച്ച് നിന്നെ ആശ്രയിക്കുന്ന പ്രായത്തിലായിപ്പോയി……. ”

ദേഷ്യത്തിൽ വായിൽ തോന്നിയതെല്ലാം വിളിച്ചു കൂവുന്നുണ്ടായിരുന്നു ദീപൻ……. കുറച്ചു നേരം കൊണ്ട് തന്നെ അയാൾ ഒരുപാട് സ്വപ്നം കണ്ടിരുന്നു…..മാച്ച് ആണെന്ന് പറഞ്ഞു വരുന്ന ഡി എൻ എ റിപ്പോർട്ട്‌ വരെ കുറഞ്ഞ സമയത്തിനുള്ളിൽ അയാൾ മനസ്സിൽ കണ്ടിരുന്നു…….കുഞ്ഞിനേയും അവളെയും വിജയീഭാവത്തോടെ കൂടെ കൂട്ടുന്നത് ഉള്ളിൽ ആളിപ്പടർത്തിയിരുന്നു…… അവയ്ക്ക് മീതെയാണ് ഗീതു പെട്ടെന്ന് തിളച്ച വെള്ളം കോരിയൊഴിച്ചത്…….ഗീതുവിനേക്കാൾ ഇഷ്ടം കൂടുതൽ ഇഷ്ടം മോളോടാണ്…. അല്ലേലും ഈ കുഞ്ഞിലൂടെ അല്ലേ അവളെ സ്നേഹിക്കാൻ തുടങ്ങിയത്…..

പറയുന്നതിനിടയിൽ അവളുടെ കണ്ണിലേക്കു നോക്കിയ ദീപൻ പെട്ടെന്ന് തളർന്നു……. വേണ്ടായിരുന്നു…..വീണ്ടും ഇങ്ങനെ നോവിക്കരുതായിരുന്നു… തോൽക്കരുത് എന്ന് കരുതി മാത്രം കണ്ണിലൊളിപ്പിച്ചൊരു കണ്ണുനീർ തുള്ളി അവനെ പൊള്ളിച്ചു…..

“മാപ്പ്…. ”

അവളുടെ മുടിയിൽ മെല്ലെ തലോടിക്കൊണ്ട് തല കുനിച്ചവളുടെ നെറുകയിലവൻ ചുംബിച്ചു…… ഒരു തുള്ളി കണ്ണുനീർ അവനിൽ നിന്നടർന്നവളുടെ മാറിലേക്ക് വീണു…. ആ മാറിടവും നിന്റെ കണ്ണുനീർ ആഗ്രഹിച്ചിരുന്നു ദീപൻ……. നിലയ്ക്കാത്ത കണ്ണുനീർ……

അവൻ തളർന്നെന്ന് തോന്നിയ നിമിഷത്തിൽ അവന്റെ ജനനേന്ദ്രിയത്തിന് മേൽ ഗീതുവിന്റെ വലത്തേ മുട്ടുകാൽ ഊക്കോടെ പതിഞ്ഞിരുന്നു…..

” അമ്മ്മ്മ്……… മേ………………… ”

ഉറക്കെ നിലവിളിച്ചു കൊണ്ടവൻ തറയിലേക്ക് മുട്ടുകുത്തി വീണു….. മുറിഞ്ഞിരുന്ന മുട്ടുകാൽ നിലത്തിടിച്ചിട്ട് അവനുറക്കെ കരഞ്ഞു……..

വേദനയ്ക്ക് മേലെ കൈവിരലമർത്തുമ്പോൾ അവന്റെ കണ്ണിൽ നിന്നും ചുടു ചോര പോലെ കണ്ണുനീർ നിലത്തേക്ക് ധാരയായി വീണു….. ഒപ്പം, ദീപൻ അവന്റെ നെറ്റി തറയിലേക്കമർത്തി ഞെളിപിരി കൊണ്ട് മൂളി…..

ഒരിക്കൽ ഞെരിച്ചുടച്ച തുടയെല്ലുകൾ പ്രതികാരം ചെയ്തിരിക്കുന്നു…… !!!!!!

തന്റെ പ്രതികാരമടങ്ങിയ സന്തോഷത്തിൽ ആ എല്ലുകൾ ഞൊട്ടയൊടിച്ചു ശബ്ദമുണ്ടാക്കി….

നെഞ്ചും മർമ സ്ഥാനവും തടവിക്കൊണ്ട് അവൻ പരവേശം കാണിക്കുന്നത് ആത്മനിർവൃതിയോടെ ഗീതു കൈ കെട്ടി നിന്നു കണ്ടു…………..

” ഗീതൂ…..ഇച്ചിരി വെള്ളം താടീ…. ചങ്കെരിയണു ഡീ… . ”

ചുമരിലേക്ക് ചാരി ഇരുന്നു കൊണ്ടവൻ പറഞ്ഞെങ്കിലും അവളത് കേൾക്കാത്ത ഭാവത്തിൽ തന്നെ നിന്നു…

“ഗീതൂ…….. ”

ദയനീയമായ അവന്റെ വിളിയിൽ അവൾ അകത്തു നിന്ന് തണുത്ത വെള്ളം ഒരു കപ്പിലാക്കി അവന്റെ മുന്നിലേക്ക് വെച്ച് കൊടുത്തു…

ദീപൻ കപ്പെടുത്തു വായിലേക്ക് ചേർക്കവേ അവന്റെ കൈത്തണ്ടയിൽ അവൾ മുറുകെ പിടിച്ചു….

” ഇതുപോലെ വേദനിച്ചു ഞാനും കിടന്നിരുന്നു…… ഇതിലുമേറെ നൊന്തിരുന്നു………പത്തു മിനിറ്റ് വേദന ഇയാൾക്ക് താങ്ങാൻ പറ്റിയില്ലല്ലേ…… പക്ഷെ ഒരു രാവ് മുഴുവൻ ഞാൻ പാതി ബോധവുമായി കിടന്നിട്ടുണ്ട്….. അടുത്ത് വരുന്ന ഓരോരുത്തരോടും ഒരിറ്റ് വെള്ളം ചോദിച്ചിട്ടുണ്ട്…… അന്ന് നിങ്ങളോരോരുത്തരും എന്താണ് ചെയ്തതെന്ന് ഓർത്തു നോക്ക്……..

ഇതോരോന്നും കാലമെനിക്കായി കരുതി വെച്ച നീതിയാണ്……. കാക്കിക്കുപ്പായത്തിനും കണ്ണ് കെട്ടിയ ദേവതയ്ക്കും തരാൻ പറ്റാതെ പോയത് എന്റെ കണ്മുന്നിൽ നിങ്ങളെ ഓരോരുത്തരെയും കാലം നിർത്തിത്തരും…….

അന്നേ എന്റെ ഉള്ളിലെ സ്ത്രീയുടെ ദാഹം തീരൂ…… കാമദാഹമല്ല…..വ്രണപ്പെട്ട മനസുള്ളവളുടെ, നീതിയ്ക്ക് വേണ്ടിയുള്ള ആത്മദാഹം…… അർഹിക്കുന്ന ന്യായം ലഭിക്കാതെ പോയവളുടെ വരണ്ടുണങ്ങിയ ഉള്ള് നനയിക്കാൻ നിങ്ങളുടെ ചെറു വേദനയോ മോഹഭംഗങ്ങളോ ഒന്നും പോരാ….. സമ്പൂർണ പരാജയം ഏറ്റു വാങ്ങി, മരണം പോലും ഇവന് കിട്ടുന്ന കുറഞ്ഞ ശിക്ഷയാണെന്ന് എന്റെ കാതുകൾ കേൾക്കണം……..അതുവരെ കുത്തിക്കെടുത്താൻ പറ്റാത്തൊരു നെരിപ്പോടുള്ളിൽ പേറും ഞാൻ……. “”

അവൻ അവളുടെ മുഖത്തേക്ക് തന്നെ നോക്കിയിരുന്നു…… ഒരുപാട് മാറിപ്പോയി ഗീതൂ നീ…………

അവന്റെ ഉള്ള് പിന്നെയും പറഞ്ഞു…….

ഗീതു കയ്യെടുത്തു മാറിയിരുന്നു……..

ഇത്രയും നേരം വെള്ളം കുടിക്കുവാൻ വരണ്ട തൊണ്ട മരിച്ചപോലെ……… വെള്ളം ഇറങ്ങാത്തതു പോലെ തോന്നി അവന്……. വായിലൊഴിച്ചതിൽ പാതി വെള്ളം കവിളിൽ കൊണ്ട് അവൻ അവളെ തന്നെ നോക്കി……….. കരുവാളിച്ച മുഖം ചുവന്നിട്ടുണ്ട്……. ദേഷ്യം കൊണ്ടാണ്………

💔

ഭിത്തിയിലേക്ക് ചാരി ഇരിക്കുന്ന ദീപനെ ഒന്ന് നോക്കിയിട്ട് അമ്മയുടെ മുറിയിലേക്ക് ഗീതു പോയ നേരത്താണ് ജലജ ചേച്ചി വന്നത്…… ദീപനെ അവിടെ കണ്ടിട്ട് അവരൊന്ന് സംശയിച്ചു……

ചെരുപ്പ് പതിയുന്ന ഒച്ചകേട്ട് കണ്ണ് തുറന്നു നോക്കിയ ദീപൻ അവരെ കണ്ടിട്ടൊന്ന് പതറി….

“ഗീതുവില്ലേ? ”

” ഉണ്ട് അവള് അകത്താ…..അടുക്കളയിൽ…. ”

പതർച്ച മറച്ചു വെച്ച് കൊണ്ട് അവൻ ഉത്തരം കൊടുത്തു……

” മോനേതാ….. കണ്ടിട്ടില്ലല്ലോ…….. സൊന്തക്കാരാണോ? ”

അവരുടെ അടിമുടി നോക്കിയുള്ള സംസാരം അവന് ഇഷ്ടമായില്ല…. സ്വന്തക്കാരൻ ആണോന്ന്….. അവന്റെ മുഖം അനിഷ്ടം കൊണ്ട് മൂടി…..

” സൊന്തോം കുന്തോം ഒന്നുമല്ല….. ഞാനെന്റെ കൊച്ചിനെ കാണാൻ വന്നതാ ”

മറുപടി കൊടുത്തു കൊണ്ട് ഭിത്തിയിൽ പിടിച്ചവൻ എഴുന്നേറ്റു…..

” നന്ദൂട്ടിയുടെ അച്ഛനോ….. അതെങ്ങനെയാ……?

പെട്ടെന്ന് കേട്ട ആകാംക്ഷയിൽ അവരുടെ നാവിൽ നിന്ന് മറുചോദ്യമാണ് തിരികെ വന്നത്……

” അങ്ങനേം ഇങ്ങനേം ഒന്നുമില്ല….. എന്റെ കൊച്ചിന്റെ അപ്പൻ ഞാൻ മാത്രമാ…… മനസിലായില്ലേ…… വന്ന കാര്യം നോക്കി പോവാൻ നോക്ക് തള്ളേ…… ”

ആ സ്ത്രീയെ ഒന്നിരുത്തി നോക്കിയിട്ട് പതിയെ വണ്ടിയുടെ അടുത്തേക്ക് അവൻ നടന്നു……

പുറത്തെ ഉറക്കെയുള്ള സംസാരം കേട്ട് ഗീതു വന്നപ്പോഴേയ്ക്കും അവൻ പോയിരുന്നു….

” എന്താ ചേച്ചി രാവിലെ? ”

അവളെ മൊത്തത്തിൽ അവരൊന്നു വീക്ഷിച്ചു…. അതിന്റെ അർത്ഥം അവൾക്കും മനസിലായി….

” മോൾക്ക് പനി എങ്ങനെ ഉണ്ടെന്നറിയാൻ വന്നതാ ഗീതൂ….. നിന്നെ വിളിച്ചിട്ട് കിട്ടണില്ലാരുന്നു….. ഓഫാണെന്നാ പറഞ്ഞത്….. ”

ഫോണിൽ രാവിലെ അലാറം അടിച്ചില്ലല്ലോ എന്ന് അവളപ്പോൾ ഓർത്തു…… ആവശ്യം വരാറില്ലേലും അലാറം വെച്ചിട്ടുണ്ട്…….

” കേറി വാ ചേച്ചി…… മോൾക്ക് സുഖായി……. രാത്രി തന്നെ പനി വിട്ടിരുന്നു…… ”

അത് പറഞ്ഞിട്ട് അകത്തേക്ക് നടക്കുമ്പോൾ രാവിലെ ഒന്ന് മോളേ തൊടാൻ പോലും തനിക്കായില്ലല്ലോ എന്നവൾ ഓർത്തു……

സ്റ്റെപ്പുകൾ കയറി, ഗീതുവിനൊപ്പം ജലജയും മോൾടെ അടുത്തേക്ക് ചെന്നു…..

” നിന്നെയാണേൽ വിളിച്ചിട്ടും കിട്ടുന്നില്ല…. നീ ഇന്നലെ പണിയ്ക്കും വന്നില്ലാലോ…. അതുകൊണ്ട് നേരം വെളുത്തപ്പോ തന്നെ ഇങ്ങട്ട് പോന്നു…… പേടിച്ചാ ഇവിടെ വരെ വന്നത് ”

മോളേ ഗീതു തലോടികൊണ്ടിരുന്നു….. കുഞ്ഞ് നല്ല ശാന്തമായി ഉറങ്ങുകയായിരുന്നു…..

” മോളേ, നന്ദുവിന്റെ അച്ഛൻ ആണെന്ന് ആ ചെറുക്കൻ പറഞ്ഞുലോ…. ”

ഇങ്ങനൊരു സംഭാഷണം നടന്നു കാണും എന്ന് പ്രതീക്ഷിച്ചാൽ അവൾ ചുമ്മാ ചിരിച്ചു വിട്ടു…..

” നേരാണോ മോളേ ”

” ചേച്ചിക്ക് എല്ലാം അറിയാവുന്നതല്ലേ….. അയാള്…… അയാൾക്കെന്തോ പ്രാന്താണ്…… കുറച്ചു ദിവസമായി പുറകിനു വരുന്നു…… ഞാൻ മൈൻഡ് ചെയ്യാറില്ല….. ”

അവള് പറഞ്ഞത് വിശ്വസിക്കാൻ അവർക്കായില്ല….

” അല്ല….. ഒന്നൂല്ലെങ്കിൽ പിന്നെ ഈ കൊച്ചു വെളുപ്പാൻ കാലത്ത് അവനെന്താ ഇവിടെ……. ”

ചങ്കിനകത്തെന്തോ തിങ്ങുന്നത് പോലെ അവൾക്ക് തോന്നി…… തെറ്റ് ചെയ്യാതെ ചോദ്യം ചെയ്യപ്പെടുമ്പോൾ ഉണ്ടാകുന്ന മാനസിക ബുദ്ധിമുട്ട്……

” ചേച്ചി, അയാള് കൊച്ചിനെ കാണാൻ വന്നതാ…. ഇന്നലെ ആശുപത്രിയിൽ വെച്ച് മോൾക്ക് പണിയാണെന്ന് അറിഞ്ഞു….. അതാണ് ഈ വെളുപ്പിനയാൾ വന്നത്….. ”

കള്ളം പറയുന്നത് നല്ലതിന് വേണ്ടി അല്ലേ എന്നവളുടെ മനസ് പറഞ്ഞു….

അരക്ക് കീഴ്പോട്ട് ഒരു അണു പോലും വിടാതെ വേദനിക്കുകയായിരുന്നു ദീപന്…. ഗിയർ മാറാൻ അവൻ വല്ലാതെ ബുദ്ധിമുട്ടി…….. പക്ഷേ ഉള്ളിലെ വിഷമം ഗീതുവിനെ ഓർത്തിട്ടായിരുന്നു…… അതോടൊപ്പം ഇനി നിനിലിനെ അവൾക്ക് ഇഷ്ടമായിരിക്കുമോ എന്ന ഭയവും അവന്റെ ഉള്ളിൽ പിടികൂടി…….

മുന്നോട്ട് പോകും തോറും അവന് തല വേദനിച്ചു പൊട്ടുന്ന പോലെ തോന്നി…..

ഇല്ല…. ഞാൻ അവളെ ആർക്കും വിട്ടു കൊടുക്കില്ല നിനിലേ…… അവളെന്റെയാ….. ദീപന്റെ മാത്രമാ….. എന്റെ കുഞ്ഞോൾടെ അമ്മയെ ഞാൻ വേറാർക്കും കൊടുക്കൂല……. തരികേല ദീപൻ……. അവൾടെ ഉള്ളിലെങ്ങാനും നീയുണ്ടെന്നറിഞ്ഞാൽ പിന്നെ പിറ്റേന്ന് നിന്റെ അടക്കം ആയിരിക്കും……..

© തമസാ ലക്ഷ്‌മി…….

ഞായർ, ബുധൻ മാത്രമേ കഥ ഉണ്ടായിരിക്കുള്ളൂ…. എക്സാം ഉള്ളതല്ലേ….. റിപ്ലൈയും ഒക്ടോബർ 5 ന് തരാട്ടോ…… ഇന്ന് കുറച്ചു തിരക്കായി പോയി .. …അതാണ് കുറഞ്ഞു പോയത്….

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4

💔 മൊഴിയിടറാതെ 💔 : ഭാഗം 5

💔 മൊഴിയിടറാതെ 💔 : ഭാഗം 6

💔 മൊഴിയിടറാതെ 💔 : ഭാഗം 7

💔 മൊഴിയിടറാതെ 💔 : ഭാഗം 8

💔 മൊഴിയിടറാതെ 💔 : ഭാഗം 9

💔 മൊഴിയിടറാതെ 💔 : ഭാഗം 10

💔 മൊഴിയിടറാതെ 💔 : ഭാഗം 11

💔 മൊഴിയിടറാതെ 💔 : ഭാഗം 12

💔 മൊഴിയിടറാതെ 💔 : ഭാഗം 13