💕നിനക്കായ്‌💕: ഭാഗം 10

രചന: ആമി

ഗായത്രിയുടെ തേങ്ങൽ ഉച്ചത്തിൽ ആയപ്പോൾ ആണ് അർജുന് താൻ ചെയ്യാൻ പോകുന്നത് എന്താണെന്നു ബോധം വന്നത്.. നനഞ്ഞു ഒട്ടിയ അവളുടെ ദേഹത്ത് നിന്നും വിട്ടു നിന്ന് കൊണ്ടു അർജുൻ അവളുടെ ദേഹത്തേക്ക് സാരീ വലിച്ചു ഇട്ടു കൊണ്ടു മുറിയിൽ കയറി പോയി.. ഗായത്രി കരച്ചിലോടെ നിലത്തേക്ക് ഊർന്ന് ഇരുന്നു.. അർജുനെ കണ്ടു ഈ നിമിഷം വരെ തനിക്കു കണ്ണുനീർ മാത്രം ആണെന്ന് ഓർത്തു ഗായത്രി…ഇനി തന്റെ ജീവിതത്തിൽ എന്നും കണ്ണുനീർ മാത്രം തന്നെ ആവും എന്നും അവൾ മനസ്സിൽ പറഞ്ഞു…

അർജുൻ ഒരിക്കലും തന്നെ സ്നേഹിക്കില്ല.. ആ മനസ്സിൽ ഗായത്രി ഇല്ല.. പിന്നെ എന്തിനാ എന്നെ ഇങ്ങനെ.. എന്റെ ജീവിതം നശിപ്പിച്ചു ജയിച്ചത് അല്ലെ.. പിന്നെ വീണ്ടും… ഗായത്രി തന്റെ മനസ്സിനോട് തന്നെ ഓരോന്ന് പറഞ്ഞു കൊണ്ടേ ഇരുന്നു…അർജുൻ മുറിയിൽ അസ്വസ്ഥതയോടെ നടന്നു.. ഗായത്രി അടുത്ത് ഉണ്ടായിട്ടും അവനിൽ ഒരു തരം ഭ്രാന്ത് പോലെ തോന്നി.. അവളുടെ വാക്കുകൾ തന്നെ അത്ര മാത്രം അസ്വസ്ഥൻ ആക്കുന്നു… അർജുൻ ഫോൺ എടുത്തു ജോണിനെ വിളിച്ചു ..

ഡാ… നീ വിളിച്ച കാര്യം മനസിലായി..സാധനം കിട്ടില്ല മോനെ… എനിക്ക് ദേഷ്യം വരുന്നെടാ… ഇത്രയും നാൾ അവളെ കാണാഞ്ഞിട്ട് ആയിരുന്നു പ്രശ്നം.. ഇപ്പൊ എന്താ.. അവളുടെ ഓരോ സംസാരം കേട്ടാൽ ഉണ്ടല്ലോ കവിളിൽ നിന്നും കയ്യെടുക്കാൻ തോന്നില്ല… അവൾ അങ്ങനെ പെരുമാറു..നീ കുറച്ചു ശാന്തത കാണിക്ക്.. തല്ലിയാലോ വഴക്ക് പറഞ്ഞാലോ അവൾക്ക് നിന്നോട് വെറുപ്പ് കൂടുകയേ ഉള്ളു… ഫോൺ വച്ചു കൊണ്ടു അർജുൻ ഗായത്രിയുടെ അടുത്ത് ചെല്ലുമ്പോൾ അവൾ നിലത്തു ഇരുന്നു ഉറങ്ങിയിരുന്നു.. അവളുടെ ഇരുപ്പ് കണ്ടു അർജുന് സങ്കടം തോന്നി..

അവൻ അവളെ കയ്യിൽ കോരി എടുത്തു മുറിയിൽ കൊണ്ടു വന്നു ബെഡിൽ കിടത്തി… ഗായത്രി ക്ഷീണം കൊണ്ടു നല്ല ഉറക്കത്തിൽ ആയിരുന്നു… അർജുൻ അവളുടെ അടുത്ത് ഇരുന്നു… അവളുടെ മുഖത്തു കൂടെ അവന്റെ കണ്ണുകൾ ഒഴുകി കൊണ്ടേ ഇരുന്നു.. ഒടുവിൽ അത് അവളുടെ സ്ഥാനം മാറി കിടക്കുന്ന സാരീക്കിടയിലൂടെ വയറിൽ എത്തിയതും അവന്റെ കൈകൾ പതിയെ വയറിൽ തൊട്ടു.. അവന്റെ ഉള്ളിലെ സിരകളിൽ ചൂട് പിടിക്കുന്നത് അവൻ അറിഞ്ഞു..

വയറിൽ നീലിച്ചു കിടക്കുന്ന പാടുകളിൽ തലോടിയതും ഗായത്രി ഒന്ന് നരങ്ങി.. പക്ഷെ അർജുൻ അപ്പോളും കൈ എടുത്തില്ല.. ഒടുവിൽ തന്റെ വികാരശമനം എന്നോണം അവളുടെ ആലിലവയറിൽ അവൻ മുഖം പൂഴ്ത്തി അമർത്തി ചുംബിച്ചു… ഗായത്രി ഒന്ന് പിടഞ്ഞു.. അവൾ കണ്ണുകൾ തുറന്നു നോക്കുമ്പോൾ വയറിൽ മുഖം ചേർത്ത് വച്ചു കിടക്കുന്ന അർജുനെ കണ്ടതും അവൾ ചാടി എഴുനേറ്റു… ഞാൻ ഒന്നും ചെയ്തിട്ടില്ല.. അവിടെ നിലത്തു കിടന്നു ഉറങ്ങിയപ്പോൾ എടുത്തു കിടത്തിയതെ ഉള്ളു..

. അർജുൻ വളരെ വിനയത്തോടെ പറഞ്ഞു.. ഗായത്രിയുടെ ദേഷ്യം കണ്ടു അവൻ വേഗം തന്നെ മുറിയിൽ നിന്നും പുറത്തു പോയി.. ഗായത്രി തലയ്ക്കു കൈ കൊടുത്തു ബെഡിൽ ഇരുന്നു… ആ അലമാരയിൽ ഡ്രസ്സ്‌ ഉണ്ട്… നിനക്ക് ചേരുമായിരിക്കും.. എടുത്തു നോക്ക്… അർജുൻ വാതിൽ തുറന്നു അകത്തു വന്നു പറഞ്ഞു പുറത്തു തന്നെ പോയി.. ഗായത്രി അലമാര തുറന്നു… അതിൽ സാരിയും ചുരിദാറും ഒക്കെ ഉണ്ടായിരുന്നു.. ഗായത്രി അത് ആരുടേ ആണെന്ന് ഓർത്തു കൊണ്ടു ഒരു സാരീ എടുത്തു..

പിന്നെ എന്തോ ഓർത്തു കൊണ്ടു അത് അവിടെ തന്നെ വച്ചു ചുരിദാർ എടുത്തു ബാത്രൂമിൽ പോയി… അർജുൻ തിരിച്ചു മുറിയിൽ വരുമ്പോൾ ഗായത്രി ബെഡിൽ ഇരിക്കുകയായിരുന്നു.. അവളെ ഒന്ന് നോക്കി അർജുനും ബാത്‌റൂമിൽ പോയി.. അർജുൻ ബാത്രൂമിൽ കയറിയതും ഗായത്രി വേഗം അവന്റെ മൊബൈൽ തിരയാൻ തുടങ്ങി.. അവൻ അഴിച്ചിട്ട ഷർട്ടിലും മേശയിലും എല്ലാം തിരിഞ്ഞെങ്കിലും അവൾ നിരാശയോടെ പിൻവാങ്ങി..അവസാന ശ്രമം എന്നോണം അവൾ ഹാളിൽ പോയി നോക്കി..

ഭാഗ്യവശാൽ ഫോൺ അവിടെ ചാർജ് ചെയ്യാൻ വെച്ചിട്ടുണ്ടായിരുന്നു.. ഗായത്രി അത് എടുത്തു ഓൺ ആക്കിയതും അതിൽ തെളിഞ്ഞു വന്ന മുഖം കണ്ടു അവൾ അമ്പരന്നു… അതിൽ ഗായത്രി ഒരു ദാവണി ഉടുത്തു ചിരിച്ചു നിൽക്കുന്ന മുഖം ആയിരുന്നു.. മനസ്സിൽ ഒരുപാട് ചോദ്യങ്ങൾ ഉയർന്നു വന്നു.. താൻ പോലും അറിയാതെ എടുത്ത ഒരു ഫോട്ടോ…അവൾ ആകെ ആശയകുഴപ്പത്തിൽ ആയി.. അത് ലോക്ക് ആണ് മോളെ… ഇങ്ങ് പോര്.. പുറകിൽ നിന്നും അർജുൻ പറഞ്ഞതും ഗായത്രി ഞെട്ടി തിരിഞ്ഞു..

തല തുവർത്തി കൊണ്ടു നിൽക്കുന്ന അർജുനെ കണ്ടു ഗായത്രി വേഗം ഫോൺ അവിടെ തന്നെ വച്ചു.. അവനെ നോക്കാതെ മറികടന്നു മുറിയിൽ എത്തി… അർജുൻ വരുന്നുണ്ടെന്ന് തോന്നി ഗായത്രി വേഗം ഉറക്കം നടിച്ചു കിടന്നു.. അർജുൻ ലൈറ്റ് ഓഫ് ചെയ്തു അവളുടെ അടുത്ത് കിടന്നു.. ആരെ വിളിക്കാന ഫോൺ എടുത്തേ… ഗായത്രി ഒന്നും മിണ്ടിയില്ല… അർജുൻ അവളോട്‌ ഒന്ന് കൂടി ചേർന്നു കിടന്നു… നിന്റെ മേൽ ഈ ലോകത്തു എനിക്ക് മാത്രം ആണ് അവകാശവും അധികാരവും..

വേറെ ആര് നിനക്ക് വേണ്ടി വന്നിട്ടും കാര്യം ഇല്ല..ഇനി ഹരിയെ എങ്ങാനും വിളിക്കാൻ ആണ് പരിപാടി എങ്കിൽ അവൻ പിന്നെ ജീവനോടെ പോവില്ല… എന്തിനാ ഹരിയേട്ടനെ കൊല്ലുന്നേ.. എന്നെ അങ്ങ് കൊന്നേക്ക്.. അങ്ങനെ കൊല്ലാൻ അല്ല ഞാൻ ജീവിച്ചത്.. പിന്നെ ഞാൻ നിന്നെ കൊല്ലുന്നുണ്ട്… ഇപ്പോൾ അല്ല.. അർജുനെ പിടി മുറുകുന്നത് മനസ്സിലാക്കി ഗായത്രി കുറച്ചു കൂടി വിട്ടു കിടന്നു.. പക്ഷെ അർജുൻ അവളോട്‌ കൂടുതൽ ചേർന്നു… നീ എന്നിൽ നിന്ന് അകലുന്തോറും ഞാൻ നിന്നിലേക്ക് അടുത്ത് കൊണ്ടേ ഇരിക്കും..

അവനിൽ നിന്നും മോക്ഷം ഇല്ലെന്നു മനസ്സിലാക്കി അവൾ അങ്ങനെ തന്നെ കിടന്നു.. അവന്റെ ശ്വാസം ദേഹത്ത് തട്ടുമ്പോൾ എല്ലാം പൊള്ളുന്നത് പോലെ തോന്നി.. എന്നാൽ അർജുൻ സന്തോഷത്തോടെ സമാദാനത്തോടെ കിടക്കുകയായിരുന്നു… അവളുടെ മനസ്സിൽ നേരെത്തെ അർജുന്റെ ഫോണിൽ കണ്ട ഫോട്ടോ തെളിഞ്ഞു വന്നു… ഞാൻ പോലും അറിയാതെ എങ്ങനെ… അപ്പോൾ അജു ഏട്ടന് എന്നെ ഇഷ്ടം ആയിരുന്നോ… പക്ഷെ… എങ്കിൽ പിന്നെ എന്തിനാ അന്ന് അങ്ങനെ ഒക്കെ പറഞ്ഞത്…

ഗായത്രിയുടെ മനസ്സ് ആകെ കലങ്ങി മറിഞ്ഞു… ഉത്തരം ഇല്ലാത്ത ഒരുപാട് ചോദ്യങ്ങൾ.. ഉത്തരം അവൾ ആഗ്രഹിക്കുന്നത് ആണെങ്കിൽ അവനെ സ്നേഹിക്കാൻ തനിക്ക് കഴിയുമോ എന്ന് അവൾ നൂറാവർത്തി അവളോട്‌ തന്നെ ചോദിച്ചു.. അപ്പോൾ എല്ലാം അച്ഛന്റെ മുഖം മനസ്സിൽ തെളിഞ്ഞു വരും.. അർജുനോട് തോന്നുന്ന ഇഷ്ടം എല്ലാം എങ്ങോ പോയി അവിടെ ദേഷ്യവും വെറുപ്പും വന്നു നിറയുന്നു.. നാളെ വീട്ടിലേക്കു ആണ് പോവുന്നത്..അന്ന് രാത്രി നീ എല്ലാം ഉപേക്ഷിച്ചു ഇറങ്ങിയ ആ വീട്ടിലേക്ക്.

ഗായത്രിയുടെ മനസ്സിൽ ആ രാത്രി തെളിഞ്ഞു വന്നു..എല്ലാ സ്വപ്‌നങ്ങളും പ്രതീക്ഷയുടെയും അർജുന്റെ ജീവിതത്തിലേക്ക് കയറിയ ആ രാത്രി.. താൻ ഏറ്റവും വെറുക്കുന്ന ആ രാത്രി…. വീടിന്റെ ഉമ്മറത്തു ഇരിക്കുന്ന ഗായത്രി ഓടി വരുന്ന മാളുവിനെ കണ്ടു മുറ്റത്തേക്ക് ഇറങ്ങി.. മാളു കിതച്ചു കൊണ്ടു തിണ്ണയിൽ ഇരുന്നു… ഗായത്രി പേടിച്ചു കൊണ്ടു കാര്യം തിരക്കി… എന്താ മാളു… എടി… അജു ഏട്ടൻ വന്നു… അതിനു നീ എന്തിനാ ഓടി വന്നത്… ഒരു പ്രശ്നം ഉണ്ട്.. എന്ത് പ്രശ്നം.. അജു ഏട്ടന്റെ കല്യാണം ഉറപ്പിക്കാൻ പോവാ… അത് കേട്ടതും ഗായത്രിയുടെ കണ്ണുകൾ നിറഞ്ഞു..

അവൾ തളർച്ചയോടെ മാളുവിന്റെ അരികിൽ ഇരുന്നു.. മാളു അവളെ ചേർത്ത് പിടിച്ചിരുന്നു.. നീ വിഷമിക്കണ്ട.. നമുക്ക് അജു ഏട്ടനോട് എല്ലാം പറയാം.. ഏട്ടൻ നിന്നെ ഇഷ്ടം ആവും ഡി..അപ്പച്ചിയുടെ മോളെ ആണ് അവർ ഉറപ്പിക്കാൻ പോകുന്നത്.. അവളെ എന്തായാലും ഏട്ടന് ഇഷ്ടം ആവില്ല.. അത് എന്താ.. അത് ഒരു മാതിരി സാധനം ആണ്.. അവൾക്ക് ഇപ്പൊ നിലവിൽ എത്ര കാമുകൻമാർ ഉണ്ടെന്ന് അവൾക്കു തന്നെ അറിയില്ല.. മാളു അവർ തമ്മിൽ ഇഷ്ടം ആണെങ്കിലോ… നീ വെറുതെ കാട് കയറേണ്ട..

നാളെ രാവിലെ അമ്പലത്തിൽ നിന്നും വരുമ്പോൾ അജു ഏട്ടനെ കാണാം.. എല്ലാം പറയം.. ബാക്കി വരുന്നത് വരുന്നിടത്തു വച്ചു കാണാം… മാളു പറഞ്ഞത് അനുസരിച്ചു രാവിലെ അർജുനോട് തന്റെ പ്രണയം പറയാൻ തന്നെ ഗായത്രി തീരുമാനിച്ചു.. എങ്കിലും മനസ്സിൽ അർജുൻ തന്നെ സ്വീകരിച്ചില്ലെങ്കിലോ എന്നൊരു പേടിയും ഉണ്ടായിരുന്നു… ആ രാത്രി ഉറങ്ങാൻ കഴിയാതെ അവൾ ചിന്തയിൽ തന്നെ ആയിരുന്നു… രാവിലെ അമ്പലത്തിൽ നിന്നും മാളുവും ഗായത്രിയും കൂടി അവരുടെ വീട്ടിൽ വരുമ്പോൾ ആണ് അകത്തു നിന്നും ഭയങ്കര ബഹളം കേൾക്കുന്നത്..

ഉച്ചത്തിൽ സംസാരിക്കുന്നത് അർജുൻ ആണെന്ന് മനസ്സിലായതും ഗായത്രി പേടിച്ചു അവിടെ തന്നെ നിന്നു.. മാളു അവളെ പിടിച്ചു വലിച്ചു അകത്തേക്ക് കൊണ്ടു പോയി… അർജുന്റെ മുഖം ദേഷ്യം കൊണ്ടു ചുവന്നിരുന്നു.. അച്ഛനോടും അമ്മയോടും ദേഷ്യത്തിൽ സംസാരിക്കുന്ന അർജുനെ കണ്ടു ഗായത്രി നന്നയി പേടിച്ചു.. കാരണം അവൾക്കു അർജുന്റെ അങ്ങനെ ഒരു മുഖം ആദ്യം ആയിട്ടാണ് കാണുന്നത്… ആരോട് ചോദിച്ചിട്ട എന്റെ കല്യാണം നിശ്ചയിച്ചെ.. ഞാൻ ആരെ കെട്ടണം എന്ന് തീരുമാനിക്കേണ്ടത് ഞാൻ ആണ്… മോനെ… നിനക്ക് അറിയുന്ന കുട്ടി അല്ലെ സ്നേഹ..

കൂടാതെ നിന്റെ മുറപ്പെണ്ണും.. പിന്നെ ഞങ്ങൾ… ഒന്നും പറയണ്ട.. ഇപ്പൊ തന്നെ വിളിച്ചു പറഞ്ഞേക്ക് അർജുൻ അവളെ കേട്ടില്ല എന്ന്… അതും പറഞ്ഞു അർജുൻ ദേഷ്യത്തിൽ ഇറങ്ങി പോകുമ്പോൾ അവൻ ഗായത്രിയെ ഒന്ന് തുറിച്ചു നോക്കി.. അത് കണ്ടതും ഗായത്രി പേടിച്ചു വേഗം നോട്ടം മാറ്റി.. അവളുടെ കൈകാലുകൾ നന്നായി വിറയ്ക്കുന്നുണ്ടായിരുന്നു… അർജുൻ പോകുന്നത് കണ്ടു മാളു വേഗം ഗായത്രിയുടെ കൈ പിടിച്ചു അർജുന്റെ പിന്നാലെ ഓടി..

ഗായത്രി തടയാൻ നോക്കി എങ്കിലും മാളു അവളെ വലിച്ചു കൊണ്ടു പോയി.. ബൈക്കിൽ കയറി ഇരിക്കുന്ന അർജുന്റെ മുന്നിൽ പോയി നിന്നു മാളു… ഗായത്രി മാളുവിന്റെ പുറകിൽ ഒളിച്ചു നിന്നു… ഏട്ട…പോവല്ലേ ഒരു കാര്യം… എന്താ… അത് പിന്നെ.. എനിക്ക് അല്ല.. ഗായത്രിക്ക്… അവൾക്ക് എന്താ… അവൾക്ക് ഏട്ടനോട് എന്തോ കാര്യം പറയാൻ ഉണ്ട്… മാളു ഗായത്രിയെ പിടിച്ചു അർജുന്റെ മുന്നിലേക്ക് നിർത്തി.. അർജുന്റെ മുഖം കണ്ടതും ഗായത്രിയുടെ തൊണ്ടയിലെ വെള്ളം വറ്റി.. അവൾ വാക്കുകൾക്ക് വേണ്ടി പരതി.. മാളു അവളെ തട്ടി കൊണ്ടു പറയാൻ ആംഗ്യം കാണിച്ചു..

എന്താടി.. രാവിലെ തന്നെ മനുഷ്യനെ മെനക്കെടുതാൻ.. പറയാൻ ഉള്ളത് പറഞ്ഞു തൊലക്ക്.. അർജുൻ ദേഷ്യത്തിൽ പറഞ്ഞതും ഗായത്രി ഒന്നും ഇല്ല എന്ന് പറഞ്ഞു പുറകിലേക്ക് നിന്നു.. അർജുൻ അർജുൻ അവളെ രൂക്ഷമായി ഒന്ന് നോക്കി ബൈക്ക് എടുത്തു പോയി.. ഗായത്രി ആശ്വാസത്തിൽ ശ്വാസം എടുത്തു.. മാളു അവളെ വഴക്ക് പറയാൻ തുടങ്ങുമ്പോളെക്കും അർജുൻ ബൈക്ക് ഗേറ്റിന്റെ അവിടെ നിർത്തി… ഗായത്രി വാ… ഞാൻ വീട്ടിൽ കൊണ്ടു വിടാം.. വേണ്ട.. ഞാൻ പൊ… നിന്നോട് വരാൻ ആണ് പറഞ്ഞത്… അർജുൻ ദേഷ്യത്തിൽ പറഞ്ഞതും ഗായത്രി പേടിച്ചു വേഗം അവന്റെ അടുത്ത് പോയി..

മാളു അത് കണ്ടു സന്തോഷിച്ചു.. ഗായത്രി എങ്ങനെഒക്കെയോ ബൈക്കിൽ കയറി ഇരുന്നു മാളുവിനെ നോക്കി.. മാളു തുമ്പ്സ് അപ്പ്‌ കാണിച്ചു കാര്യം പറയാൻ ആംഗ്യ കാണിച്ചു.. ഗായത്രി പേടിയോടെ അവളെ നോക്കിയതും അർജുൻ ബൈക്ക് എടുത്തു.. ഗായത്രി ബാലൻസ് തെറ്റി അർജുന്റെ ദേഹത്തേക്ക് വീണു.. പക്ഷെ വേഗം തന്നെ അവൾ നേരെ ഇരുന്നു.. അവനിൽ നിന്നും അകന്നു ഇരിക്കാൻ അവൾ കുറെ കഷ്ട്ടപെട്ടു… എന്താ നിനക്ക് പറയാൻ ഉള്ളത്… അർജുൻ പെട്ടന്ന് ചോദിച്ചതും ഗായത്രി ഞെട്ടി..

ഒന്നുല്ല… മാളു വെറുതെ പറഞ്ഞത് ആണ്.. മ്മ്…. വീടിന്റെ മുന്നിൽ ഇറക്കി വിട്ടു കൊണ്ടു അർജുൻ തിരിച്ചു പോയി.. പക്ഷെ ഗായത്രി അന്ന് വളരെ സന്തോഷത്തിൽ ആയിരുന്നു.. അർജുനോട് മിണ്ടിയതും കൂടെ യാത്ര ചെയ്തതും എല്ലാം ഓർത്തു അവളിൽ സന്തോഷം അലതല്ലി.. പിറ്റേന്ന് തന്നെ അർജുൻ തിരിച്ചു പോയിരുന്നു.. പിന്നീട് അർജുന്റെ വിവാഹക്കാര്യം ഒന്നും ആരും പറഞ്ഞു കേട്ടില്ലെന്ന് മാളു പറഞ്ഞു കേട്ട് ഗായത്രി ആശ്വസിച്ചു.. ദിവസങ്ങൾക്ക് ശേഷം അർജുൻ വന്നത് അറിഞ്ഞു ഗായത്രി വളരെ സന്തോഷത്തോടെ അവനെ കാണാൻ വേണ്ടി പോയി..

അവിടെ എത്തുമ്പോൾ മാളു ഗായത്രിയെ കണ്ടു ഓടി വന്നു കെട്ടിപിടിച്ചു.. മാളു ഗായത്രിയെ വലിച്ചു കൊണ്ടു മുകളിൽ ബാൽക്കണിയിൽ പോയി… എന്താടി കാര്യം.. എടി മോളെ… നിന്റെ പ്രണയം സഫലം ആയെടി… എങ്ങനെ.. എടി പൊട്ടി.. അച്ഛനും അമ്മയും നിന്നെ കല്യാണം കഴിക്കാൻ പറ്റുമോ എന്ന് ചോദിച്ചു.. അപ്പോൾ ഏട്ടൻ.. മാളു പൂർത്തിയാക്കാതെ ഗായത്രിയെ നോക്കി.. ഗായത്രി അക്ഷമയോടെ നിൽക്കുകയായിരുന്നു.. ഏട്ടൻ സമ്മതിച്ചു ഡി… അത് കേട്ടതും ഗായത്രി സന്തോഷം കൊണ്ടു കണ്ണുകൾ നിറഞ്ഞു.. അവൾ മാളുവിനെ കെട്ടിപിടിച്ചു…

അപ്പോൾ ആണ് അങ്ങോട്ട്‌ വിശ്വനും വാസുകിയും വന്നത്..വാസുകി ഗായത്രിയെ പുണർന്നു.. മോളെ ഞങ്ങൾക്ക് ഒക്കെ ഇഷ്ടം ആയിരുന്നു.. അവനു ഇഷ്ടം ആയില്ലെങ്കിലോ കരുതി ആണ് ആദ്യം അങ്ങനെ.. പക്ഷെ ഇപ്പൊ ഏറ്റവും സന്തോഷം നങ്ങൾക്ക് ആണ്… ഗായത്രിക്ക് സന്തോഷം കൊണ്ടു കണ്ണുകൾ നിറഞ്ഞു കൊണ്ടേ ഇരുന്നു.. അവൾക്ക് തുള്ളിച്ചാടാൻ തോന്നി.. അച്ഛനോട് സംസാരിക്കാൻ ഞങ്ങൾ അങ്ങോട്ട്‌ വരുന്നുണ്ട്.. വിശ്വൻ പറഞ്ഞു.. ഗായത്രി തല ആട്ടി അവരോടു യാത്ര പറഞ്ഞു ഇറങ്ങി.. യാത്രയിൽ എല്ലാം തന്നെ അർജുന്റെ മുഖം മാത്രം ആയിരുന്നു അവളുടെ മനസ്സിൽ..

അവനെ ഒന്ന് കാണണം എന്ന് മനസ്സ് പറഞ്ഞു കൊണ്ടേ ഇരുന്നു…. വിശ്വൻ വന്നു ഗായത്രിയുടെ അച്ഛനോട് സംസാരിച്ചു.. അയാൾക്ക് സന്തോഷം ആയിരുന്നു… അങ്ങനെ രണ്ടു വീട്ടുകാരുടെയും സമ്മതത്തോടെ നല്ലൊരു മുഹൂർത്തം നോക്കി വിവാഹം ഉറപ്പിച്ചു.. അർജുൻ അപ്പോൾ ഒന്നും നാട്ടിൽ വന്നിരുന്നില്ല.. ഗായത്രിക്ക് ആണെങ്കിൽ അവനെ കാണാൻ അതിയായ മോഹം ഉണ്ടായിരുന്നു… വിവാഹത്തിന് രണ്ടു ദിവസം മുൻപ് ആണ് അർജുൻ നാട്ടിൽ എത്തിയത്.. മാളു പറഞ്ഞു അർജുൻ വന്നത് ഗായത്രി അറിഞ്ഞിരുന്നു എങ്കിലും പോയി കാണാൻ കഴിയാത്തത് കൊണ്ടു അവൾക്ക് സങ്കടം തോന്നി…

അങ്ങനെ അവൾ കാത്തിരുന്ന ആ ദിവസം വന്നെത്തി.. അവളുടെ സ്വപ്‌നങ്ങളും പ്രതീക്ഷികളും എല്ലാം തകിടം മറിഞ്ഞ ആ ദിവസം.. ജീവിതത്തിൽ അവൾ ഏറ്റവും കൂടുതൽ സന്തോഷിച്ചതും സങ്കടപ്പെട്ടതുമായ ദിവസം… രാവിലെ ഗായത്രിയെ ഒരുക്കാൻ മാളു വന്നിരുന്നു…കാഞ്ചിപുരം സാരീയിൽ അതീവ സുന്ദരി ആയിരുന്നു ഗായത്രി.. എല്ലാം അർജുന്റെ വീട്ടുകാർ തന്നെ ആയിരുന്നു വാങ്ങിയത്.. അവരുടെ സാമ്പത്തിക സ്ഥിതി എല്ലാം അറിയുന്നത് കൊണ്ടു…

കുറച്ചു ആഭരണങ്ങൾ മാത്രം ഉണ്ടായിരുന്നുള്ളൂ.. എല്ലാം കഴിഞ്ഞു മാളു ഗായത്രിയെ അവൾക്ക് നേരെ പിടിച്ചു നിർത്തി… ഗായത്രി മാളുവിനെ കെട്ടിപിടിച്ചു.. ഇന്ന് മുതൽ എന്റെ ഏട്ടത്തിയമ്മ ആണ് ട്ടോ.. പോടീ.. ആ കൂട്ടുകാരികൾക്ക് അന്ന് ഒരുപാട് സന്തോഷം ആയിരുന്നു..ഇനി മുതൽ ഒരുമിച്ചു ആണല്ലോ എന്ന്.. എന്നാൽ ഗായത്രിക്ക് അച്ഛനെ ഒറ്റയ്ക്ക് വിട്ടു പോകുന്നതിൽ അതിയായ സങ്കടം തോന്നി.. എന്റെ മോള്ക്ക് ഒരു സങ്കടവും ഉണ്ടാവില്ല അവിടെ..പിന്നെ എപ്പോ വേണമെങ്കിലും വരാലോ..

രാജൻ സങ്കടം മറച്ചു വച്ചു ചിരിച്ചു കൊണ്ടു പറയുമ്പോൾ ഗായത്രി അച്ഛനെ കെട്ടിപിടിച്ചു.. പിന്നെ അനുഗ്രഹം വാങ്ങി…അമ്മയുടെ അസ്ഥി തറയിൽ വിളക് വച്ചു പ്രാർത്ഥിച്ചു കൊണ്ടു അവർ അമ്പലത്തിലേക്ക് പുറപ്പെട്ടു… കതിർ മണ്ഡപത്തിലേക്ക് നടക്കുമ്പോൾ ഗായത്രിയുടെ കണ്ണുകൾ അറിയാതെ അർജുന്റെ നേരെ നീണ്ടു.. അവന്റെ മുഖത്തു എന്തോ അവൾ പ്രതീക്ഷിച്ച സന്തോഷം അവൾ കണ്ടില്ല.. ടെൻഷൻ കാരണം ആവും എന്ന് കരുതി അവൾ അത് മറന്നു.. അർജുൻ താലി കഴുത്തിൽ കെട്ടുമ്പോൾ ഗായത്രി കണ്ണുകൾ അടച്ചു പ്രാർത്ഥിച്ചു..

മരണം കൊണ്ടല്ലാതെ തങ്ങളെ പിരിക്കല്ലേ എന്ന് മനമുരുകി അവൾ പ്രാർത്ഥിച്ചു.. നെറ്റിയിലെ അവന്റെ കൈ കൊണ്ടു സിന്ദൂര രേഖ ചുവക്കുമ്പോൾ അവളുടെ ഉള്ളിലെ പ്രണയിനി ആഹ്ലാദിച്ചു.. അർജുന്റെ കൈ പിടിച്ചു മണ്ഡപം വലം വെക്കുമ്പോൾ അവൾ ആണ് ഈ ലോകത്തിലെ ഏറ്റവും ഭാഗ്യവതി എന്ന് വരെ തോന്നി പോയി അവൾക്ക്.. ഒരുപാട് തവണ വന്നിട്ടുണ്ടെങ്കിലും അന്ന് അർജുന്റെ കൂടെ വീടിന്റെ പടി കയറുമ്പോൾ അവളുടെ കൈകൾ വിറച്ചു… നിലവിളക്ക് വച്ചു അവൾ ആ വീടിന്റെ മരുമകൾ ആയി… രാത്രി മാളുവിന്റെ കൂടെ അർജുന്റെ മുറി ലക്ഷ്യം വച്ചു നടക്കുമ്പോൾ അവൾക്ക് വല്ലാത്ത പരിഭ്രാന്തി തോന്നി..

മാളു ഓരോന്ന് പറഞ്ഞു കളിയാക്കുന്നതൊന്നും അവൾ കേട്ടില്ല.. നിനക്ക് പേടി ഉണ്ടോ ഡി… പിന്നെ ഇല്ലാതെ.. നേരെ ഒന്ന് മിണ്ടിയിട്ട് പോലും ഇല്ല.. ഇന്ന് മുതൽ മിണ്ടാലോ… ഇനി നീ എന്നെ ഒന്നും മൈൻഡ് ചെയ്യില്ലേ ഡി.. നീ ഒന്ന് പൊയ്ക്കെ.. ഓ ഇപ്പൊ നമ്മളെ ഒന്നും വേണ്ട.. നമ്മള് പൊക്കോളാമെ… മാളു അവളെ മുറിയിലേക്ക് തള്ളി വിട്ടു കൊണ്ടു വാതിൽ അടച്ചു വെളിയിൽ പോയി… ഗായത്രി മുറിയിൽ ചുറ്റും നോക്കി.. അർജുൻ അവിടെ ഉണ്ടായിരുന്നില്ല.. ഗായത്രി പാൽ ഗ്ലാസ്‌ മേശയിൽ വച്ചു ബെഡിൽ ഇരുന്നു.. പെട്ടന്ന് ആണ് അർജുൻ വാതിൽ തുറന്നു അകത്തു വന്നത്…

ഗായത്രി വേഗം എഴുന്നേറ്റു നിന്നു.. അർജുൻ വാതിൽ അടച്ചു കുറ്റി ഇട്ടു ഗായത്രിയുടെ അടുത്തേക്ക് നീങ്ങി.. ഗായത്രിയുടെ ഹൃദയമിടിപ്പ് കൂടാൻ തുടങ്ങി.. തന്റെ അടുത്ത് വന്നു നിൽക്കുന്ന അർജുന്റെ മുഖത്തു നോക്കാൻ കഴിയാതെ അവൾ നാണത്താൽ തല താഴ്ത്തി…. അവൾ ഒട്ടും പ്രതീക്ഷിക്കാതെ ആയിരുന്നു അർജുനിൽ അവളുടെ കവിളിൽ പിടിച്ചു അവന്റെ മുഖത്തിനു നേരെ കൊണ്ടു വന്നത്.. പെട്ടന്ന് ആയത് കൊണ്ടു തന്നെ ഗായത്രി നന്നായി പേടിച്ചു പോയി.. അപ്പോൾ ആണ് ഗായത്രി അർജുന്റെ മുഖത്തെ നിറഞ്ഞു നിൽക്കുന്ന ഭാവം ശ്രദ്ധിച്ചത്…ക്രോധം കൊണ്ടു വലിഞ്ഞു മുറുകിയ മുഖത്തു ദേഷ്യം കൊണ്ടു കണ്ണുകൾ ചുവന്നു വന്നിരുന്നു..……….….. (തുടരും)