രൂപയുടെ മൂല്യം ഇടിയുന്നു; ഡോളറിന്റെ മൂല്യം 79 രൂപയ്ക്ക് മേൽ

മുംബൈ: ഡോളറിനെതിരെ രൂപയുടെ മൂല്യം വീണ്ടും റെക്കോർഡ് താഴ്ചയിലേക്ക് കൂപ്പുകുത്തി. ഡോളറിനെതിരെ രൂപയുടെ മൂല്യം 18 പൈസ ഇടിഞ്ഞ് 79.03 എന്ന നിലയിലാണ് വ്യാപാരം അവസാനിപ്പിച്ചത്. ഇതാദ്യമായാണ് ഡോളറിന്റെ മൂല്യം 79 രൂപ കടക്കുന്നത്. സ്റ്റോക്ക് എക്സ്ചേഞ്ച് വിപണികളിൽ നിന്ന് ഡോളർ പിൻവലിച്ചതാണ് രൂപയുടെ മൂല്യം ഇത്രയധികം ഇടിയാൻ കാരണമാകുന്നത്.

വിദേശ സ്ഥാപന നിക്ഷേപകർ (എഫ്ഐഐ) ബുധനാഴ്ച മാത്രം 1,244.5 കോടി രൂപയുടെ ഓഹരികൾ ഓഹരി വിപണിയിൽ നിന്ന് വിറ്റു. യുഎസ് ഫെഡറൽ റിസർവിന്റെ പലിശ നിരക്ക് വർദ്ധനവ് ഉൾപ്പെടെയുള്ള കാരണങ്ങളാൽ യുഎസ് ഡോളർ വീണ്ടും ശക്തി പ്രാപിക്കുകയാണ്. ക്രൂഡ് ഓയിൽ വില വർദ്ധിക്കുന്നതും രൂപയെ ദുർബലപ്പെടുത്തുന്നു. ബുധനാഴ്ച ഒരു ഘട്ടത്തിൽ ഡോളറിനെതിരെ രൂപയുടെ മൂല്യം എക്കാലത്തെയും ഉയർന്ന നിരക്കായ 79.05ൽ എത്തിയിരുന്നു. ചൊവ്വാഴ്ച 48 പൈസ കുറഞ്ഞ് 78.85 രൂപയായി. ഈ മാസം ഇതുവരെ രൂപയുടെ മൂല്യം 1.97 ശതമാനം ഇടിഞ്ഞു. 2022 ന്റെ തുടക്കം മുതൽ 6.39 ശതമാനം മൂല്യം ഇടിഞ്ഞു.

രൂപയുടെ മൂല്യത്തകർച്ച ഓഹരി വിപണിയിലും പ്രതിഫലിച്ചു. ബുധനാഴ്ച വ്യാപാരം അവസാനിച്ചപ്പോൾ സെൻസെക്സ് 150.48 പോയിന്റ് ഇടിഞ്ഞ് 53,026.97 ൽ എത്തി. നിഫ്റ്റി 51.10 ഇടിഞ്ഞ് 15,799.10 ൽ ക്ലോസ് ചെയ്തു. ഒരു ഘട്ടത്തിൽ നേട്ടമുണ്ടാക്കിയ സൂചികകൾ വ്യാപാരത്തിന്റെ അവസാന മണിക്കൂറുകളിൽ ഇടിഞ്ഞു. അതേസമയം, ബ്രെന്റ് ക്രൂഡ് 0.34 ശതമാനം ഉയർന്ന് ബാരലിന് 118.38 ഡോളറിലെത്തി. യുഎസ് പലിശ നിരക്ക് ഉയർത്തിയതോടെ, ഡോളറിന്റെ ഡിമാൻഡ് ഒരു പരിധിവരെ ഉയർന്നു. നിലവിലെ സ്ഥിതി തുടരുകയാണെങ്കിൽ, വരും ദിവസങ്ങളിലും ഡോളറിനെതിരെ രൂപയുടെ മൂല്യം ഇടിയാൻ സാധ്യതയുണ്ട്.