💔 മൊഴിയിടറാതെ 💔 : ഭാഗം 8

നോവൽ
എഴുത്തുകാരി: തമസാ

Thank you for reading this post, don't forget to subscribe!

---

ഹെൽമറ്റ് വെക്കാത്ത ദീപന്റെ തലയിലെ നീളൻ മുടികൾ കാറ്റിന്റെ വേഗത്തിൽ പാറിക്കൊണ്ടിരുന്നു…… ചീറി പായുന്ന വാഹനത്തേക്കാൾ വേഗമുണ്ടായിരുന്നു, അവന്റെ ഉള്ളിലെ വേദനയ്ക്ക്….. കണ്ണുനീരിനെ ഒഴുകാൻ വിടുമ്പോഴും തിരയടങ്ങാത്ത കടലായിരുന്നു അവന്റെ മനസ്….കൂറ്റൻ തിരമാലകൾ അവന്റെ ഹൃദയമിടിപ്പിനെ ഉയർത്തുകയും താഴ്ത്തുകയും ചെയ്യുന്നുണ്ടായിരുന്നു….

“അച്ഛേടെ കുഞ്ഞോളേ ……, ”

ഒടുവിൽ ഒരു ഗദഗ്‌ദമായി അവ നാവിൽ നിന്നും ഉതിർന്നു വീണു….. ബ്രേക്കിൽ കൈ വിരലുകൾ മുറുകി…. ഇരമ്പലോടെ ബൈക്ക് ഒന്ന് കുതിച്ചിട്ടു നിന്നു…..

തളർച്ചയോടെ, പുറകിലേക്ക് ഇറങ്ങിയിരുന്നിട്ട് ദീപൻ പെട്രോൾ ടാങ്കിലേക്ക് തല വെച്ച് കിടന്നു… ടാങ്കിനു മുകളിലെ സീറ്റ്‌ ബാഗിൽ കൈ മുറുകെ പിടിച്ചൊന്ന് തേങ്ങി …….

ഉള്ളിലെ നോവ് താങ്ങാൻ വയ്യാതെ ധൃതി പൂണ്ടു ബാഗിൽ തപ്പി…. ചെറുതായ് നനവേറ്റിരുന്ന വിൽസ് കവർ കുടഞ്ഞു കൊണ്ടെടുത്തു, ചുണ്ടിലേക്ക് വെച്ചു…. കയ്യിൽ തടഞ്ഞ തീപ്പെട്ടി ഉരച്ചിട്ടും കത്തുന്നുണ്ടായിരുന്നില്ല .. വീണ്ടും വീണ്ടും ശ്രമിച്ചിട്ടും കത്താത്ത തീപ്പെട്ടിയും കൊള്ളിയും നടുറോഡിലേക്ക് അവൻ വലിച്ചെറിഞ്ഞു….

ചുറ്റും നോക്കി, കുറച്ച് ദൂരെ കണ്ട പെട്ടിക്കടയോട് ചേർത്ത് വീണ്ടും വണ്ടി കൊണ്ട് പോയി നിർത്തി, ലാംപ് ലൈറ്റർ വാങ്ങി വിൽസ് കത്തിച്ചു….. ആഞ്ഞാഞ്ഞൊരോ പഫ് എടുക്കുമ്പോഴും അവന്റെ ശ്രദ്ധ ഗീതുവിലും കുഞ്ഞിലുമായിരുന്നു ……

എന്ത് അർഹത ഉണ്ട് തനിക്കാ മോളേ വേണം എന്ന് പറയാൻ…… !!…ഇല്ല… ഒരു അർഹതയുമില്ല…. പക്ഷേ മോഹിച്ചു പോയി….. പ്രെഗ്നന്റ് ആയിരിക്കെ, അവളേ കൂടെ കൂട്ടാൻ വേണ്ടി ഈ നശിച്ച നാട്ടിലേക്ക് വണ്ടി കേറിയാലോന്ന് ആലോചിച്ചതാ… എന്നാലും പേടിയാരുന്നു…. അനീറ്റയെ പോലെ…. ഗീതു ……. അവളേ ഇനിയും… തോല്കുന്നവന്റെ വിധിയാണിത്… മുന്നേ ചെയ്ത പാപങ്ങൾ പിന്തുടരും…….

തന്റെ കൂട്ടുകാരിൽ ആര് കുടുംബ ജീവിതം തുടങ്ങിയാലും ഇത് തന്നെ ആവും സ്ഥിതി….. ഇടയ്ക്ക് വെച്ച് നന്നാവാൻ തീരുമാനിച്ചാലും പുറകിൽ നിന്ന് അരിഞ്ഞു വീഴ്ത്തപ്പെടും…. ഭാര്യ…. കുഞ്ഞ്….. അവരുടെ ഗതി ഓർക്കാൻ കൂടി വയ്യ……

മോളെ ഗീതു പ്രസവിക്കുന്നതിനു മുന്നേ നാട്ടിലേക്ക് അവളേ തേടി വരാഞ്ഞതും അതുകൊണ്ടാ… എവിടെ എങ്കിലും തനിക്ക് പിഴച്ചാൽ… !!!

അല്ലേലും നേരല്ലാത്ത വഴിക്ക് നടന്നവന് പറഞ്ഞിട്ടുള്ളതല്ല പെണ്ണും കുഞ്ഞും ഒന്നും…..

എന്ന് കരുതി ന്റെ….. ന്റെ കുഞ്ഞിനെ എനിക്ക് വേണ്ടാന്ന് പറയാൻ ഒക്കുവോ…… ഇല്ല…. ഒരിക്കലും ഒക്കുകേല….. ഞാൻ ഇല്ലെങ്കിൽ കൂടി സമാധാനത്തോടെ മോളെയും കൊണ്ട് ജീവിക്കാനുള്ള മാർഗം നിനക്ക് ഉണ്ടാക്കി തന്നിട്ടേ ഗീതൂ ഞാൻ മരിക്കൂ…..”

ആാാ……………ാാാഹ്

കത്തിയെരിഞ്ഞൊടുവിൽ കയ്യിൽ ചൂടെത്തിയപ്പോഴാണ് ദീപൻ വിൽസിന്റെ ചൂടറിഞ്ഞത്….

“ഒരു സോഡ ഉപ്പിട്ട് എടുത്തോ ചേട്ടാ.. ”

കടക്കാരനോട് സോഡ വാങ്ങിച്ചതിലേക്ക് ഇത്തിരി ഉപ്പും ചോദിച്ചു വാങ്ങി ഇട്ടു…. നുരഞ്ഞു പൊങ്ങി സോഡ പുറത്തേക്കൊഴുകി……

തൊണ്ടയിലേക്ക് നീരിറങ്ങുമ്പോഴും ഉൾചൂടിലവന്റെ നെഞ്ച് തിളച്ചു…

💔

ഗീതു, കുളി കഴിഞ്ഞു കേറി വരുമ്പോഴും നീനയും ചേട്ടായിയും അവിടെ തന്നെ ഉണ്ടായിരുന്നു… നന്ദു മോള് നീനയുടെ മടിയിലുരുന്നു കൊണ്ട് നിനിലിനു നേരെ തിരിഞ്ഞോരോ കുറുമ്പുകൾ കാട്ടുന്നുണ്ട്….. നിനിൽ കുഞ്ഞാറ്റയുടെ തുടയിൽ പിച്ചും… അവള് തിരിച്ച് അവന്റെ മൂക്കിൽ ഇടിയ്ക്കും…. മൂന്ന് പേരും ഇടയ്ക്ക് ഉറക്കെ ചിരിക്കുന്നുണ്ട്….

ബാ… പോകാം….

ചിരിച്ചു കൊണ്ട് ഗീതു അത് പറഞ്ഞപ്പോഴാണ് അവളെ അവർ കാണുന്നത്…. നന്ദൂട്ടിയുടെ കളിചിരിയിൽ അവരത്ര ലയിച്ചു പോയിരുന്നു…

“ആ… നീ നടന്നോ… മോളെ വീട്ടിലാക്കി തരാം.. നീയാകെ നനഞ്ഞു നിക്കുവല്ലേ ….. ”

നീനയുടെ കയ്യിൽ നിന്നും കുഞ്ഞിനെ വാരി കയ്യിലെടുത്തു കൊണ്ട് അവൻ പറഞ്ഞു…

“നിനക്ക് പേടിയുണ്ടോ ഗീതൂ അവനെ….? ‘”

നടക്കുന്നതിനിടയിൽ ഗീതുവിന്‌ നേരെ തിരിഞ്ഞവൻ ചോദിച്ചു…

നീനയും അവളുടെ മറുപടി അറിയാൻ കാത്തു ….

” എന്തിനാ ഡാ…. പണ്ടത്തെ ഗീതു അല്ലാലോ….ഇപ്പൊ ഒരു പേടീം ഇല്ല… പിന്നെ അയാൾക്ക് ഒരിക്കലും മോൾക്ക് വേണ്ടി എന്നെ കൊല്ലാൻ തോന്നില്ല…. അല്ലായിരുന്നേൽ ആ കണക്കിനെങ്കിലും പേടിക്കായിരുന്നു …. ”

പറയുന്നതിനിടയിൽ ഒരു കൈ കൊണ്ട് നൈറ്റിയുടെ മേലെ പുതച്ച മേൽ മുണ്ട് അവളൊന്നുകൂടി മാറോടു വലിച്ചു പിടിച്ചു…

” എന്നാലും നീയൊന്ന് കരുതി ഇരുന്നോ കേട്ടോ… ”

മ്മ്….

അവളൊന്നു മൂളിക്കൊണ്ട് തലയാട്ടി ……

ഗീതു ഡ്രസ്സ്‌ മാറി വരുന്നത് വരെ മോളെയും കൊണ്ട് പുറത്തു നിന്നു…. അവൾ വന്നപ്പോൾ മോളെയും കൊടുത്തിട്ട്, നീനയുടെ തോളിൽ പിടിച്ചു കൊണ്ട് നിനിൽ വീട്ടിലേക്ക് നടന്നു…

” ചേട്ടായിക്ക് ഇച്ചേച്ചിയെ ഇപ്പോഴും ഇഷ്ടമാണല്ലേ…… ”

നീനയുടെ അപ്രതീക്ഷിത ചോദ്യത്തിന് അവനൊന്നു ഞെട്ടി……

” എനിക്ക് എന്നും അവളേ സ്നേഹിക്കാൻ മാത്രേ കഴിയൂ മോളേ….. ”

.അവന്റെ മുഖത്ത് പടർന്ന നിസ്സംഗത അവൾ നോക്കി കണ്ടു..

” ചേച്ചിക്ക് അറിയാവോ ചേട്ടായീ? ”

” ഏയ്‌ ഇല്ല… .. ഞാൻ പറയാഞ്ഞത് നന്നായി അല്ലേ മോളേ… അല്ലാരുന്നേൽ അവളുടെ സങ്കടങ്ങളിലൊന്ന് ഞാനായേനെ….. നന്നായി …. വളരെ നന്നായി പറയാൻ കാലം അനുവദിക്കാഞ്ഞത് … ”

നീനയുടെ തോളിൽ തന്റെ നൊമ്പരം തട്ടിയിറക്കി അവൻ ചിരിക്കാൻ ശ്രമിച്ചു നിരുപാധികം പരാജയപ്പെട്ടു …..

💔💔

രാത്രി, ഉറക്കത്തിനിടയിൽ മോളേ സ്വപ്‍നം കണ്ട് എണീറ്റത്തിന് കൂടെ തന്നെ മോൾക്ക് ചെറിയ ചൂടുണ്ടെന്ന് ഗീതുവിന്‌ തോന്നി…. വിളിച്ചെണീപ്പിച്ച് ഇരുന്ന മരുന്ന് എടുത്തു കൊടുത്തിട്ട് മോളേ പിന്നെയും ഉറക്കി എങ്കിലും, അവൾക്ക് ഉറങ്ങാൻ പറ്റിയില്ല… അല്ലേലും മരുന്ന് കൊടുത്തിട്ട് കൂടെ കിടന്നുറങ്ങരുത് ആരാണെങ്കിലും…. ഉറക്കത്തിൽ, മരുന്ന് വിപരീതമായി പ്രവൃത്തിച്ചാലും നമ്മളും ഉറങ്ങിയാൽ അറിയില്ലല്ലോ….

മോളുടെ താടിച്ചുഴിയിൽ മെല്ലെ ഒന്ന് തൊട്ടിട്ട് അവളെ നോക്കി ഗീതു കിടന്നു….. ഓർക്കാൻ ഒരുപാട് ഉള്ളത് കൊണ്ട് പിന്നെ ഉറങ്ങേണ്ടി വന്നില്ല …. രാവിലെ തന്നെ കുര്യാച്ചനെ വിളിച്ചു പറയണം ഇന്ന് പണിക്ക് വരില്ലെന്ന് ……

💔💔💔

ഇത്തിരി അധിക നേരം കൂടി ഒന്ന് മയങ്ങാൻ ശ്രമിച്ചു തോറ്റിട്ട് ഗീതു അമ്മയുടെ അടുത്തേക്ക് ചെന്നു….. പിന്നെ ഓരോ പണികൾ ചെയ്തിട്ട്, അടുക്കളയിലേക്ക് വെള്ളം കോരാൻ കലവും എടുത്ത് ഇറങ്ങിയപ്പോഴാണ് ദീപൻ വന്നത്…

“എന്താണാവോ… എന്നും ഈ ഒപ്പിടൽ ഉണ്ടാകുവോ ഇവിടെ? ”

അവൾക്ക് നേരെ, സങ്കടം പെയ്യുന്ന ചിരിയോടെ നടന്നു വന്ന്, ഇറയത്തേക്ക് കേറി ഇരുന്നു, ദീപൻ….. അവനെ തന്നെ നോക്കികൊണ്ട് ഗീതുവും…

” ഗീതൂ… ഞാൻ വന്നത് DNA ടെസ്റ്റ്‌ നടത്തുന്ന കാര്യത്തെ കുറിച്ച് സംസാരിക്കാനാ….. ഇപ്പൊ തിരക്കാണേൽ നീ ഫ്രീ ആവുന്ന സമയം പറ….. ”

അവനെ ശ്രദ്ധിച്ചു കൊണ്ട് അവളും ഇറയത്തിന്റെ ഒരു വശത്തേക്ക് നീങ്ങി നിന്നു….

ആരുടെ DNA ആണ് ഇപ്പോ തനിക്കു ടെസ്റ്റ്‌ ചെയ്യണ്ടത്?

അവൾ തനിക്കു നേരെ ഇരുന്നു പറയുന്ന ഓരോന്നിലും പുച്ഛം തന്നെ ആണ്, ശാന്തതയ്ക്ക് മേലെയും തെളിഞ്ഞു കിടക്കുന്നത് അവനറിഞ്ഞു….

“എന്റേം മോൾടേം….. എനിക്കറിയണം ഗീതൂ…. എന്റെ കുഞ്ഞാണ് അവൾ എന്ന് പറയണം എനിക്ക്…. തെളിവില്ലെന്നല്ലേ പറഞ്ഞത്…. സയന്റിഫിക് ആയൊരു തെളിവ് കിട്ടിയാൽ തനിക്ക് എതിർക്കാൻ പറ്റുവോ അവളെന്റെ കുഞ്ഞല്ലെന്ന്……. ”

ശബ്ദം കുറച്ചാണ് പറഞ്ഞതെങ്കിലും അവന്റെ വാക്കിൽ ദൃഢത ഉണ്ടായിരുന്നു….. പക്ഷേ അത് കേട്ട് ഗീതു പൊട്ടിച്ചിരിച്ചു….

ഡി എൻ എ അല്ലേ…. അതും ഞാൻ നൊന്തു പെറ്റ എന്റെ കുഞ്ഞിന്റെ…. താൻ കുറേ വിയർക്കും ദീപാ…… പിന്നെ ഇയാൾ ഇപ്പൊ ഓർമിപ്പിച്ചതുകൊണ്ട് മാത്രം ഞാൻ ഒരു കൂട്ടം തന്നെ പറഞ്ഞു കേൾപ്പിക്കാം……

താൻ ഇപ്പൊ ടെസ്റ്റ്‌ നടത്തുന്ന കാര്യം പറഞ്ഞില്ലേ … അതിനു മുൻപുള്ള മറ്റൊരു കഥയാണ്…. അർദ്ധ നഗ്നയായി, ഇത്തിരി ജീവൻ മാത്രം അവശേഷിച്ച ഒരു പെൺകുട്ടി, അതും അന്ന് പതിനെട്ടു വയസ് തികഞ്ഞിട്ടില്ല അവൾക്ക് എന്ന് ഓർക്കണം….. അവൾ ഒരു ഗവണ്മെന്റ് ആശുപത്രിയിൽ ഇന്ന് ചാവും നാളെ ചാവും എന്ന് പറഞ്ഞു കിടന്നിരുന്നു…. അവളുടെ യോനി മുറിവുകൾ കൊണ്ട് നിറഞ്ഞിരുന്നു…. ഗർഭപാത്രത്തിൽ ചതവുകൾ ഏറ്റിരുന്നു ….. അവളുണ്ടല്ലോ ദീപൻ …. ഒരു കൂട്ടം കാമ ഭ്രാന്തന്മാരുടെ നിർദ്ദയമായ ലൈംഗീക വൈകൃതത്താൽ ജനനേന്ദ്രിയവും മനസും മാറിടങ്ങളും എല്ലായിടത്തും മുറിവേറ്റ അൽപ പ്രാണി ആയിരുന്നു …..

പക്ഷേ…. അവളോടൊപ്പം ഒരു നിയമവും നിന്നില്ല…. കരുണയോ ദയയോ… എന്തിനാ അധികം,, അർഹമായ നീതി പോലും കൊടുത്തില്ല…..അവൾ നാവിൽ നനവ് അറിയുന്നതിന് മുന്നേ അവളുടെ ഏട്ടനെ കൊന്ന, അമ്മയെ തളർത്തിയ, അവളിൽ ലൈംഗീക സുഖം കണ്ടെത്തിയവർ ജയിലഴിക്കുള്ളിലായി ….

അവളിതൊന്നും അറിഞ്ഞില്ല… പതിയെ ജീവനോടെ മടങ്ങി എത്തിയപ്പോഴും ഇവരായിരുന്നുവോ പ്രതികൾ എന്നാരും ചോദിച്ചില്ല …

പക്ഷേ…. ഒന്ന് നാവനക്കാൻ പോലും വയ്യാതെ കിടക്കുന്ന അവളോടിത്തിരി നീതി കാണിക്കാമായിരുന്നു….. ആ കൂട്ട ബലാത്സംഗത്തിനിരയായവളുടെ യോനിയിൽ പറ്റിപ്പിടിച്ചിരുന്ന ബീജങ്ങൾക്ക് ഇരുപത്തി നാലുമുതൽ എഴുപത്തി രണ്ട് മണിക്കൂർ വരെ ആയുസ്സുണ്ടായിരുന്നു……. ഒരിക്കൽ….. വെറുതെ കളിയായിട്ട് എങ്കിലും അതൊന്ന് ശേഖരിച്ചു വെച്ച് പ്രതികളെ അന്വേഷിക്കാമായിരുന്നു… അവരുമായി, ആ പ്രതികളുമായി മാച്ച് ആകുമോ എന്ന് പരിശോധിക്കാമായിരുന്നു …..

പക്ഷേ അവളെ ഈ സമൂഹം തോൽപിച്ചു കളഞ്ഞു……ഡമ്മി പ്രതികളെ കാണിച്ചു നിയമവും അവളെ വിഡ്ഢിയാക്കി ……

ആർക്കും തെളിവെടുക്കാൻ വേണ്ടാത്ത ബീജങ്ങളെ തമ്പുരാൻ ശേഖരിച്ചതവളുടെ ഗർഭപാത്രത്തിലായിരുന്നു…. അതിലേക്ക് ചേർത്ത് വെച്ചത് അവളുടെ അണ്ഡത്തെ ആയിരുന്നു…..

അവസരം….. അത് കാലം കല്പിച്ചു തന്നതാണ്….ഇനി അത് വേണ്ട….. എന്റെ കുഞ്ഞിനൊരു പിതൃത്വ പരിശോധനയുടെയും ആവശ്യമില്ല… എന്റെ സമ്മതത്തോടെ നടക്കാൻ സാധ്യതയുമില്ല….. ഒരിക്കൽ നിസ്സഹായയായി നിന്നപ്പോൾ ലഭിക്കാതെ പോയ നീതി, ജീവിക്കാൻ പഠിച്ചവൾക്ക് വേണ്ട…..

നീതിയും ന്യായവും നിഷേധിക്കപ്പെട്ടവളുടെ വാക്കുകളായി ഇതിനെ എല്ലാം നീ മനസ്സിൽ കുറിച്ചിട്ടോ…… ഒരിക്കലും കരിയില്ലാത്തൊരു മുറിവ് നെഞ്ചിൽ പേറുന്നവളുടെ വാക്ക്…

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2

💔 മൊഴിയിടറാതെ 💔 : ഭാഗം 3

💔 മൊഴിയിടറാതെ 💔 : ഭാഗം 4

💔 മൊഴിയിടറാതെ 💔 : ഭാഗം 5

💔 മൊഴിയിടറാതെ 💔 : ഭാഗം 6

💔 മൊഴിയിടറാതെ 💔 : ഭാഗം 7