ജന്മദിനത്തിൽ വിരമിക്കൽ; എൽസമ്മക്ക് ലഭിച്ചത് ‘ഗോൾഡൻ സമ്മാനം’
ദുബൈ: നാല് പതിറ്റാണ്ടിന്റെ നഴ്സിങ് സേവനത്തിൽനിന്ന് ജന്മദിനത്തിൽ വിരമിക്കൽ. പന്തളം സ്വദേശി എൽസമ്മ വർഗീസിന്‍റെ ജീവിതത്തിൽ ജൂലൈ 17ന്റെ പ്രത്യേകത ഇതായിരുന്നു. എന്നാൽ ആ ദിവസം ഒരു പ്രത്യേക ജന്മദിന സമ്മാനം എൽസമ്മയെ കാത്തിരുന്നു. യു.എ.ഇ ഗോൾഡൻ വിസ! വിരമിക്കുന്ന ദിവസം ‘സുവർണ സമ്മാനം’ ലഭിച്ചതിന്‍റെ സന്തോഷത്തിലാണ് എൽസമ്മയും കുടുംബവും ഇപ്പോൾ. അൽ ഐനിലെ അൽ തവാം ആശുപത്രിയിലെ നഴ്സായിരുന്നു 61 കാരിയായ എൽസമ്മ. 2006 ൽ തവാം ആശുപത്രിയിൽ പ്രവേശിപ്പിക്കപ്പെട്ടു.
“യുഎഇയിൽ വിരമിക്കൽ പ്രായം 60 ആണെങ്കിലും, തവാം ഹോസ്പിറ്റൽ അധികൃതർ എനിക്ക് ഒരു വർഷം കൂടി സേവനം അനുവദിച്ചു. കോവിഡ് മുന്നണിപ്പോരാളികളായ നഴ്സുമാർക്ക് യുഎഇ സർക്കാർ ഗോൾഡൻ വിസ നൽകുന്നുണ്ടെന്ന് അറിയാമായിരുന്നെങ്കിലും വിരമിക്കാനിരിക്കെ അത് ലഭിക്കുമെന്ന പ്രതീക്ഷ ഉണ്ടായിരുന്നില്ല. എന്നാൽ എല്ലാ ദിവസവും ഇ-മെയിൽ പരിശോധിക്കാൻ എന്‍റെ സഹപ്രവർത്തകർ എന്നോട് പറയും. ഞാനത് കാര്യമാക്കിയില്ല. എന്നിരുന്നാലും, എന്‍റെ വിരമിക്കൽ ദിവസം എന്‍റെ ജന്മദിനത്തിൽ ഗോൾഡൻ വിസ അനുവദിച്ചുവെന്ന സന്ദേശം ലഭിച്ചത് എന്‍റെ ജീവിതത്തിലെ മറക്കാനാവാത്ത നിമിഷമായിരുന്നു,”അവർ പറഞ്ഞു.
മുംബൈയിലെ ഡോ. ആർ.എൻ. കൂപ്പർ ഹോസ്പിറ്റലിൽ നിന്ന് നഴ്സിംഗ് പൂർത്തിയാക്കി. 1987-ൽ അവിടെ കുറച്ചുകാലം ജോലി ചെയ്യുകയും ഒമാനിലെ റോയൽ ഹോസ്പിറ്റലിൽ നഴ്സായി പ്രവാസജീവിതം ആരംഭിക്കുകയും ചെയ്തു. വിരമിച്ച ശേഷം യു.എ.ഇ വിട്ട് പോകുന്നത് ചിന്തിക്കാൻതന്നെ കഴിയുമായിരുന്നില്ല. അതിന്‍റെ വിഷമത്തിൽ ഇരിക്കുമ്പോഴാണ് അനുഗ്രഹമായി എൽസമ്മയെ തേടി ഗോൾഡൻ വിസ എത്തുന്നത്.
