‘ബേൺഡ് ഹെയർ’; പെര്‍ഫ്യൂം ബ്രാന്‍ഡ് അവതരിപ്പിച്ച് എലോണ്‍ മസ്ക്
പുതിയ പെര്‍ഫ്യൂം ബ്രാന്‍ഡ് അവതരിപ്പിച്ച് ശതകോടീശ്വരൻ എലോണ്‍ മസ്ക്. ബോറിംഗ് കമ്പനിയുടെ കീഴിൽ പെർഫ്യൂം ബ്രാൻഡ് അവതരിപ്പിക്കുമെന്ന് സെപ്റ്റംബറിൽ മസ്ക് പ്രഖ്യാപിച്ചിരുന്നു. ലോകത്തിലെ ഏറ്റവും മികച്ച സുഗന്ധമെന്നാണ് ‘ബേൺഡ് ഹെയർ’ എന്ന് പേരിട്ടിരിക്കുന്ന പെർഫ്യൂമിനെ മസ്ക് വിശേഷിപ്പിക്കുന്നത്. തന്‍റെ ട്വിറ്റർ ബയോയിൽ, മസ്ക് സ്വയം പെര്‍ഫ്യൂം സെയില്‍സ്മാന്‍ എന്ന് വിശേഷിപ്പിക്കുന്നു.
ബോറിംഗ് കമ്പനിയുടെ വെബ്സൈറ്റിൽ ലിസ്റ്റ് ചെയ്തിരിക്കുന്ന പെർഫ്യൂമിന് 100 ഡോളറാണ് വില. ഡോഷ് കോയ്ൻ ഉൾപ്പെടെയുള്ള ക്രിപ്റ്റോ കറൻസികൾ ഉപയോഗിച്ചും പെർഫ്യൂം വാങ്ങാം. 10,000 ബോട്ടിലുകള്‍ വിറ്റുപോയെന്നും ഒരു മില്യണ്‍ ഡോളറിന്റെ വില്‍പ്പന നേടിയെന്ന വാര്‍ത്ത മാധ്യമങ്ങളില്‍ വരാന്‍ കാത്തിരിക്കുകയാണെന്നും മസ്ക് ട്വീറ്റ് ചെയ്തു. ടണൽ ഗതാഗതം സാധ്യമാക്കുന്ന ഹൈപ്പര്‍ലൂപ്പ് വികസിപ്പിക്കുന്ന മസ്‌കിന്റെ കമ്പനിയാണ് ബോറിംഗ്.
