💕നിനക്കായ്‌💕: ഭാഗം 8

രചന: ആമി

അവന്റെ ശ്വാസം കഴുത്തിൽ തട്ടുമ്പോൾ ഉള്ളിലൂടെ ഒരു മിന്നൽ പോകുന്നത് പോലെ തോന്നി ഗായത്രിക്ക്.. അവൾ അർജുന്റെ കൈപ്പിടിയിൽ നിന്നും കൈകൾ മോചിപ്പിക്കാൻ ശ്രമിച്ചു.. പക്ഷെ അർജുൻ കൂടുതൽ ബലത്തിൽ പിടിച്ചത് കാരണം അത് നടന്നില്ല.. മാത്രമല്ല അവന്റെ പിടിയുടെ ബലത്തിൽ അവൾക്ക് കൈ നന്നായി വേദന എടുത്തു.. അർജുൻ ഉള്ളിലെ അവളോട്‌ ഉള്ള പ്രണയം നിറഞ്ഞു വന്നത് അവളിലേക്ക് ഒഴുകി വിടുവാൻ ഉള്ളം വെമ്പി..

അവളുടെ കഴുത്തിൽ ചുംബനം കൊണ്ട് മൂടുമ്പോൾ എല്ലാം ഒരു തരം വികാരം അവന്റെ ഉള്ളിൽ നിറഞ്ഞു വന്നു.. അവളുടെ ചെവികൾക്കിടയിലൂടെ ഒലിച്ചു ഇറങ്ങിയ കണ്ണുനീർ അവന്റെ മുഖത്തു തട്ടിയതും അവൻ പതിയെ മുഖം ഉയർത്തി ഗായത്രിയെ നോക്കി.. കണ്ണടച്ച് കിടക്കുന്ന അവളുടെ മുഖത്തോട് മുഖം അടുപ്പിച്ചു കൊണ്ട് അവളെ നോക്കി കിടന്നു അർജുൻ.. പിന്നെ അവളുടെ കണ്ണിൽ ചുംബിച്ചു.. ഗായത്രി ഒന്ന് എതിർക്കാൻ പോലും കഴിയാതെ കിടന്നു..

കണ്ണുകളിൽ നിന്നും അവന്റെ ചുണ്ടുകൾ അവളുടെ ചുണ്ടുകളെ ലക്ഷ്യം വെച്ചു പാഞ്ഞതും ഗായത്രി ഒന്ന് അയഞ്ഞ അവന്റെ കൈ പിടിയിൽ നിന്നും കൈകൾ വലിച്ചു കൊണ്ട് അവന്റെ നെഞ്ചിൽ ആഞ്ഞു തള്ളി.. പെട്ടന്ന് ആയത് കൊണ്ട് അർജുൻ സൈഡിലേക്ക് ചെരിഞ്ഞു വീണു.. ഈ സമയം ഗായത്രി വേഗം എഴുന്നേറ്റു ലൈറ്റ് ഇട്ടു… ദേഷ്യത്തിൽ തന്നെ നോക്കുന്ന ഗായത്രിയെ കണ്ടു അർജുൻ എന്താ എന്ന ഭാവത്തിൽ നോക്കി.. ഗായത്രി ഒന്നും മിണ്ടാതെ തലയണ എടുത്തു നിലത്തു ഇട്ടു കിടന്നു..

അവൾ കിടന്നതും അർജുൻ വേഗം തന്നെ മറ്റേ തലയണ എടുത്തു അവളുടെ അടുത്ത് ഇട്ടു അവളുടെ അടുത്ത് അവനും കിടന്നു.. അത് കണ്ടു ഗായത്രി വേഗം എഴുനേറ്റു ഇരുന്നു… എന്താ നിങ്ങളുടെ ഉദ്ദേശം… അർജുൻ ഒന്നും മിണ്ടാതെ തലയിണയിൽ മുഖം പൂഴ്ത്തി കിടന്നു.. ഗായത്രി ദേഷ്യത്തിൽ എഴുനേൽക്കാൻ തുടങ്ങിയതും അർജുൻ അവളുടെ കയ്യിൽ പിടിച്ചു.. നീ എവിടെ കിടന്നാലും ഞാൻ നിന്റെ കൂടെ കിടക്കു.. വെറുതെ അങ്ങോട്ടും ഇങ്ങോട്ടും നടന്നു ഉറക്കം കളയണ്ട..

അർജുൻ അത് പറഞ്ഞതും ഗായത്രി ബെഡിൽ നിന്നും പുതപ്പ് എടുത്തു മേലെ ഇട്ടു തിരിഞ്ഞു കിടന്നു.. അവൾക്കു അവനോടു ദേഷ്യം കൂടി വന്നു..അവന്റെ ഓരോ പ്രവർത്തികളും അവളിൽ ദേഷ്യവും ഒപ്പം അസ്വസ്ഥതയും ഉണ്ടാക്കി.. ഓരോന്ന് ഓർത്തു ഗായത്രി പെട്ടന്ന് ഉറങ്ങി.. അർജുൻ അവൾ ഉറങ്ങി എന്ന് മനസ്സിലാക്കി എഴുന്നേറ്റു ലൈറ്റ് ഓഫ് ചെയ്തു അവളോട്‌ ചേർന്നു കിടന്നു…

എന്നും രാത്രി സ്വപ്നത്തിൽ മാത്രമേ നിന്റെ കൂടെ ഇങ്ങനെ കിടന്നിട്ടുള്ളു.. പക്ഷെ ഇപ്പോൾ ഇത് സത്യം ആണെന്ന് വിശ്വസിക്കാൻ തന്നെ പാടാണ്.. നീ എന്നെ എത്ര വെറുത്താലും എനിക്ക് നിന്റെ കൂടെ ഇങ്ങനെ കിടക്കണം ഗായത്രി.. രണ്ടു വർഷം ഭ്രാന്തനെ പോലെ ഞാൻ കഴിഞ്ഞത് നീ കാരണം ആണ്.. ഇനി മരണം വരെ ഇങ്ങനെ അടുത്ത് തന്നെ ഉണ്ടാവണം നീ.. ഇല്ലെങ്കിൽ ഞാൻ പഴയതിലും വലിയ ഒരു ഭ്രാന്തൻ ആവും.. അവളോട്‌ കൂടുതൽ ചേർന്നു കിടന്നു കൊണ്ട് അർജുൻ മനസ്സിൽ പറഞ്ഞു..

കണ്ണിൽ ഉറക്കം നിറയുന്നത് വരെ അവളുടെ മുടിയിലകളിൽ തല വെച്ചു കിടന്നു… ഉറക്കം കണ്ണിൽ വന്നു നിറയുമ്പോൾ അർജുൻ ഒരു കൈ കൊണ്ട് അവളെ ചേർത്ത് പിടിച്ചിരുന്നു ഒരിക്കലും വിട്ടു കൊടുക്കില്ല എന്ന് പറയും പോലെ.. ഗായത്രി രാവിലെ കണ്ണ് തുറക്കുമ്പോൾ അർജുനെ കൈപ്പിടിയിൽ ആണെന്ന് അവൾക്കു മനസിലായി.. അവൾ പതിയെ ചരിഞ്ഞു കിടന്നു അവനെ നോക്കി..മുഖത്തേക്ക് വീണു കിടക്കുന്ന മുടികൾക്കിടയിലും കൊച്ചു കുട്ടികളെ പോലെ തോന്നി അവന്റെ മുഖം..

അവളുടെ ഉള്ളിലും പഴയ കാമുകി ഉണർന്നിരുന്നു.. ഒരു കാലത്ത് അർജുന്റെ നോട്ടം കിട്ടാൻ വേണ്ടി പോലും ഓരോന്ന് ചെയ്തതും അവന്റെ മുന്നിൽ ഇഷ്ടം പറയാൻ വേണ്ടി പോയി നിന്നതും എല്ലാം ഗായത്രി ഓർത്തു.. ചുണ്ടിൽ ചെറു മന്ദഹാസം നിറഞ്ഞു..ഓർമ വെച്ച നാൾ മുതൽ തോന്നിയ പ്രണയം ഒടുവിൽ വിവാഹം വരെ എത്തിയതും കല്യാണ രാത്രി അവളുടെ മനസ്സിൽ കടന്നു വന്നതും ഗായത്രിയുടെ കണ്ണുകൾ നിറഞ്ഞു വന്നു ഒപ്പം ദേഷ്യവും.. അവൾക്കു അർജുനോട് അത് വരെ തോന്നിയ ഇഷ്ടം എല്ലാം എങ്ങോ പോയി..

പകരം തന്റെ ജീവിതം നശിപ്പിച്ചവനോട് ഉള്ള പക തോന്നി.. ഗായത്രി അർജുന്റെ കൈകൾ മാറ്റി വേഗം എഴുനേറ്റു ബാത്രൂമിൽ പോയി.. ഗായത്രി പോയത് മനസിലാക്കി അർജുൻ ഉണർന്നു.. ബാത്രൂമിൽ നിന്നും ശബ്ദം കേട്ട് അവൻ അവിടെ തന്നെ കിടന്നു.. ഗായത്രി കുളി കഴിഞ്ഞു ഇറങ്ങി മുടിയിലെ ഈറൻ കളയുകയായിരുന്നു..അർജുന്റെ മുഖത്തു വെള്ളം വീണതും അവൻ അവളെ തന്നെ നോക്കി കിടന്നു..ഗായത്രി മുടി കെട്ടിവെച്ചു അർജുനെ നോക്കുമ്പോൾ തന്നെ നോക്കി കിടക്കുന്ന അർജുനെ കണ്ടതും അവൾക്ക് ലജ്ജ തോന്നി..

ഗായത്രി വേഗം മുഖം മാറ്റി ജനലരികിൽ പോയി നിന്നു.. വാതിൽ മുട്ടുന്നത് കേട്ട് അർജുൻ എഴുന്നേറ്റു വാതിൽ തുറന്നു.. ജോൺ ആയിരുന്നു.. ജോൺ അകത്തു വന്നപ്പോളും ഗായത്രി അവനെ തിരിഞ്ഞു നോക്കിയില്ല.. അർജുൻ അവനോടു ഇപ്പൊ വരാം എന്ന് പറഞ്ഞു ബാത്രൂമിൽ കയറി.. ജോൺ ഗായത്രിയുടെ അടുത്ത് വന്നു.. ഗായത്രി അത് മനസ്സിലാക്കി എങ്കിലും അവനെ തിരിഞ്ഞു നോക്കിയില്ല .

ഗായത്രി.. തനിക് ഞങ്ങളോട് ദേഷ്യം കാണും എന്ന് അറിയാം.. പക്ഷെ ഞങ്ങളുടെ കൂട്ടുകാരന് വേണ്ടി ഞങ്ങൾക്ക് അവന്റെ കൂടെ നിൽക്കേണ്ടി വന്നു.. ഇന്നലെ സംസാരിക്കാൻ ഉള്ള ഒരു അവസ്ഥയിൽ അല്ലായിരുന്നല്ലോ താൻ.. അതാണ് ഞങ്ങൾ ഒന്നും പറയാതെ ഇരുന്നത്… ഗായത്രി അപ്പോളും അതെ നിൽപ്പ് തുടർന്നു.. കൂട്ടുകാരന് വേണ്ടി സംസാരിക്കാൻ വന്ന ജോണിനോട് ഗായത്രിക്ക് ദേഷ്യം തോന്നി.. പക്ഷെ ജോണിന് അവന്റെ കൂട്ടുകാരൻ ആയിരുന്നു വലുത്…

തന്റെ ജീവിതത്തിൽ രണ്ടു വർഷത്തെ നഷ്ടം എല്ലാം അവൻ കാരണം തന്നെ ആണ്.. പക്ഷെ നീ അവനെ മനസ്സിലാക്കണം.. നിന്നെ അവൻ ഒരുപാട് സ്നേഹിക്കുന്നുണ്ട്.. ഒരുപാട് എന്ന് പറഞ്ഞാൽ ഒരുപാട്.. ഒരിക്കൽ നീ അത് മനസ്സിലാക്കും.. നീ ഇല്ലാത്ത രണ്ടു വർഷം അവൻ കഴിഞ്ഞത് ഞങ്ങൾക്കേ അറിയൂ.. അവൻ ഈ കാണിക്കുന്ന ദേഷ്യം എല്ലാം വെറുതെ ആണ്.. വീണ്ടും നിന്നെ കണ്ടപ്പോൾ തോന്നിയ നിന്നോട് ഉള്ള പരിഭവം.. നീയും എല്ലാം മറക്കണം.. പഴയത് പോലെ അവനെ സ്നേഹിക്കണം..

. ഗായത്രിയുടെ മുഖം ദേഷ്യത്താൽ ചുമന്നു.. അവൾ ജോണിന് നേരെ തിരിഞ്ഞു നിന്നു.. ഞാൻ സ്നേഹിക്കണം അല്ലെ..ഒരുപാട് സ്വപ്നം കണ്ടാണ് ഞാൻ അയാളുടെ ഭാര്യ ആയത്.. എല്ലാം ഒറ്റ ദിവസം കൊണ്ട് അയാൾ തകർത്തു.. എന്റെ അച്ഛൻ മരിക്കാൻ കാരണം അയാൾ ആണ്.. എന്താ ഞാൻ മറക്കേണ്ടത്.. രണ്ടു വർഷം അയാളെ പേടിച്ചു ഒളിച്ചു കഴിഞ്ഞതോ..പറയാൻ എന്ത് എളുപ്പം ആണ്.. മറക്കണം പോലും.. ഗായത്രി എനിക്ക് മനസ്സിലാവും തന്റെ അവസ്ഥ..

പക്ഷെ രണ്ടു പേർക്കും പരസ്പരം ഇഷ്ടം ആണ്.. പിന്നെ എന്തിനാ ഈ വാശി… എനിക്ക് അയാളെ ഇഷ്ടം അല്ല.. പിന്നെ അയാൾക്ക് എന്നെ ഇഷ്ടം ആണെന്ന് വിശ്വസിക്കാൻ മാത്രം മണ്ടി അല്ല ഞാൻ.. എന്നെ കൂടെ കൂട്ടുന്നത് ഇഷ്ടം കൊണ്ട് ഒന്നും അല്ല.. അയാൾ ജയിച്ചു എന്ന് കാണിക്കാൻ ആണ്.. ജയിക്കാൻ എന്തും ചെയ്യും… നാവ് കൊണ്ട് അയാളുടെ പേര് പോലും പറയുന്നത് ഇഷ്ടം അല്ല എനിക്ക്.. അത്രയും ഞാൻ വെറുക്കുന്നു… അടക്കി പിടിച്ച തേങ്ങലോടെ ഗായത്രി പറഞ്ഞു..

ജോൺ അവളോട്‌ എന്ത് പറഞ്ഞിട്ടും കാര്യം ഇല്ലെന്നു മനസ്സിലായി തിരിഞ്ഞു പോകാൻ തുടങ്ങുമ്പോൾ ആണ് ബാത്രൂമിന്റെ വാതിൽ തുറന്നു അർജുൻ വന്നത്.. ജോൺ ഒന്നും നടക്കാത്തത് പോലെ അവനോട് സംസാരിച്ചു.. അജു.. എപ്പോളാ ഡാ യാത്ര.. ബ്രേക് ഫാസ്റ് കഴിച്ചു പോകാം.. കാറിൽ തന്നെ പോകാം ലെ.. ഇത്രയും ദൂരം ഉള്ളത് അല്ലെ.. ട്രെയിൻ വേണോ.. വേണ്ട കാർ മതി.. അല്ലെങ്കിൽ ചിലർക്ക് ഒക്കെ ഇറങ്ങി ഓടാൻ തോന്നും.. പിന്നെ എനിക്ക് അത് ഒരു പണി ആവും…

അർജുൻ തല തുവർത്തി കൊണ്ട് ഗായത്രിയെ നോക്കി പറഞ്ഞു.. ഗായത്രി അവനെ നോക്കാതെ നിന്നു.. ജോൺ റെഡി ആവാൻ പറഞ്ഞു കൊണ്ട് മുറിയിൽ നിന്നും പോയി.. ജോണും സുധിയും വിനുവും എല്ലാം റെഡി ആയി അർജുനെ വിളിച്ചു.. അവൻ വരാം എന്ന് പറഞ്ഞു ഗായത്രിയെ നോക്കി.. അവർ താഴെ ഉണ്ട്.. വാ പോകാം.. ഗായത്രി ഒന്നും മിണ്ടാതെ തല താഴ്ത്തി അവന് പുറകിൽ നടന്നു..

വാതിൽക്കൽ എത്തിയ അർജുൻ എന്തോ ഓർത്തത് പോലെ നിന്നു.അവൻ തിരിഞ്ഞു നിന്നു ഗായത്രിയെ നോക്കി.. ഗായത്രി അർജുൻ നിന്നത് കണ്ടു മുഖം ഉയർത്തി നോക്കുമ്പോൾ തന്നെ നോക്കി നിൽക്കുന്ന അർജുനെ ആണ് കണ്ടത്.. അർജുൻ അവളുടെ അടുത്ത് വന്നു അവളുടെ ഇടുപ്പിലൂടെ കയ്യിട്ട് ചേർത്ത് പിടിച്ചു.. ഗായത്രി പെട്ടന്ന് ഉള്ള അവന്റെ പെരുമാറ്റം കണ്ടു അന്താളിച്ചു.. അവൾ അവന്റെ നെഞ്ചിൽ തള്ളി കൊണ്ടിരുന്നു… ഇനി നിന്നെ ഇങ്ങനെ ഒറ്റയ്ക്ക് കിട്ടാൻ രാത്രി ആവണം..

അത് കൊണ്ട്… അർജുൻ പറഞ്ഞു മുഴുവിക്കും മുന്നേ അവളുടെ ചുണ്ടുകൾ കവർന്നെടുത്തു.. ഗായത്രി തടയാൻ നോക്കി എങ്കിലും അവന്റെ പല്ലുകൾ തട്ടി അവളുടെ ചുണ്ടുകൾ വേദനിച്ചു..അർജുൻ ആവേശത്തോടെ അവളുടെ ചുണ്ടുകളെ പൊതിഞ്ഞു കൊണ്ടേ ഇരുന്നു.. ഒപ്പം ഇടുപ്പിലെ കൈ സ്ഥാനം മാറി നഗ്നമായ വയറിൽ സ്പർശിച്ചതും ഗായത്രിയുടെ ശ്വാസം നിലയ്ക്കുന്നത് പോലെ തോന്നി.. അർജുനിൽ അപ്പോളും ആവേശം കെട്ടടങ്ങിയില്ല.. ഫോൺ അടിക്കുന്ന ശബ്ദം ആണ് അർജുനെ ഉണർത്തിയത്.. അവൻ കിതപ്പോടെ അവളുടെ ചുണ്ടുകളെ മോചിപ്പിച്ചു..

ഗായത്രി ശ്വാസം എടുക്കാൻ ബുദ്ധി മുട്ടി.. അവളെ വീണ്ടും തന്നിലേക്ക് അടുപ്പിച്ചു നിർത്തി അർജുൻ… ഓരോ തവണയും നീ എന്നെ കൂടുതൽ വെറുക്കുന്നു എന്ന് എനിക്ക് അറിയാം.. പക്ഷെ എനിക്ക് കഴിയില്ല..ഈ ഒരൊറ്റ ചുംബനം കൊണ്ട് ഞാൻ നിന്നോട് എനിക്ക് പറയാൻ ഉള്ളത് മുഴുവൻ പറയുന്നുണ്ട്.. ഒരിക്കൽ നീ അത് മനസ്സിലാക്കും.. അർജുൻ അവളുടെ കൈ പിടിച്ചു കൊണ്ട് താഴേക്ക് നടന്നു.. ഗായത്രിയുടെ മനസ്സിൽ ഒരുപാട് സംഘർഷം നടന്നു കൊണ്ടിരുന്നു.. അർജുൻ തന്നെ സ്നേഹിക്കുന്നു എന്ന് വിശ്വസിക്കാൻ മാത്രം അവൾക്കു കഴിഞ്ഞില്ല..

പക്ഷെ അവന്റെ വാക്കുകൾ എല്ലാം ചെന്നു എത്തുന്നത് അങ്ങനെ ഒരു നിഗമനത്തിൽ ആണ്.. പിടയ്ക്കുന്ന ഹൃദയത്തോടെ അവന്റെ കൂടെ പാവയെ പോലെ നടന്നു ഗായത്രി… യാത്രയിൽ ഉടനീളം ഗായത്രിയുടെ മനസ്സിൽ പഴയ ഓർമ്മകൾ തിങ്ങി നിറയുകയായിരുന്നു.. അർജുനും ജോണും സുധിയും വിനുവും എല്ലാം ഓരോന്ന് സംസാരിച്ചു കൊണ്ടിരുന്നു.. എങ്കിലും അർജുന്റെ കണ്ണുകൾ ഗായത്രിയിൽ തന്നെ ആയിരുന്നു.. ഗായത്രി ഇതൊന്നും അറിയാതെ പുറത്തെ കാഴച്ചകളിൽ മുഴുകി..

ഒരിക്കലും ജീവിതത്തിൽ സംഭവിക്കില്ല എന്ന് കരുതിയത് ആണ് ഈ യാത്ര.. പക്ഷെ വിധി വീണ്ടും..യാത്ര എങ്ങോട്ട് ആണെന്ന് മനസ്സിലായതും അവളുടെ മനസ്സ് പഴയ ഓർമ്മകളിലേക്ക് സഞ്ചരിക്കുകയായിരുന്നു..മാളുവിനെ പറ്റി ഓർത്തതും മനസ്സിൽ സന്തോഷവും ഒപ്പം സങ്കടവും തോന്നി.. താൻ കാണണം എന്ന് ആഗ്രഹിക്കുന്നതും തന്നെ കാണാത്തതിൽ ഈ ഭൂമിയിൽ ആകെ വിഷമിക്കുന്നതും അവൾ മാത്രം ആയിരിക്കും എന്ന് ഓർത്തു… ഓർമകളിലേക്ക്….

ഗായത്രിയുടെ കളികൂട്ടുകാരി ആയിരുന്നു മാളവിക എന്ന മാളു.. ഒരുമിച്ചു പഠിച്ചും കളിച്ചും വളർന്നത് കൊണ്ട് തന്നെ മാളുവിൽ നിന്നും അവളുടെ ഏട്ടൻ അർജുനെ പറ്റി ഗായത്രി ഒരുപാട് കേട്ടിരുന്നു.. ആദ്യമൊക്കെ കേൾക്കുമ്പോൾ ഒരു കേൾവിക്കാരി മാത്രം ആയിരുന്നു എങ്കിലും പിന്നീട് അവൾക്കു മാളുവിൽ നിന്നും അവനെ കുറിച്ച് കൂടുതൽ അറിയാൻ വേണ്ടി കൊതിച്ചു.. ഗായത്രിയുടെ വീടിന്റെ അടുത്ത് നിന്നും കുറച്ചു ദൂരെ ആയിരുന്നു മാളുവിന്റെ വീട്.. ഒഴിവ് ദിവസങ്ങളിൽ എല്ലാം അവർ അമ്പലത്തിൽ വെച്ചു ആണ് കണ്ടിരുന്നത്.. അവരുടെ സൗഹൃദം വളരുന്നതിനു ഒപ്പം ഗായത്രിയുടെ മനസ്സിൽ അർജുനോട്‌ പ്രണയവും വളർന്നു..

ഒരിക്കൽ പോലും കണ്ടില്ലെങ്കിലും ആ കൗമാരക്കാരിയിൽ അർജുൻ ഒരു പ്രണയം ആയി വളർന്നു കൊണ്ടേ ഇരുന്നു.. അർജുൻ സിറ്റിയിൽ ഉള്ള അവന്റെ അച്ഛന്റെ പെങ്ങളുടെ വീട്ടിൽ നിന്നായിരുന്നു പഠനം.. അത് കൊണ്ട് ഇടയ്ക്കെ നാട്ടിൽ വരൂ.. അത് കൊണ്ട് അർജുനെ ഒരിക്കൽ പോലും ഗായത്രി കണ്ടിരുന്നില്ല.. വിശ്വനാഥന്റെയും വാസുകിയുടെയും രണ്ടു മക്കൾ ആയിരുന്നു അർജുനും മാളുവും.. നാട്ടിൽ ചെറിയ ബിസ്സിനെസ്സ് ആയിരുന്നു വിശ്വന്.. വാസുകി സാധ ഒരു വീട്ടമ്മ..

ഹൈസ്കൂൾ മുതൽ ആയിരുന്നു മാളുവിന്റയും ഗായത്രിയുടെയും സൗഹൃദം തുടങ്ങുന്നത്..ഗായത്രിക്ക് മാളുവിൽ നിന്നും കേട്ടതു വച്ചു അർജുന്റെ ഏകദേശ രൂപം മനസ്സിൽ ഉണ്ടായിരുന്നു.. അവളുടെ ഉറക്കം കളയാൻ മാത്രം അർജുൻ അവളിൽ പടർന്നു കൊണ്ടേ ഇരുന്നു..ഗായത്രിക്ക് ആകെ സ്വന്തം എന്ന് പറയാൻ ഉള്ളത് അവളുടെ അച്ഛൻ മാത്രം ആയിരുന്നു.. അവിടെ അടുത്ത് ഒരു ചെറിയ കട ഇട്ടു അതിൽ നിന്നുള്ള വരുമാനം കൊണ്ട് ആയിരുന്നു അവരുടെ ജീവിതം.. മാളുവിന്റെ പുത്തൻ വസ്ത്രങ്ങളോ ആഭരങ്ങളോ അവളെ മോഹിപ്പിച്ചില്ല…

ഗായത്രി എന്നും ദാവണി മാത്രം ഉടുക്കുന്ന ഒരു സാധാരണ പെൺകുട്ടി തന്നെ ആയിരുന്നു.. അങ്ങനെ ഇരിക്കെ മാളുവിന്റെ പിറന്നാളിന് അവൾ ഗായത്രിയെ ക്ഷണിച്ചു.. പക്ഷെ ഗായത്രിക്ക് പോകാൻ മടി തോന്നി.. കാരണം മാളു പറഞ്ഞു അവൾക്കു അറിയാമായിരുന്നു ആ ഫങ്ക്ഷന് വലിയ വലിയ ആളുകൾ ഒക്കെ വരുമെന്ന്.. എന്തോ ഗായത്രിക്ക് പോകാൻ തോന്നിയില്ല.. പക്ഷെ ഉള്ളിൽ അന്ന് അർജുനെ കാണാമല്ലോ എന്ന ഒരു ആഗ്രഹവും ഉണ്ടായിരുന്നു… ഡി നീ എന്താ ആലോചിക്കുന്നേ…

ഇല്ല.. മാളു.. അന്ന് എനിക്ക് വേറൊരു പരിപാടി ഉണ്ട്.. നിന്റെ ഉറ്റ കൂട്ടുകാരിയുടെ പിറന്നാളിനോക്കാൻ വലുത് ആണോ അത്.. അത്… അത് പിന്നെ.. എനിക്ക് അറിയാം നീ എന്താ വരാത്തത് എന്ന്.. മാളു അത് പറഞ്ഞു അവളുടെ കയ്യിൽ ഒരു പൊതി കൊടുത്തു.. ഗായത്രി അതിലേക്കും മാളുവിനെയും കണ്ണ് മിഴിച്ചു നോക്കി.. പോത്തേ എന്നെ നോക്കാതെ അത് തുറന്നു നോക്ക്… ഗായത്രി അത് തുറന്നപ്പോൾ പച്ച നിറത്തിൽ ഉള്ള ഒരു ദാവണി ആയിരുന്നു.. ഗായത്രി അത് കണ്ടതും മാളുവിനെ നോക്കി.. ഇത് ഉടുത്തു വേണം നീ വരാൻ ഞാൻ കാത്തിരിക്കും..

വന്നില്ലെങ്കിൽ ഞാൻ മിണ്ടില്ല.. അതും പറഞ്ഞു മാളു ഓടി.. ഗായത്രിക്ക് പറയാൻ ഉള്ളത് പോലും കേൾക്കാതെ.. മാളു കുറച്ചു ദൂരെ ചെന്നു വിളിച്ചു പറഞ്ഞു.. വരുമ്പോൾ എനിക്ക് സമ്മാനം കൊണ്ട് വരണം.. ദൂരെ ഓടി പോകുന്ന മാളുവിനെ നോക്കി ഗായത്രി ആ ആൽമരചുവട്ടിൽ നിന്നു.. ഗായത്രി പോകുന്ന കാര്യം രാത്രി അവളുടെ അച്ഛനോട് പറഞ്ഞു.. അയാൾ സമ്മതിക്കുകയും ചെയ്തു.. പക്ഷെ അവളുടെ അടുത്ത സങ്കടം മാളുവിന്‌ സമ്മാനം എന്ത് മേടിക്കും എന്നായിരുന്നു..

അച്ഛനോട് പൈസ ചോദിക്കാൻ പേടിച്ചു അവൾ അവളുടെ കയ്യിൽ സ്വരുക്കൂട്ടി വച്ച കുറച്ചു പൈസ കൊണ്ട് എന്തെങ്കിലും വാങ്ങാം എന്ന് കരുതി.. പിറന്നാൾ ദിവസം ഗായത്രി രാവിലെ മാളുവിന്റെ കൂടെ അമ്പലത്തിൽ പോയി.. രണ്ടു പേരും നന്നായി പ്രാർത്ഥിച്ചു.. ഗായത്രിക്ക് എന്തോ ഹൃദയം വല്ലാതെ മിടിക്കുന്നത് പോലെ തോന്നി.. അതിന്റെ ചുറ്റും എവിടെയോ തനിക് പ്രിയപ്പെട്ട എന്തോ ഉള്ളെന്ന് ഒരു തോന്നൽ..തിരിച്ചു പോകാൻ ഇറങ്ങിയ മാളു വൈകുന്നേരം അവളോട്‌ ഉറപ്പായും വരണം എന്ന് പറഞ്ഞു യാത്ര പറഞ്ഞു..

അപ്പോൾ ആണ് മാളു കയറിയ ബൈക്ക് ഗായത്രിയുടെ കണ്ണിൽ പെട്ടത്.. ഗായത്രിയുടെ ഉള്ളിൽ അത് അർജുൻ ആവുമോ എന്ന ചിന്തയിൽ ആ മുഖം കാണാൻ വേണ്ടി ഒന്ന് കൂടി നോക്കും മുന്നേ അവർ പോയിരുന്നു.. ഗായത്രിക്ക് നല്ല സങ്കടം തോന്നി.. ഇത്രയും അടുത്ത് ഉണ്ടായിട്ടും ഒന്ന് കാണാൻ കഴിയാത്തതിൽ വിഷമത്തോടെ അവൾ നടന്നു.. വൈകുന്നേരം മാളു കൊടുത്ത ദാവണി ഉടുത്തു ഗായത്രി ഒരുങ്ങി..

കാതിൽ കുഞ്ഞു ജിമിക്കിയും കഴുത്തിൽ ഏലസ്സ് കെട്ടിയ ഒരു കറുത്ത ചരടും കയ്യിൽ കുപ്പിവളകളും ഇട്ടു അവൾ ഒരുങ്ങി.. കണ്ണിൽ കണ്മഷി പടർത്തുമ്പോൾ എല്ലാം അവളുടെ ഉള്ളിൽ അർജുനെ കാണാമല്ലോ എന്ന ചിന്ത മാത്രം ആയിരുന്നു.. രാജൻ ആണ് അവളെ മാളുവിന്റെ വീട്ടിൽ കൊണ്ട് ആക്കിയത്.. മുറ്റത്തു നിറഞ്ഞ വണ്ടികളും വീടിന്റ അലങ്കാരവും എല്ലാം കണ്ടു ഗായത്രിക്ക് പേടി തോന്നി.. കാറിൽ നിന്നും ഇറങ്ങി നടന്നു പോകുന്നവരുടെ കയ്യിലെ സമ്മാനപൊതികളുടെ വലിപ്പം കണ്ടു അവൾ തന്റെ കയ്യിലേക്ക് നോക്കി.

അവൾ ദാവണിയുടെ തലപ്പ് കൊണ്ട് അത് മറച്ചു.. പിന്നെ പതിയെ പിടയ്ക്കുന്ന കണ്ണുകളോടെ അകത്തേക്കു നടന്നു.. മുൻവശത്തൂടെ പോകാൻ മടി തോന്നി ഗായത്രി അടുക്കളയുടെ ഭാഗത്തേക്ക് നടന്നു.. ചിലരുടെ നോട്ടം തന്നിൽ ആണെന്ന് മനസ്സിലായതും ഗായത്രി വേഗം നടന്നു അടുക്കളയിൽ എത്തി.. അകത്തു കയറാൻ വേണ്ടി കുഞ്ഞിഞ്ഞു നിന്ന് ചെരുപ്പിന്റെ വള്ളി അഴിച്ചു ഉയർന്നതും ആരുടെയോ തലയുമായി അവളുടെ തല കൂട്ടി ഇടിച്ചു..

ഇടിയുടെ ആഘാതത്തിൽ വീഴാൻ പോയ അവളെ രണ്ടു കൈകൾ വന്നു പൊതിഞ്ഞു പിടിച്ചു.. ആ കൈകൾ കൊണ്ട് അവളുടെ ജാക്കറ്റിന്റെ പുറകിലെ വള്ളിയും ഒപ്പം രണ്ടു ഹുക്കുകളും അഴിഞ്ഞു.. ഗായത്രി അടച്ചു പിടിച്ച കണ്ണുകൾ പേടിയോടെ തുറന്നതും തന്നെ നോക്കി നിൽക്കുന്ന രണ്ടു കണ്ണുകൾ കണ്ടു.. എന്തോ ആദ്യ കാഴചയിൽ തന്നെ ആ നോട്ടം അവളുടെ ഹൃദയത്തിൽ കൊണ്ടു……….….. (തുടരും)