ഗ്രീക്ക്-ഓസ്‌ട്രേലിയന്‍ താരം ഇനി കൊച്ചിയിൽ കളിക്കും
കൊച്ചി: ഇന്ത്യൻ സൂപ്പർ ലീഗിന്‍റെ 2022-23 സീസണിൽ ഗ്രീക്ക്-ഓസ്ട്രേലിയൻ അന്താരാഷ്ട്ര സ്ട്രൈക്കർ അപ്പസ്തോലോസ് ജിയാനുവിനെയാണ് കേരള ബ്ലാസ്റ്റേഴ്സ് കളത്തിലിറക്കിയത്. കളിക്കാരനുമായുള്ള കരാർ ക്ലബ് ഔദ്യോഗികമായി പ്രഖ്യാപിച്ചിട്ടുണ്ട്. എ-ലീഗ് ക്ലബ്ബായ മക്കാർത്തർ എഫ്സിയിൽ നിന്ന് കേരള ബ്ലാസ്റ്റേഴ്സ് എഫ്സിയിൽ ചേരുന്ന അദ്ദേഹം 2023 ലെ സമ്മർ സീസൺ വരെ മഞ്ഞ ജേഴ്സി ധരിക്കും.
ഗ്രീസിൽ ജനിച്ച ജിയാനു ചെറുപ്രായത്തിൽ തന്നെ ഓസ്ട്രേലിയയിലേക്ക് താമസം മാറ്റി. ഓക്ലി കാനോൻസിൽ പ്രൊഫഷണൽ അരങ്ങേറ്റത്തിന് മുമ്പ്, വിക്ടോറിയൻ ഇൻസ്റ്റിറ്റ്യൂട്ട് ഓഫ് സ്പോർട്, സൗത്ത് മെൽബൺ എന്നിവിടങ്ങളിലെ യൂത്ത് ടീമുകൾക്ക് വേണ്ടി കളിച്ചു. ഗ്രീക്ക് ഫസ്റ്റ് ഡിവിഷൻ ടീമായ അപ്പോലോണ്‍ കലമാരിയസിലേക്കുള്ള ട്രാൻസ്ഫറിനെ തുടർന്ന് വിദേശത്തേക്ക് പോയി. കവാല, പിഒകെ, എത്നികോസ്, പാനിയോണിയോസ്, ആസ്റ്ററിസ് ട്രിപ്പോളി തുടങ്ങിയ നിരവധി ഗ്രീക്ക് ഫസ്റ്റ് ഡിവിഷൻ ടീമുകളുമായി 150 ലധികം മത്സരങ്ങൾ കളിച്ച അദ്ദേഹം 38 ഗോളുകളും 15 അസിസ്റ്റുകളും നേടിയിട്ടുണ്ട്.
