ഗൂഗിളിനെതിരെ വീണ്ടും അന്വേഷണത്തിന് സിസിഐ ഉത്തരവ്
ന്യൂഡല്ഹി: വാർത്തകളുടെ ഉള്ളടക്കവുമായി ബന്ധപ്പെട്ട് അന്യായമായ വരുമാനം പങ്കിടൽ വ്യവസ്ഥകൾ ആരോപിച്ച് ഗൂഗിളിനെതിരെ കൂടുതൽ വിശദമായ അന്വേഷണത്തിന് കോംപറ്റീഷൻ കമ്മീഷൻ ഉത്തരവിട്ടു. സെർച്ച് എഞ്ചിൻ മേജറിനെതിരെ നിലവിലുള്ള മറ്റ് രണ്ട് കേസുകളുമായി കേസ് ബന്ധിപ്പിക്കുമെന്ന് കോംപറ്റീഷൻ കമ്മീഷൻ ഓഫ് ഇന്ത്യ (സിസിഐ) അറിയിച്ചു.ന്യൂസ് ബ്രോഡ്കാസ്റ്റേഴ്സ് ആൻഡ് ഡിജിറ്റൽ അസോസിയേഷൻ നൽകിയ പരാതിയിലാണ് പുതിയ ഉത്തരവ്.
Thank you for reading this post, don't forget to subscribe!ഈ വർഷം ജനുവരിയിൽ ഡിജിറ്റൽ ന്യൂസ് പബ്ലിഷേഴ്സ് അസോസിയേഷൻ നൽകിയ പരാതിയിൽ ഗൂഗിളിനെതിരെ സിസിഐ അന്വേഷണത്തിന് ഉത്തരവിട്ടിരുന്നു. പിന്നീട്, ഇന്ത്യൻ ന്യൂസ്പേപ്പർ സൊസൈറ്റിയും സമാനമായ ഒരു കേസ് ഫയൽ ചെയ്യുകയും അത് ആദ്യ കേസുമായി ബന്ധിപ്പിക്കുകയും ചെയ്തിരുന്നു. സിസിഐയുടെ അന്വേഷണ വിഭാഗം ഡയറക്ടർ ജനറൽ (ഡിജി) ഒരു ഏകീകൃത അന്വേഷണ റിപ്പോർട്ട് സമർപ്പിക്കുമെന്ന് വെള്ളിയാഴ്ച പുറത്തിറക്കിയ ഉത്തരവിൽ പറഞ്ഞു.
ഗൂഗിളിന്റെ സെർച്ച് എഞ്ചിൻ റിസൾട്ട് പേജിൽ (SERP) തങ്ങളുടെ വെബ്ലിങ്കുകൾക്ക് മുൻഗണന നൽകുന്നതിന് വാർത്താ ഉള്ളടക്കം ഗൂഗിളിന് നൽകാൻ തങ്ങളുടെ അംഗങ്ങൾ നിർബന്ധിതരായെന്ന് ന്യൂസ് ബ്രോഡ്കാസ്റ്റേഴ്സ് & ഡിജിറ്റൽ അസോസിയേഷൻ ആരോപിച്ചിരുന്നു.