ക്രിപ്‌റ്റോയ്ക്ക് മേൽ നിയന്ത്രണം വേണം; ആർബിഐ ശുപാർശ ചെയ്തതായി ധനമന്ത്രി

ക്രിപ്റ്റോകറൻസികളിൽ നിയന്ത്രണങ്ങൾ കൊണ്ടുവരാൻ റിസർവ് ബാങ്ക് ഓഫ് ഇന്ത്യ (ആർബിഐ) സർക്കാരിനോട് ശുപാർശ ചെയ്തതായി ധനമന്ത്രി നിർമ്മല സീതാരാമൻ. നിരോധനം ഫലപ്രദമായി നടപ്പാക്കാൻ അന്താരാഷ്ട്ര സഹകരണം വേണമെന്ന് ധനമന്ത്രി നിർമ്മല സീതാരാമൻ ആവശ്യപ്പെട്ടു. ലോക്സഭയിൽ ക്രിപ്റ്റോകറൻസി സംബന്ധിച്ച ചോദ്യങ്ങൾക്ക് മറുപടി പറയുകയായിരുന്നു ധനമന്ത്രി. ക്രിപ്റ്റോകറൻസി നിരോധിക്കാൻ റിസർവ് ബാങ്ക് ഓഫ് ഇന്ത്യ (ആർബിഐ) നിയമനിർമ്മാണത്തിന് ആവർത്തിച്ച് ശുപാർശ ചെയ്തിട്ടുണ്ടെന്ന് ധനമന്ത്രി പറഞ്ഞു. ക്രിപ്റ്റോ ഇടപാടുകൾ അതിരുകളില്ലാത്തതാണെന്നും ഫലപ്രദമായി നിയന്ത്രിക്കാൻ അന്താരാഷ്ട്ര സഹകരണം ആവശ്യമാണെന്നും അവർ പറഞ്ഞു. ക്രിപ്റ്റോകറൻസിയുടെ വിതരണം, വാങ്ങൽ, വിൽപ്പന, കൈവശം വയ്ക്കൽ എന്നിവ സംബന്ധിച്ച് റിസർവ് ബാങ്ക് ഓഫ് ഇന്ത്യ (ആർബിഐ) ആവർത്തിച്ച് മുന്നറിയിപ്പ് നൽകിയിട്ടുണ്ട്. 2018 ഏപ്രിൽ 6ന് പുറത്തിറക്കിയ സർക്കുലറിൽ, വ്യക്തികളെയും സ്ഥാപനങ്ങളെയും വെർച്വൽ കറൻസികൾ കൈകാര്യം ചെയ്യുന്നതിൽ നിന്നോ അവയുമായി ബന്ധപ്പെട്ട സേവനങ്ങൾ നൽകുന്നതിൽ നിന്നോ വിലക്കിയിരുന്നു.