💔 മൊഴിയിടറാതെ 💔 : ഭാഗം 3

നോവൽ
എഴുത്തുകാരി: തമസാ

---

രാവിലെ, തുണികൾ ഓരോന്നായെടുത്തു വിരിക്കുകയായിരുന്നു ഗീതു…അവൾക്ക് ഒന്നൂടി തന്നെ കാണാൻ അവസരം, കഴിഞ്ഞ രാത്രിയിൽ അവനുണ്ടാക്കിയില്ല…..

കുറച്ചു നേരത്തിനു ശേഷം പോയിരുന്നു…… ഇന്നലെ ഉറങ്ങിയിട്ടില്ലെന്ന് മുഖം കണ്ടാൽ അറിയാം…. അല്ലെങ്കിൽ തന്നെ എത്ര നാളായി, സമാധാനത്തോടെ ഒന്ന് ഉറങ്ങിയിട്ട്…….

എല്ലാം വിരിച്ചിട്ട്, കിണറ്റിൻ കരയിലേക്ക് ബക്കറ്റ് കമിഴ്ത്തി വെച്ചിട്ട്, ഇടം കൈകൊണ്ട് മുടി ഒന്ന് ഒതുക്കി അകത്തേക്ക് തിരക്കിട്ടു നടന്നു….

മോള് എണീറ്റോ ആവോ….. സാധാരണ ഒന്ന് എണീറ്റു തുള്ളിച്ചാട്ടം കഴിയേണ്ടതാ ഈ നേരത്ത്…… ഇതിപ്പോ സമയം ഏഴായി……

നന്ദൂട്ടീ……..

മുറിയിലേക്ക് ചെന്ന് അവൾ വിളിച്ചു…. അപ്പോഴും മോള് ഉറക്കമാണ്… വായിൽ കുഞ്ഞ് വിരൽ വെച്ചിട്ടുണ്ട്….. എണീക്കാറായി……

നന്ദുസ് എണീറ്റെ….. നന്ദൂട്ടിയേ…… എണീക്ക് കുഞ്ഞാറ്റെ…..

മോളുടെ പുറത്തു തട്ടി ഗീതു കുറേ വിളിച്ചു…. മോള് നെറ്റി ചുളിച്ചു കുറുകിയതല്ലാതെ എണീറ്റില്ല…

മോള് എണീൽക്കുവാണെങ്കിൽ അടുക്കളയിൽ തന്റെ അടുത്ത് നിന്നോളും….. സമാധാനമായി ഓരോ പണി ചെയ്യാം…. അതാണ്‌ മോളെ എഴുന്നേൽപ്പിക്കാൻ നോക്കുന്നത്…. തണുപ്പിന്റെ ആവും, മോളിങ്ങനെ ഉറങ്ങുന്നത്….

ഒന്നുടെ മോളുടെ പുറത്തു കൈ വെച്ച് വിളിച്ചിട്ട്, ഗീതു അതുപോലെ തന്നെ അടുക്കളയിലേക്ക് നടന്നു…..

അരി കഴുകി അടുപ്പത്തിട്ടിട്ട് അത് വേവുന്ന വരെ ഉള്ള ആ നേരം കൊണ്ട് കറി ഉണ്ടാക്കി വെച്ചാൽ, പിന്നെ ഒരു പതിനഞ്ചു മിനിറ്റ് മതി ഓടിപ്പിടിച്ചു പണി തീർത്തിട്ട് അടുക്കള വിടാൻ….

പക്ഷേ സമയം അപ്പിടി പോകുന്നത് നന്ദുവിന്റേയും അമ്മയുടെയും പുറകെയാണ്…. രണ്ടു പേരെയും രാവിലെ കുളിപ്പിക്കണം…….. അത് തന്നെ വലിയ ചടങ്ങാണ്…….

അരിയിട്ടിട്ട് ഇപ്പുറത്തെ അടുപ്പിൽ ഇരിക്കുന്ന വലിയ കലത്തിലെ വെള്ളം ചൂടായോ എന്ന് ഗീതു ചെറുതായി കൈ മുട്ടിച്ചു നോക്കി……

“ഓ…. ഇത് ചൂടായില്ലേ ഇതുവരെ….. ഇതിപ്പോ അടുപ്പിൽ വെച്ചായിരുന്നത് വല്ല തോരനും ആയിരുന്നേൽ ആളിക്കത്തി ചട്ടി വരെ കത്തിച്ചേനെ….. അതെങ്ങനാ തിരക്ക് ഉണ്ടെന്ന് അറിഞ്ഞാൽ തീ വരെ കൊഞ്ഞനം കുത്തും…… ”

താഴെ നിന്ന് റബ്ബറിന്റെ വിറക് വേഗത്തിൽ രണ്ടു മൂന്നെണ്ണം വലിച്ചൂരി എടുത്ത് രണ്ടടുപ്പിലേക്കും വെച്ച് കൊണ്ട് ഗീതു ഉറക്കെ പറഞ്ഞു……

കയ്യിലായ പൊടി, നൈറ്റിയുടെ അടി ഉയർത്തി തുടച്ചിട്ട് വേഗം പയറെടുത്തു….. ഒടിയൻ പയറായത് കൊണ്ട് എളുപ്പമുണ്ട്…. എല്ലാം കുര്യാച്ചന്റെ പറമ്പിലെയാ…. പണിക്കാർക്ക് ഒരു വീതം കുര്യാച്ചൻ കൊടുക്കും, പറിക്കുമ്പോൾ എല്ലാം……

വേഗം കഴുകി വാരി, പയറുകൾ ഒടിക്കുന്നതിനിടയിലാണ്, മുറ്റത്തൂടെ ആരോ നടക്കുന്ന പോലെ തോന്നിയത്…. പാത്രം അവിടെ തന്നെ ഇട്ട്, ഗീതു മുൻവശത്തേക്ക് ചെന്നു…..

” അയ്യോ ഈ വാതിലാരാ തുറന്നത്, കുറ്റിയിട്ടില്ലേലും അടച്ചിട്ടാണല്ലോ ഞാൻ അടുക്കളയിലേക്ക് പോയത്…..

വാതിൽക്കൽ എത്തുന്നതിനു മുന്നേ ഗീതുവിന്റെ മനസ്സിൽ പേടിയായി…. പുറത്തേക്ക് ഒന്ന് കണ്ണോടിച്ചിട്ട് അവൾ വേഗം കുഞ്ഞിന്റെ മുറിയിലേക്ക് നടന്നു….

വാതിൽക്കൽ നിന്ന് നോക്കിയതേ കണ്ടു, കട്ടിലിനടുത്തു നിൽക്കുകയാണ് അയാൾ…. കുഞ്ഞിനെ എടുക്കാൻ എന്നപോലെ… മോള് കമിഴ്ന്നാണ് കിടക്കുന്നത്…..

ഇന്നലെ വന്നവൻ തന്നെ ആണെന്ന് അവൾക്ക് മനസിലായി……..

” ടാ…. ”

പുറകിൽ നിന്ന് അവളുടെ അലർച്ച കേട്ട് അവൻ തിരിഞ്ഞു നോക്കി…

” നിന്നോട് ഇന്നലെ തന്നെ പറഞ്ഞതല്ലേ ഇവിടന്ന് വിട്ടുപോകാൻ….. പിന്നെ ആരെ കാണാനാ നീ ഇങ്ങോട്ട് വന്നത്………”

ദേഷ്യം കൊണ്ട് അവളുടെ മുഖം വലിഞ്ഞു മുറുകി…..

” ഗീതൂ….. ഞാൻ ഈ കുഞ്ഞിനെ ഒന്നും ചെയ്യില്ല …. ഒരു വട്ടം ഒന്ന് ശെരിക്കും കണ്ടേച്ചാൽ മതി…. ”

അപ്പോഴേക്കും ഓടി വന്നു കുഞ്ഞിനെ ഓടി വന്നെടുത്തു ഗീതു തോളിലേക്കിട്ടു….

” ഇറങ്ങ്…… ഇറങ്ങടോ….. നിന്റെ അച്ചി വീടല്ല നിനക്ക് തോന്നുമ്പോൾ ഇവിടെ കേറി ഇറങ്ങാൻ….. പോ….. ഇറങ്ങിപ്പോടാ ”

പുറത്തേക്ക് കൈ ചൂണ്ടി നിന്ന് അവൾ ഗർജ്ജിച്ചു……

” ഗീതൂ….. മോളെ ഒന്ന് കണ്ടിട്ട് ”

” മോളോ…… തന്നെ ഞാൻ അറിയില്ലല്ലോ…. പിന്നെ ഏത് ബന്ധത്തിന്റെ പുറത്താ താൻ എന്റെ മോളെ കാണാൻ കേറി വരുന്നത് ”

ദേഷ്യം കൊണ്ട് വിറച്ചു തുടങ്ങിയിരുന്നു ഗീതു…… അവന്റെ പുറത്തേക്ക് തള്ളിക്കൊണ്ട് ഇറങ്ങാൻ പറഞ്ഞ ഗീതുവിന്റെ കയ്യിൽ വലിച്ചു പിടിച്ചു അവൻ……

” ഗീതൂ….. നിന്റെ പേരും നാളും ഒക്കെ അറിയണമെങ്കിൽ നിന്നെ അറിയുന്നവൻ തന്നെ ആവൂലോ ഞാൻ…. ഒത്തിരി നേരം ഒന്നും ചോദിച്ചില്ലലോ ഞാൻ…. കുറച്ചു നിമിഷം…..

മോളെ ഒന്ന് കാണണം…. ദേ…. ഇതുപോലെ ഒരു പതിനഞ്ചു മിനിറ്റ് അവളേ എനിക്ക് കണ്ടോണ്ടിരിക്കണം…. അത്രേം മതി….. എന്റെ പഴയ സ്വഭാവം നിനക്കറിയില്ല ഗീതൂ…. നിന്നോട് ഞാൻ കാണിക്കുന്ന ഔദാര്യമാ എന്റെ ക്ഷമ….

അല്ലായിരുന്നേലുണ്ടല്ലോ…. ചവിട്ടിക്കൂട്ടി നിന്നെ ഒരു മൂലയ്ക്ക് ഇട്ടിട്ട് കുഞ്ഞിനെ കണ്ടിട്ടേ ഞാൻ പോകുമായിരുന്നുള്ളു…… എന്നെക്കൊണ്ട് വെറുതെ അക്രമം ചെയ്യിക്കരുത് ”

അവന്റെ കൈകൾക്കിടയിൽ ഇരുന്ന് ഗീതുവിന്റെ കൈ നൊന്തു……. പക്ഷേ ആ വേദന മുഖത്ത് തെളിയാതിരിക്കാൻ അവൾ പല്ലുകൾ കടിച്ചു പിടിച്ചു ….

” അക്രമോ…… എന്നെയാണോ നീ അതും പറഞ്ഞു പേടിപ്പിക്കുന്നത്……. നീ കൂടിപ്പോയാൽ എന്നെ കൊല്ലും…. അത്രയല്ലേ ഉള്ളു…. കൊല്ല്….. നിനക്ക് ധൈര്യമുണ്ടേൽ നീ കൊല്ല്….. ഇനി ഞാൻ ചത്തിട്ടേ നീയെന്റെ കൊച്ചിനെ കാണൂ…… “… ….”…വിടടാ…… ”

ദീപന്റെ കൈ തട്ടിയെറിഞ്ഞു അവൾ….. അത്ര ശക്തി അവൾക്ക് ഉണ്ടായിരുന്നോ എന്ന് അവൻ അതിശയിച്ചു….

ഒരിക്കൽ, ചതഞ്ഞരഞ്ഞു തന്റെ കീഴിൽ കിടന്നവളാ…… പക്ഷേ ഇപ്പോൾ ആക്രോശങ്ങൾക്ക് പോലും നല്ല സ്വരം ഉണ്ടായിരുന്നു………

തന്നെ ദഹിപ്പിച്ചു നോക്കുന്ന നോട്ടത്തിൽ ഒരിക്കൽ താൻ അടക്കാൻ ശ്രമിച്ച ദേഷ്യത്തിന്റെ കല്ലറ തുറക്കപ്പെടുന്നത് അവനറിഞ്ഞു…..

” എടി കൊച്ചേ…… കൂടിപ്പോയാൽ നിന്നെ കൊല്ലുകയല്ല ചെയ്യുക….. അന്ന് മലർന്ന് കിടന്നില്ലേ നീ….. കുറേ എണ്ണത്തിന്റെ ചൂടും അടിച്ച്…. അതുപോലെ കിടത്തും പിന്നെയും…. ഒരിക്കൽ കൂടി അതിനുള്ള ഊര് നിനക്കുണ്ടോ….. പറയടി പുല്ലേ……

ദീപൻ നന്നാവാൻ തുടങ്ങിയതാ, ആർക്ക് വേണ്ടിയാണെന്ന് പോലുമറിയാതെ…. വെടക്കാക്കരുത്……… അത് നിനക്ക് നന്നല്ല……മോളെ കാട്ടടീ പുല്ലേ ”

ഗീതുവിന്റെ മുടിയിൽ പിടിച്ചുകൊണ്ടു കൽപ്പിക്കുന്ന അവന്റെ കണ്ണുകൾ ദേഷ്യത്താൽ പുറത്തേക്കുന്തി…..

ഒച്ചപ്പാട് കേട്ട് നന്ദൂട്ടി ഉറക്കം ഞെട്ടി എഴുന്നേറ്റു…. തോളിൽ നിന്ന് എണീക്കാൻ തുടങ്ങിയ മോളെ അവൾ തന്റെ കഴുത്തിലേക്ക് വാവയുടെ തല വെച്ചു കിടത്തി ….

“താൻ ഉണ്ടായിരുന്നോ, അന്ന് അവരുടെ കൂടെ? ”

തന്റെ കണ്ണിലേക്കു തന്നെ സൂക്ഷിച്ചു നോക്കി ചോദിക്കുന്ന അവളേ നോക്കിക്കൊണ്ടിരിക്കെ, അവന്റെ കണ്ണുകൾ പെട്ടെന്ന് നിർവികാരമായി……..

പറഞ്ഞ കൂട്ടത്തിൽ എല്ലാം വാവിട്ട് പോയി എന്ന് അവൻ അപ്പോഴാണ് ചിന്തിക്കുന്നത്…….

” പറയ്…. താനുണ്ടായിരുന്നോ കൂടെ….. ”

പെട്ടെന്ന് അവളുടെ മുടിയിൽ നിന്ന് കയ്യെടുത്തു പുറത്തേക്ക് നടക്കാൻ ഒരുങ്ങിയ അവന് മുന്നിൽ അവൾ തടസ്സം കേറി നിന്നു……

” ഉണ്ടായിരുന്നല്ലേ…… എന്താ മിണ്ടാട്ടം മുട്ടിയത്……കുറച്ചു മുൻപ് വരെ തിറയാട്ടം ആയിരുന്നല്ലോ നാവിന്… ഇപ്പോൾ എന്താ പിടിച്ചു കെട്ടിയത്……? ”

തന്റെ മുന്നിൽ നിൽക്കുന്ന അവളുടെ മുഖം തന്റെ ഉള്ളം കയ്യാൽ ഉയർത്താൻ തുടങ്ങിയ അവന്റെ കൈ, ഗീതു തന്റെ മുഖത്ത് നിന്നും പറിച്ചെറിഞ്ഞു……

” എനിക്ക് നിങ്ങളെ ഒന്നിനെയും അറിയില്ല…… പക്ഷേ ആദ്യമേ നീ പറഞ്ഞില്ലേ ഒന്നുകൂടി കിടത്തുമെന്ന്…… എങ്ങനാ…. എല്ലാവരും ഉണ്ടായിരിക്കും അല്ലേ അന്നത്തെ പോലെ…..

ഒത്തിരിപേരുണ്ടായിരുന്നല്ലേ…… അവരെയൊക്കെ വിളിക്കണം നീ…. എന്നിട്ട് പറയണം ഗീതുവിന്‌ അതൊരു സുഖമായി തോന്നിയില്ലെന്ന്……..

പെണ്ണിനെ അവളുടെ സമ്മതമില്ലാതെ, ഭോഗിക്കുന്നവൻ ഷണ്ഡൻ ആണെന്ന് ഗീതു പറഞ്ഞെന്ന് അവിടെ ചെന്ന് ഉണർത്തിച്ചേരേ…..

സ്വന്തം ഷണ്ഡത്വം , ശരീര ബലം കൊണ്ട് മറച്ചു വെക്കാൻ നോക്കുന്ന ഭീരുവാണ് നിങ്ങളെല്ലാമെന്ന് ഞാൻ പറഞ്ഞെന്നും ….. ”

ദീപനെ പുച്ഛം നിറഞ്ഞ ചൊടികളോടെ നോക്കിയിട്ട് അവന് പോകുവാൻ വഴി മാറി നിന്നു…..

” ഗീതൂ……… ”

വാതിലിനടുത്തെത്തിയിട്ട് എന്തോ പറയാനായി തിരിഞ്ഞ അവനെ കേൾക്കാത്ത ഭാവത്തിൽ അവൾ തിരിഞ്ഞു നിന്നു……

ഒന്നും മിണ്ടാതെ പടിയിറങ്ങി പോകുമ്പോൾ, ഒരിക്കൽ കൂടി അവളേ, പഴയത് പറഞ്ഞു ഭീഷണിപ്പെടുത്താൻ ശ്രമിച്ചതോർത്തു കൊണ്ട് അവൻ ഉള്ളിൽ കരഞ്ഞു……..

💔

മോളൂട്ടി വിതുമ്പുന്നത് കേട്ടിട്ടാണ് ഗീതു നോക്കിയത്… ആദ്യമായിട്ടാണ് മോള് ഇത്രയും ഒച്ചയും ബഹളവും ഒക്കെ കേൾക്കുന്നത് ….

ആകെ ചിരിയും കളിയും മാത്രേ കുഞ്ഞിതുവരെ കണ്ടിട്ടും കേട്ടിട്ടും ഉള്ളു….. അതുകൊണ്ട് നല്ലപോലെ ഭയന്നിട്ടുണ്ട്………

മുഖത്തൂടെ ഒലിച്ചിറങ്ങിയ കണ്ണുനീർ ശക്തിയിൽ തുടച്ചിട്ട്, മോളെ ഒന്നുകൂടി നേരെ കിടത്തിയിട്ട്, വാതിൽ അടച്ചു കുറ്റിയിട്ടിട്ട് ഗീതു മോളെയും കൊണ്ട് കട്ടിലിലേക്ക് ചാഞ്ഞു……

💔

തന്റെ പഴഞ്ചൻ ബൈക്കിൽ കേറി, വാടക വീട്ടിലേക്ക് ഓടിച്ചു പോകുമ്പോഴും ദീപന്റെ കണ്ണുകൾ ഈറനായി……

അങ്ങനെ ഒന്നും പറയണം എന്ന് വിചാരിച്ചതല്ല ….. ഒന്നും തന്നെ വെളിപ്പെടുത്താതെ ഒന്ന് കാണണം കുഞ്ഞിനെ….. അത് മാത്രമായിരുന്നു മനസ്സിൽ….. പക്ഷേ….. ഗീതുവിനോട് അടുക്കേണ്ട വിധം ഇതായിരുന്നില്ല……. ഛെ……. ഇനി അവൾ അറിഞ്ഞുകൊണ്ട് കുഞ്ഞിനെ കാണുക എന്ന് പറയുന്നത് കിനാവ് പോലെ ആണ്…..

ഒന്ന് കണ്ടേച്ചാൽ മതി….. ഒരു കുഞ്ഞ് മുത്തം കൊടുത്തേച്ചാൽ മതി…….. നല്ല നിറമാ മോൾക്ക്…. അവൻ തന്റെ കറുത്ത കൈകളിലേക്ക് ഒന്ന് നോക്കി….

വാവയ്ക്ക് ചുരുണ്ട മുടിയാണ്…….. തലയിലേക്ക് ഉയർന്ന കൈകൾ ഹെൽമെറ്റിൽ തട്ടിയിട്ട്, ദീപൻ തിരിച്ചെടുത്തു….

എനിക്കറിയില്ല ഗീതൂ, അന്ന് ചെയ്തതിനും ഇന്ന് പറഞ്ഞതിനും എങ്ങനെ പ്രായശ്ചിത്തം ചെയ്യണമെന്ന്…..

ഞാൻ മനുഷ്യനല്ല .. .. മൃഗമാണ്…. അല്ല….. മനുഷ്യൻ തന്നെയാണ്…… മൃഗങ്ങൾക്കൊരിക്കലും കഴിയില്ല ഇതുപോലെ ദ്രോഹിക്കാൻ….. വീണ്ടും വീണ്ടും മുറിവേൽപ്പിക്കാൻ….. അതേ…..

ഞാൻ മനുഷ്യനാണ്…… മനുഷ്യൻ മാത്രം……..

വാടക വീടിന്റെ മുറ്റത്തു വണ്ടി വെച്ചിട്ട് വാതിൽ തുറന്നു വേഗം ദീപൻ അകത്തു ചെന്ന് കട്ടിലിലേക്ക് വീണു……….

അവിടെ കിടന്നുകൊണ്ടവൻ തന്നെ മുടിയിലൂടെ വിരലോടിച്ചു….. തന്റെ മുടി…… ഏയ്‌….. ചുരുളിമ തീരെ കുറഞ്ഞ തന്റെ മുടി…….

മോള്….. അവൾക്ക് നല്ല ചുരുണ്ട കറുത്ത മുടിയാ……. അവളുടെ നെഞ്ചിൽ കിടക്കുന്ന കുഞ്ഞിനെ സംസാരിക്കുന്നതിനിടയിൽ പല പ്രാവശ്യം നോക്കിയിരുന്നു….

ഒന്ന് കാണാൻ……. പക്ഷേ…… ഇല്ല….. അവളൊരിക്കലും തോറ്റു തരില്ല…… ഒറ്റയ്ക്കായവർ എന്നും ജയിച്ച ചരിത്രമേ ഉള്ളു…..

അവളോട്‌ മല്ലിടാൻ പോയാൽ താൻ തോറ്റു പോവും …….. അന്ന് കരഞ്ഞ കണ്ണുനീരിനും പൊഴിച്ച ചോരയിലും കെട്ടിപ്പടുത്ത ഉശിരുള്ള മനസ്സാണ്……അതിനെ തകർക്കാൻ തന്റെ കായികബലം പോരാ……..

പിന്നെയും ഓരോന്നാലോചിച്ചു കിടന്നിട്ട് ഒടുവിൽ മനസിലൊന്ന് ഉറപ്പിച്ചിട്ടു ദീപൻ പുറത്തേക്കിറങ്ങി……… അവളേ കാണാൻ…..

(“തുടരും)

💔 മൊഴിയിടറാതെ 💔 : ഭാഗം 1

💔 മൊഴിയിടറാതെ 💔 : ഭാഗം 2